#قطة_مشكله #الليله٤٤٤

#قطة_مشكله
#الليله٤٤٤

خد اسمع الحكايه دى وانت تتعظ وتعرف ان الدنيا اتغيرت وان مفيش حاجه بتفضل على حالها 

و دى عباره عن مشكله كانت ف جروب وعلى رأى المثل من شاف بلاوى الناس هانت عليه بلوته

#المشكله
مع ملاحظة انى نقلتها بالفاظ صاحبتها 

صباح الخير 
استشاره، الاستاذه بوسى تقريبا جالها تخلف ... بتسرق الروچ وتحط فى جسمها ورجلها ووشها والمصيبه مش راضى يطلع جسمها مسحت بخل ووشها غسلت بمياه، 

ده غير بقى ان فى قط واقفلها ع السلم هتموت وتضربه بتبخ فيه جامد لا والمفاجأه ان فى فار فى البيت هى نايمه جمبى وهو كمان واخده الفار فى حضنها واخاف اجيب سم هى تاكله واخاف اجيب لازقه هى اللى تلزق 

ومحدش عارف الفار مكانه فين غيرها بيصفرلها تسرق الاكل وتروح تأكله😔  

اه والله تسرق الكبده والفراخ والجبنه وتجرى تديله وهو واقف ورا الباب ياخد منها بايده الصغنونه دى ... بيستغفلونى😂

وبتكمل صاحبة المشكله   

القطه اتهبلت فين زمان ... كنا انا وهى نشوف الصرصار نجرى منه وتستخبى ... دلوقتى لا 
بقت هى بتعامل الفار على انه ابنها وبتحضنه 😕

ولما سألوها عضاء الجروب 
 مش يمكن هى اللى بتاكل الاكل اللى بتسرقه ده ؟

ردت : لا انا شوفت ايد فار 
ف المشكله دلوقتى 

ودلوقتى صاحبة القطه عندها مشكلتين :

١ -  عاوزه حل انها تطلع الروچ من جسم قطتها ازاى ؟ 
 تقريبا افتكرته مرهم للعضم يومياً بتحط منه خصوصا انها اخدت ٢ فوشيا واحمر 

٢ - تطلع الفار ازاى من غير ما القطه تتأذى الفار هيروح يجيب قريبوا ويعيشوا فى البيت  😔

#رديت_وقلتلها :

واضح انها على علاقه بالفار وبتحط الروج علشان تعجبه 
والقط اللى ع السلم مش عاجبه الحال المايل بتاعها وعاوزها تتلم 
رأيى ستروها وجوزوها للقط بتاع السلم هتبطل تخلص روج لان نفسها هتتسد 

و بالنسبه للفار هاتوا مصيده وربنا يستر هى متحشرش نفسها فيها خلوها ف مكان عالى فوق البوتجاز او ف المطبخ مكان متكونش هى بتدخله

#وردت_على_صاحبة_المشكله :

 بنتى تتجوز قط شوارع لا مش ممكن 😂

فقلتلها :

بنتك ماشيه مع فار يا انسه 
الحقى وجوزيها قط الشوارع بدل ما تتجوز الفار  اللى بتحط روج علشان تعجبه  وتجيب لكم العار ... ومع العار تجيب لكم فار مقطقط او قطة بتفرفر 😂

وبعدين صاحبة القطه بتسأل ينفع تطلع الروج بكحول 

وطبعا دى فكره غلط جدا لان زى ما قلتلها :
 
كحول ايه بس ؟
مش كفايه بتحط روج ؟
وماشيه مع فار؟ عاوزاها تسكر كمان ؟؟؟
دى كده هتخربها

اقترحوا حلول البنت مش عارفه تلاقيها منين ولا منين 
دا حتى لما بعض الناس اقترحوا عليها تجوزها يمكن تجيب قط ياكل لهم الفار 

ردت : انها اتجوزت مره واحده وهى سنتين ورافضه الجواز رفضا مطلقا جبتلها قطط كتير واخدتها اربع محلات علشان تختار هى قط انما دى لا ...  بتضربهم كلهم وتاخد الدراى فود بتاعهم وتمشي 
عاوزين حل يا اخوانا 😂😂😂

وبكده نعرف الوضع اتغير تماما يا برايز ... والقطط بقت تصاحب فيران وتسرق لهم الاكل و تفرضه كأمر واقع على سرير صاحبتها مش تجرى وراه وتصطاده

وان القطط بتحط روج واخلاقها انحرفت 
وعلى المستوى الشخصى لما جبنا كتكوت بجنيه لمؤمن وكنا خايفين احسن قطتنا تاكله ... لقينها خايفه منه وهو بيجرى وراها وينام ف حضنها زى البطه اللى بتجرى ورا توم وتقوله مامى 

 اخيرا دى صورة الانسه بوسى نقلا عن صاحبتها 
وف الكومنتات هنزل البوست احسن تفتكرونى بتبلى عليها ولا حاجه 

#العشق_الممنوع
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد