#حرب_البسوس_ج٤ #الليله١٣٢

#حرب_البسوس_ج٤
#الليله١٣٢
مرور ٤٠ سنه حروب خلت الزير سالم عجز 

بس يا ترى ... ايده ضعفت  ؟؟  
عزيمته قلت ؟؟
ابدا 😏
راجل جِدر انا مش بقرّ عليه  انا بحسده وش
بس الناس هى اللى اتفضت من حواليه اما بإنهم تركوه لما عانوه من ويلات الحرب دى 
او بان اللى بيشجعوه ويشجعهم ماتوا
او بسبب  السن هم كمان عجزوا 
القبائل فرهدت من الاخر 
المهم القبائل اتفقت ع الصلح 

خصوصا ان الزير سالم ف المجمل كان هو اللى غالب بنى بكر 

بس الزير سالم مكانش راضى وراح شعللها ف حته تانيه 

لكن  الناس مكنش فيهم حيل يكملوا ... ما قلنا فرهدوا .. فطنشوه 

وانتهت الحروب على كده 

خصوصا لما جساس مات  و اللى قتله هو الهجرس بن كليب 

اه ابن الجليله اخته 

وبكده يبقى قتل خاله علشان يأخذ ثأر ابوه واطى ... انا بقول انه واطى 
ولا جدع ... انا بقول انه جدع اصل اصلا جساس ده هو اللى واطى وهو اللى بدأ وكمان حركة انه يمنع عن كليب الميه وهو بيموت حركه مش تمام مش من شهامة العرب يعنى ... نرجع للمهلهل او الزير اللى اسمه الاصلى عدىّ  بس كان غاوى يتسمى باسامى عرّه كده
نقول بقى 
#نهاية_الزير_سالم١

لما الزير سالم نقض الصلح  وهاجم  تانى 
 ربنا وقعه ف ايد واحد ابن حلال اسمه عمرو بن مالك ( دا غير عمرو بن الحارث الراجل اللى قتل كليب )

بس متفهمش ايه اللى حصل للمهلهل و رجع افتكر الزير القديم اللى كان عليه 
وقعد يقول راح فين زمن الشقاوه 

وف يوم جابوله خمر  فشرب وسكر و معدى عمرو سمعه عمال يقول شعر غزل ابيح غير عفيف خالص ف بنت عمرو 
طَفَلة ما ابْنة المحللِ بيضاء لعوب لذيذة في العناقِ 
فاذهبي ما إليك غير بعيد 
لا يؤتي العناق من في الوثاقِ 
ضربت نحرها إلى وقالت 
ياعديا، لقد وقتك الأواقي

اتجنن عمرو بقى يا راجل دى اخرتها 
اساعدك وأأويك واضايفك وف الاخر تتغزل ف بنتى يا زافل
 
وحلف ما هيدوق الميه الا لما يرد الخضير
و يرد يعنى يشرب 
والمقصود انه مش هيشرب الا بعد ٧ ايام وهى دى المده اللى يرد فيها الخضير ( الابل )

 وطبعا مات قبل ما يعدى الاسبوع 
ودى كانت القصه الاولى اللى حكت نهايته

القصه التانيه : 

نقولها بكره بقى 😊

ايدى وجعتنى من الكتابه وانتوا ميرضيكوش كده 

وبعدين عاوزه اقوم احضر الاكل للعيال وتعالوا كلوا معانا وانا يرضينى كده ☺

#ايام_العرب
#الزير_سالم_مات_اخيرا
#لاء_مش_بالسهل_كده_استنوا_بكره
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد