#جلد_الحمار_ج٤_والاخيره #الليله١٣٧

#جلد_الحمار_ج٤_والاخيره
#الليله١٣٧
بما انها حدوته يبقى لازم سكتها متبقاش سالكه 

يعنى ليه مايروحش يقول لامه انه عاوز اتجوز البنت اللى ساكنه ف الغابه واستايل لبسها funky بتحب تلبس جلد الحمار 
لون النجوم و الزمن 
وبتروش على نفسها باستايل جلد الحمار 
ويبقى كل مشكلته ان اللى بيحبها بتلبس جلد الحمار وانتى يا ماما بتلبسى فرو التعلب والدب وكلهم حيوانات عاتشى يعنى 
 
لاء دا يلف ويدور ويقول عاوز فطيره من اللى بتعملها البنت اللى ف الغابه

وده  اللى وقفنا عنده امبارح

ونكمل بقى ...

البنت وهى  بتعمل عجينه الفطيره وقع منها الخاتم بتاعها في قلب العجين   

ساعتها اول ما جاء الامير ياكل لقى الخاتم 
وطبعا المفروض يقرف ويقول ايه القرف ده ويرمى الفطيره 
او يحطه ف جيبه من سكات دا لو كان خاتم غالى وقيم والامير ايده طويله يعنى 
ويبقى حتى الخواتم بتغير شغلانتها وبدل ما بتطلع ف بطن السمك بقت تطلع ف الفطير واحنا اللى مش عارفين نعمل شفت كارير زى الخواتم 
المهم نرجع للامير 
الامير اول ما شاف الخاتم عرف على طول ان ده بتاع البنت اللي من الغابه علشان كده قال لامه انا عاوز اتجوز البنت اللي الخاتم ده يكون قدها 
بردو مش سالك
طب يابنى متقول علطول عاوز اتجوز البنت اللى عملت الفطيره 

لاء لف ودوران ودوخه ... 

ولف الجنود في البلد كلها يجيبوا بنت تلبس الخاتم ده 

ما فيش ولا بنت من اهل البلد دخل الخاتم في يدها علشان كده فضلوا يلفوا  في الغابه والمدينه وفي كل مكان 
ويجيبوا بنات ويطلع الخاتم مش مقاسهم 

وكانت من ضمن البنات اللي جابوها في النهايه هي البنت الجميله صاحبه جلد الحمار اللي لما شافها عرف ان هي دى  اللي بيتمناها قبل حتى ما تلبس الخاتم 

ولما لبست الخاتم طلع قدها 
ياسبحان الله شوف الصُدف 

تقريبا الانسه صوابعها زى صوابع الموز المستورد والخاتم ده  كان معمول خصوصى شغل جنيات على طريقه اسماعيل يس لما بيقول على بقه خلخال سليمان 

طبعا بهزر اكيد اديها كانت رقيقه وصوابعها نونو وارفع من صوابع اى بنت ف المملكه 

مش عاوزه ابوظ الخيال 

 المهم الامير فرح اوى ان الخاتم جه ادها وطلب منها ان يتجوزها 

قالت له بس انا لي اهل وحكت له حكايتها 

ساعتها راح للملك وخطبها منه وقالوا هي قالت لي ما ينفعش اتجوز الا لما يكون الملك هو اللي يسلمنى  بنفسه لزوجى   لان هو فعلا ابويا 

ساعتها الملك اتكسف على دمه وحس انه ما ينفعش كان يتجوز واحده قد بنته وكانت بمثابه بنته فعلا 

وجه  وعملوا والفرح وعلقوا الزينات ... وعاشوا ف تبات ونبات وخلفوا صبيان وبنات وتوته توته فرغت الحدوته 

ملحوظه اخيره ....  القصه دى فرنسيه تأليف كاتب كبير  اسمه شارل بيرو
بس ف القصه الاصليه كانت البنت بنت الملك والملكه ....  يعنى لما امها ماتت ابوها ملاقاش اجمل منها فقرر يتجوزها 

طبعا مش عارفه بتوع زمان دول كانوا بيعكوا كده ليه ف الانساب 😅
او كان قلبهم قاسى 

زى حكاية بائعة الكبريت 

علشان كده غيرتها وخليته  كان هيتجوز امها بس متجوزهاش 
لانه حتى لو كانت بنت مراته فهى محرمه عليه 
وبالتالى  لم يتم الزواج بين امها وبينه 

هم يعكوا واحنا نصلح هى ناقصه اختلاط انساب ومحارم و عك 

يلا اشوفكوا بكره ف حكايه جديده 
من اللى بتقروها ومبتعملولهاش شير ولا ليك ولا كومنت دى 

#جزمة_سندريلا_وخاتم_البنات_دى_كان_مقاسهم_ايه؟؟؟
#انا_وانت_وساعات_الحظر
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٣٧
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد