#عصامى_ولا_عظامى٥ #الليله ٤٨٠ #الحكايه_الثالثه
#عصامى_ولا_عظامى٥
#الليله٤٨٠
#الحكايه_الثالثه
تعالوا عندى اتعرفوا عليا وانا عازمكم عندى ف بلدى امريكا
بس الاول اعرفكم بنفسى انا والاس جونسون طلعت ف الدنيا لقيت نفسى عامل بسيط في ورشة خشب
معرفتش غيرها شغلانه
الحمد لله دخلى كان مش بطال اه محوشتش ثروه للتقاعد زى اغلب الامريكان ما بيعملوا
بس انا عملت حاجه احسن من وجهة نظرى
انا اتملكت بيت
ودا شئ لو تعرفون عظيم عندنا ف امريكا
اصل البيوت اغلبها ايجار واللى يملك بيته و كمان سدد اقساطة دا بيعتبر نفسه ملك زمانه
انا دلوقتى ف اربعينات من عمرى بحلم انى احوش علشان جامعة ولادى
انتم عارفين بردو اد ايه الجامعات عندنا غاليه اوى بس اعمل ايه واللى جاى على اد اللى رايح
احلام كتير بس مش وقتها انا لسه ف عز شبابى ولسه المستقبل شايل ليا كتير
وف يوم فجأه كده انهارت كل احلامى جدال صغير زى اللى بيحصل كل يوم الف مره بين العمال ف الشغل
بس اتفاجأت بالمدير بيطردنى من الورشه
خلاص قرار نهائى
فجأه كده 😢
طب ازاى ؟
واعيش منين انا وولادى ؟
اجيب منين ؟
وناكل ويتعلموا ازاى ؟
انت عارف حسيت بايه؟ حسيت ساعتها وكأن الأرض بلعتني وانى بغوص في أعماق مظلمة مخيفة
قعدت فتره ف البيت مش عارف اعمل ايه ؟
سنى ده مينفعش اقول انى هابدا فيه ف شغل من اول وجديد
بس واضح ان مفيش حل تانى
امال يعنى هتقاعد دلوقتى
فكرت شويه ودورت ممكن اعمل ايه !
لقيت انى شاطر ف بناء البيوت الصغيره اللى تكلفة بناها مش كبيره
بس هجيب منين ؟
انا معنديش مدخرات
مفيش حيلتى حاجه خالص ابيعها
لاء فى
فى بيتنا اللى عايشين فيه
يعنى ابيع بيتنا وننام ف الشارع ؟؟
طبعا لا
بس ممكن ارهنه
مخاطره اكيد
لان لو مشروعى فشل ممكن ابقى حرفياً ف الشارع انا واولادى
بس لازم احاول
والا هيكون دا اكيد مصيرنا لو متصرفتش بسرعه
اخدت فلوس الرهن وبنيت بيهم بيت صغير بيعته وبسرعه اشتغلت ف البيت التانى وبسرعة انتهيت منه
وعلشان انا صنايعى شاطر وبياع شاطر
كسبت لانى بيعتهم بسعر كويس
واشتغلت ف مشروعات بيوت جديده والبيتين بقوا ٤ و٦ و١٠
وتوالت المشاريع الصغيرة وكثرت
لدرجة انى بقيت مكتسح مجال البيوت الصغيره ☺
وبيطلب شغلى بالاسم
عاوز اقولك انى مش بس صرفت على بيتى احسن ما كنت بنفق عليهم ايام شغلى الاولانى والحياه بحبحت و سديت رهن البيت
ولكن انا مخدتش راحه انا مستمر على الشغل بجد واجتهاد
لدرجة انى بعد ٥ سنين بقى معايا اول مليون
Yes'
حققت الحلم الامريكى
بس انا حكايتى لسه مخلصتش
عاوز تعرف ايه حصل بعد كده ؟
عاوز تعرف ايه علاقة احمد شيبه بحكايتى تعالى الليله الجايه
#انت_ايه_شغفك؟
#ابتسام
تعليقات
إرسال تعليق