#حرب_البسوس_ج٢ #الليله١٣٠
#حرب_البسوس_ج٢
#الليله١٣٠
وقفنا لما كليب عرف ان حبيبته هيتجوزها عدوه التبع
يسكت ...
اه سكت بس عمل زى فكرة #حصان_طرواده
استخبى هو وشوية شباب صحابه فى الصناديق اللى واخده جهاز العروسه لبيت عريسها
واستنى لما الليل جه والناس ناموا
وراحوا طالعين وقتلوا التبع وخطفوا العروسه ورجع بيها على قيبلته
وبعد فتره اتجوزها
و مشيت الدنيا وعاش معاها وخلف منها كمان
فى الوقت ده مين اللى متغاظ اخوها جساس
جساس ده كان مش بس متغاظ من كليب علشان خطف اخته واتجوزها بالطريقه دى
ولكن كمان لان عم كليب زى ما قولنا قبل كده حِمش ومتحكم
يعنى موارد المياه ( الابار ) بتاعة قبيلته محدش يشرب منها الا باذنه
شويه ... شويه يبنى سد النهضه و يغيظهم ع الفيس بوك
طب يا ابتسام ... عماله من الصبح تقولى حرب البسوس .. حرب البسوس ... فين البسوس دى
الصبر بس ...
البسوس دى تبقى خالة جساس
اسمها البسوس بنت منقذ التميمى كانت جايه تزور اختها طلعت من الضيوف الرزله اللى تقعد تلزق مش تاخد شايها وتروح
وعلى رأى المثل
والضيف المجنون يشرب الشاى ويقوم
لاء دى قاعده بقى ومطوله ولا كأنها صاحبة بيت
لدرجة ان الناس ييجوا يزوروها عند اختها
الا وهم قاعدين عند اختها جالها واحد يزورها اسمه سعد بن شمس
وجاى معاه ناقه راكنها جنب الخيمه ف البارك بره
الا والنوق بتوع كليب رايحين يشربوا
وواضح ان الناقه دى هبله راحت ماشيه وراهم
وراحت تشرب معاهم
بس كليب مبيسمحش غير بس لنسايبه انهم بعيرهم تشرب من موارد مياهه
ودى مش تبع نوقه او نوق نسايبه
ومتفهمش ليه كليب يعمل عقله بعقل ناقه .... لاء وناقه هبله كمان
وراح ضاربها بالسهم ف ضرعها ماتت
وراح الضيف يعيط للست البسوس وانا ضيف عندكم واتهان ف منطقتكم
تسكت البسوس ... لاء مهى من الاول دى وليه ندابه ورزله
وبقت فيما بعد مضرب المثل ف الشؤم
يعنى المثل يقولك ( شؤم البسوس )
راحت لابن اختها جساس
وهاتك يا ندب ... وا ذلاه .. وا غربتاه
وفضلت تديها ف شعر
اتسمت ابيات الفناء
لَعَمْرُكَ لَوْ أَصْبَحْتُ في دَارِ مُنْقِذٍ .:.
لَمَا ضِيْمَ سَعْدٌ وَهْوَ جَارٌ لأَبْيَاتِي
ولكِنَّنِي أَصْبَحْتُ في دارِ غُرْبَةٍ .:.
مَتَى يَعْدُ فِيها الذِّئبُ يَعْدُ على شَاتي
فَيَا سعدُ لا تَغْرُر بِنَفْسِكَ واِرتَحل .:.
فإنَّكَ في قَوْمٍ عنِ الجارِ أَمْوَاتِ
وَدُونَكَ أَذوادِي فَإنّي عَنْهُمُ .:. لَرَاحِلَةٌ لا يَفْقِدُونِي بُنَيَّاتِي
ياستى راحله ... طب ما تغورى
بس ازاى لما تسخن جساس ...وفعلاً
سخنت الواد على ابن عمه وجوز اخته
وساعتها الجساس سخن
وقالها صبرك بالله يا خالتشى ...
واستنى شويه وعمل عقله بعقل ( علال )
مين علال ده ؟
دا الجمل الخصوصى بتاع كليب
وان .. ان .. ااااان
فجأه الرخامه والتربص بقت سمة الموقف
وف مره شوية حريم تبعهم رايحين يملوا ميه ومعاهم مجموعه فرسان بيحرسوهم الا وجه كليب
رخم عليهم ومنعهم من المياه
ورخم هنا مش بمعنى عاكس ولكن مرضيش يشربوا من مياه اباره
الميه بتاعت قبيلته وبيملوا منها بموافقته .. اه
بس دا ...
ميصحش كده
...ميصحش كده
مين من ضمن الحراس ؟؟؟؟
شاطرين ... جساس
راح احتك بكليب وقلبوا و افتكروا موضوع البسوس
وسخن جساس وراح طعن كليب
وكليب حس انه بيطلع ف الروح ... فطلب بق ميه
قام عمرو بن الحارث
اللى مع جساس نازل من على حصانه
تفتكروا عمل ايه ؟؟؟
جاب له ميه ؟؟؟
جاب له اجله ؟؟؟
جاب له حواوشى ؟؟؟
جاب ايه يا حاج اسماعين
جاب ايه يا حاج اسماعين
ده اللى هنعرفه بكره
#انا_شنكل_ابن_شناكل_والمنتشقه_دى_منتشقتنا
#من_وحي_فيلم_مستر_كارتيه
#ايام_العرب
#ابتسام
تعليقات
إرسال تعليق