#الامتحان #الليله٤٨٧

#الامتحان

#الليله٤٨٧

الابتلاء ... المحنه ... 

انا عاوزه ابتلاء سيدنا سليمان ... مش ابتلاء سيدنا ايوب يارب

كلنا لازم نمر بالابتلاء حتى الانبياء 

سيدنا رسول الله صل الله عليه وسلم مر بابتلائات كتير

من اول فقد ابناؤه كلهم - الا ستنا فاطمه - على حياته ودفنهم بايده وبكاهم بعينه وقلبه 

اوذى من قريش كفارها ويهودها ومسلمش حتى من عمه وزوجة عمه 

وحادث الطائف وغزوة احد ...  وغير ... وغيره

بس دايما كان بيأثر فيا ابتلاء سيدنا ايوب ...فقد كل ابناؤه 

و افتقر

مرض جدا

واتعرض للطرد بسبب مرضه من بلده 

واضطرت مراته تعمل ف البيوت علشان تلاقى لقمتهم هما الاتنين 

كنت دايما بحس ان ابتلاؤه يصعب على اى حد إحتماله الا لو كان نبى 

اما سيدنا سليمان يا زيدى يا زيدى ...اهه ده اللى انا عاوزه ابتلائى منه يا رب 

ملك لم ولن يحصل عليه احد مثله 

خدم من الجن 

طيور وحيوانات وكلام عن خاتم وبساط سحرى وقوارير 

دا حتى النمله مش بس بيسمع دبتها لاء دا بيسمع كلامها وحوارتها 

خيول بيستمتع بتريضها 

ميه بتغير طبيعتها ويقدر هو وضيوفه يمشوا عليها 

وكله كوم والعبد اللى ربنا اتاه من العلم ما جعله يحرك العرش قبل ان يرتد اليه طرفه 

يا دين النبى🙊

انا عاوزه من ده يا رب 

كنت دايما ادعى ان يكون ابتلائى زى ده 

بس بعد ما كبرت و عقلت 😆

فهمت ان مش مهم الامتحان حلو ولا وحش سهل ولا صعب هو انا هتجوزه .... ولا حتى هتجوزه 😂

... المهم انجح ف الامتحان 

الطريق للجنه لازم له امتحان وممكن يكون الامتحان حلو اوى وسهل و مسكر بس نسقط فيه او نجاوب وحش ونسقط بردو 

ابتلاء شكر النعمه بنفس درجه صعوبه ابتلاء الصبر على الالم 

 

رب اوزعنى ان اشكر نعمتك التى انعمت على وعلى والدى وان اعمل صالحا ترضاه

اعرف انك نازل الارض علشان تمتحن ... ركز ف ورقتك ومالكش دعوه بورقه اللى جنبك

ولان كلامى ده خواطر وانا بحب احكى حواديت فكلامى ده فكرنى بحدوتين 

حدوته من ايام سيدنا موسى 

وحدوته من ايام سيدنا محمد صلى  الله عليه وسلم 

حدوتة سيدنا موسى لها روايتين 

الاولى اما ولد من بنى اسرائيل كان فقير اوى وطلب من سيدنا موسى انه يدعو له الله بانه يكون غنى 

فسأله عاوز تكون غنى ف شبابك ولا ف عجّزك  واواخر ايامك 

رد الشاب وقاله لاء ف شبابى عاوز استمتع بالثروه وانا لسه بصحتى 

وفعلا اتغنى وبقت فلوسة كتير بس نسى ان هيكون عجوز ومحتاج للقرش يسنده خصوصا انه اصلاً عايش وسط يهود😂

بس فرحته بالفلوس مخلتهوش ينسى الفقرا اللى حواليه 

وكانت شغلانته بتكسب كتير زى ما دعاله نبى الله موسى والفلوس بتتوزع الفقرا والمساكين وتشغل ناس فقرا

وتجوز وتعاون كل من حواليه 

والزمن عدى والشاب كبر وعجز كمان وهو لسه غنى 

بس لسه مفتقرش ...وسأل نبى الله موسى رب العزه 

ليه مفتقرش يارب؟

اجابه المولى وقال ما معناه انه كان بالفلوس اللى معاه بيوسع بها  على عبادى 

وما أخدش الفلوس له لوحده علشان كده محرمتهوش ... لانه كان سبب ف رزق ناس

الحكايه المشابهه بتقول الكلام اللى فات كله بس الابطال زوجين فمش هعيدها تانى

يا ترى الشاب او الزوجين نجحوا 

اه نجحوا  

لانهم نجحوا ف الامتحان 

طلبوا الثروه ... وشكروا نعمتها ... عملوا زى سيدنا سليمان 

وَوَصَّيْنَا الْإِنسَانَ بِوَالِدَيْهِ إِحْسَانًا ۖ حَمَلَتْهُ أُمُّهُ كُرْهًا وَوَضَعَتْهُ كُرْهًا ۖ وَحَمْلُهُ وَفِصَالُهُ ثَلَاثُونَ شَهْرًا ۚ حَتَّىٰ إِذَا بَلَغَ أَشُدَّهُ وَبَلَغَ أَرْبَعِينَ سَنَةً قَالَ رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَىٰ وَالِدَيَّ وَأَنْ أَعْمَلَ صَالِحًا تَرْضَاهُ وَأَصْلِحْ لِي فِي ذُرِّيَّتِي ۖ إِنِّي تُبْتُ إِلَيْكَ وَإِنِّي مِنَ الْمُسْلِمِينَ (15)الاحقاف

اما الحدوته اللى فى عهد الرسول صلى الله عليه وسلم فاسمحولى احكيها الليله الجايه علشان منطولش اوى

#عاوزه_من_ده_يارب

#يارب_اكون_فهمتها_صح

#ابتسام