#ليست_السعادة_فى_المال٣ #الليله٤٨٦
#ليست_السعادة_فى_المال٣
#الليله٤٨٦
وقفت قصة كرستينا فى بحثها عن السعادة
عند سن ال٣٧
ولما لقت ان مفيش حاجه من اللى عاشت تعملها حققت لها السعاده قررت انها تنهى هذه الحياه البائسه
كده الثروه اتنقلت من الجد للام للحفيده
بس قبل ما تموت اثينا كانت انفصلت عن تيري روسيل
واخدت بنتها تحاول تعوضها او تعوض معاها اللى اتحرمت منه لما امها وابوها كانوا بعاد عنها ف طفولتها
ومع ان اثينا كانت طفولتها كانت متدلعه بردو دى كانت عايشه ف فيلا ١٨ اوضه
الليفينج فيه بيسين
فيلا فيها جنينة حيوانات ومدرب حيوانات و على مساحة ٣ فدان
وف اوضة نوم اثينا دواليب للعب
ومش اى لعب دى نماذج مصغرة من عرايس لابسين من كريستيان ديور
زى ما ابله فاهيتا لابسه من عند هانى البحيرى
امها كانت جايبه لها عربيه فيراري لعبة ب ١٠،٠٠٠ دولار اميركي
وعلشان بتحب اغنيه الخروف الاسود
جابت لها قطيعا من الخرافان الصغيرة في البيت
وكان اهم من ده كله موفره لها الحب اللى اتحرمت منه هى في طفولتها
بس رجعت بانتحارها والبنت عندها ٣ سنين حرمتها من اهم حاجه ... منها هى شخصيا
وكبرت اثينا وبقى عندها ١٨ سنه ودا السن اللى تقدر من خلاله تدير ثروتها بنفسها بس مجلس الامناء على الثروه مش عاوزينها تاخد ثروتها
وبيقولوا ان ابوها غير اهل لانه يديرها معاها
اذا كان كان بيفرتك ال٨ مليون دولار اللى بياخدهم سنويا
ومع ان الراجل لجل الحق
عود البنت متبقاش عايشه حياه مدلله ومفسده زى ما اتربت امها
ولكن عودها تروح مدارس الحكومه وتاخد مصروف وبعد عنها الاعلام اللى كان معذب امها زى ما عذب الاميره ديانا
ودا من خلال طقم جاردات بيحاوطوها ف كل مكان
البنت عاشت وسط اسره مكونه من ابوها و جيل مرات ابوها اللى اتجوزها بعد ما اطلقت منه كرستينا لما اكتشفت انه على بيخونها مع جيل دى وانهم مضيعوش وقتهم وخلفوا عيلين وهى على زمته
المهم الراجل معروف انه كان اكتر حاجه بيحبها ف كرستينا هى ثروتها ولما اطلقوا اتجوز جيل دى وخلفوا جوز تانى مع ال٢ الاولانيين وعاشت اثينا وسط اخواتها ال ٤
واتعلمت اثينا من تجربة امها
ومجريتش ورا الجواز عمال على بطال
هى حبت واحد بس
اه كان لعيب كوره وسابها وركز ف ركوب الخيل اللى كانت هوايتها المفضله
ومش بس ساب الكوره
دا ساب كمان مراته عارضة الازياء وبنته اللى عندها سنتين
ومراته توسكوت
ابدا دى طلعت شرشحته ف وسائل الاعلام وقعدت تقول
ااااايوووواااا
ياللى سايبنى وسايب بنتك علشان فلوس حفيدة اوناااااسيييييس
ما هو انا لو عندى فلوس اشتريله حصان كان زمانه فضل معايا
انما هو جرى ورا الدهب وسقفت باديها كده🖐🖐
اثينا قالت مالناش دعوه بالوليه اللى عامله زى ريم البارودى دى
هى فاكرانى سميه الخشاب ولا ايه؟
وسعت انها تكون اسره مع دودا اه والله دا اسم الدلع بتاعه
اسمه الاصلى (ألفارو ألفونسو دي ميراندا نيتو)
و عملت فرح بسيط
بس محدش يعرف ايه اللى حصل ف الفرح كان الحضور بدعوات
ومنعت التصوير تماما
حتى انهم استخدموا اجهزة الاشعه تحت الحمرا علشان تكشف لو حد جاى يصور
وقالت الصحفية الوحيدة التي سمحوا لها تحضر الحفله ان المعازيم كانوا ٧٠٠ نفر واتعمل ف مدينة ساو باولو ف البرازيل
ابوها محضرش الفرح لانه كان مش موافق
وان مجاش من عيلتها الا اختها سابرينا
ودا علشان تظبط لها المكياش وتعدل الطرحه وترفع الكب لما يتسلت
وقررت انهم هيعيشوا ف شقة محندقه كده مساحتها ١٠٠٠متر قمة التواضع
عاشت اثينا زى اى ست عاديه عاوزه تخلف
وزى اى حد يمتلك الثروة دى كلها عاوزه لها وريث بس بعد حوالى ١٢ سنه جواز هى ودودا مخلفتش
وتستغرب دا القطط ف الشارع و الحطابين ف الحقول والعجائز حول نار المدفئه بيخلفوا
ايه؟
بتقولوا العجائز مبتخلفش ؟
لاء فى عجائز بتخلف بس بنت المنحوسه دى مش عارفه تلم جمعيه وتعمل طفل انابيب
وف النهايه اهم تطلقوا
البت ماشيه ف سكة امها باين
الواد دودا الواطى كان بيخونها وهى عماله تدور على وصفات للحبل و ودايخه ع الحكما
والشيخه خديجه المغربيه بتاعة ساو باولو
والخاله نظيمه تديها الوصفه وتقولها ان كان هيبان
والافندى رايح يعط
طب بص جوه يا حسب الله
اهى اتطلقت
وانتم عارفين هناك فى قوانين بتتيح اقتسام الثروه بين المطلقين
بس اسم الله عليهم مجلس الامناء المتحكمين ف ثروتها من الاول متفقين ان مش هياخد حاجه من ثروتها ساعة الطلاق
المهم ان الدنيا والعه بين
لجنة الاوصياء واثينا وابوها
والثروه مش ميلغ كبير اوى يعنى دا حايالله ١.٥ بليون دولار.
بعض الناصحين بيقولولها اتنازلى لابوكى ومراته واخواتها من ابوها غير الاشقاء اللى إتربت معاهم علشان يستفيدوا منها.
ولكن هى بتفكر ف حاجه تانيه عاوزه تعمل سلسلة مؤسسات خيرية زى بيل جيتس
#ابتسام
تعليقات
إرسال تعليق