#اوفى_من_السموأل_ج٣#الليله١٦٦

#اوفى_من_السموأل_ج٣
#الليله١٦٦
وقفنا عند ايه ؟؟؟🤔
اه ... فين دا كله من السموأل ؟؟ 
بتقولوا :
انتى نسيتينا بتحكى عن ايه اصلاً؟
اه صحيح ... احنا بنحكى عن ايه ؟؟🤔

اه عن السموأل☺ 

الناس وصلها الخبر ان امرؤ القيس جلده بيقع و اطلقوا عليه ابو القروح 
متنمرين 😂
و الاخبار انتشرت ان امرؤ القيس عيان  ف انقره وكل اللى فى كل شبه الجزيره عرف

امرؤ القيس بيموت
 
امرؤ القيس بيكتب شعر ف المرحومه اللى ف القبر اللى هيبقى جنبه علشان ناوى يأنتم معاها لما يموت باين 
اه والله الراجل مسموم و بيموت فمش هيلاقى واحده ترضى به وترضى تحبه وهو جلده بيقع 
وعرف ان فى اميره لسه ميته ومدفونه جنبه فبدا يحبها ويحاول يقولها كلام حلو وشعر علشان تتعلق به ولما يموت ترضى تعيش !!!! 
تعيش ايه ؟ قصى ترضى تموت معاه ولا فيه 
تقريبا دا مفهومه عن انه يعمل لاخرته 

المهم انه فضل بشعر و يقول 
بحبك يا مزه  .:. حتى لو كنتى جثه 

طبعا بهزر امرؤ القيس يقول مزه وجثه دا شعرى انا😎

هو قال : 

أجارَتَنا إنَّ الخُطُوبَ تَنوبُ 

وإني مُقِيمٌ ما أقامَ عَسِيبُ 

أجارَتَنا إنّا غَرِيبَانِ هَهُنَا 

وكُلُّ غَرِيبٍ للغَريبِ نَسيبُ 

فإن تَصِلِينَا فَالقَرَابَةُ بَيْنَنَا 

وإنْ تَصْرِمِينَا فالغَريبُ غريبُ 

أجارَتَنا مافاتَ لَيْسَ يَؤوبُ 

ومَا هُوَ آتٍ في الزَّمانِ قَرِيبُ 

ولَيْسَ غريبًا مَن تَنائتْ ديارُهُ 

ولكنَّ مَنْ وارى التُّرابُ غَريبُ 

وعسيب: جبل في هذا المكان.

عموما مبعدناش كتير عن الشعر بتاعى 😎
المهم الوزن والقافيه والسنس 
عموما يرجع مرجوعنا للسموأل 

زى ما قلت الاخبار انتشرت انه خلاص مات  .. والجزيره العربيه اد ايه دى اوضة وصاله 

(  لاء مصر هى اللى اوضه وصاله  ) 
الجزيره اوسع شويه دى اوضتين و مقعد و مجلس

المهم الحارث الاكبر دا راجل بلديات امرؤ القيس و من الغساسنه 
قالك بس انا كده اورث الورث دا كله 
تورث مين يا عم هو انت من ولاده لا بس اقربله من بعيد وانا كمان ملك 
اااااه انت ملك لاء اذا كنت ملك يبقى من حقك تورث🙄
وعنها وبعت راجل من طرفه  للسموأل هات ياعم الحاجات اللى كان شايلها عندك امرؤ القيس علشان يخصونا 

وطبعا لا  يخصوهم ولا حاجه 

السموأل لما حس بانهم جايين مصممين ياخدوا  الامانه اللى عنده 

قفل عليه باب الحصن فاكرين كان عنده حصن ف تبوك غير حصن اليهود اللى ف خيبر 
صوره اطلال الحصن موجوده ف الكومنتات
بس لما قفل الحصن 
كان له ابن بره الحصن خرج يصطاد 

الحارث قاله هات الحاجات بتاعة امرؤ القيس اديك ابنك والا هقتله

وسلم واستلم باسطا

قاله طب سيبنى شوبه افكر 

تفتكر ممكن يعمل ايه ؟

ودى عاوزه سؤال دا ابنه ضناه

والامانه اللى متشاله عنده صاحبها مات اساسا 

فخلاص القضيه محسومه 

بس يا ترى ايه اللى هيحصل ؟
هانشوف الليله الجايه  

#خلبوص_كبير_امرؤ_القيس_ده #هو_ف_ايه_ولا_ايه؟
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد