#الحجاج_ج٩#الليله٥٠٦
#الحجاج_ج٩
#الليله٥٠٦
طبعا الدنيا كانت اخر بوظان في العراق اضطراب وثورات ومشاكل لا حصر لها
محتاجه إللى يرجع الأمن والاستقرار ويظبط الناس على الالتزام بعد ما بيتهربوا من الجهاد
و مش بس كده دا كمان اشتدت معارضتهم للدولة الامويه اصلاً
وزاد خطر الخوارج وقويت شوكتهم بعد ما عجز الولاة انهم يسيطروا عليهم
وطبعا الحجاج مكدبش خبر
ايه ده ... سيطره وفرض نظام بالقوه؟
ايه ده ... قتل وسفك دماء
انا جااااااااى
وبالحلال زى وجهة نظره ما أكدت له ؟
وجرى على الكوفة
ودخل عايهم دخله سينيمائيه ولا دخلة محمود المليجى على فريد شوقى ف خمارة القط الاسود
داخل بعمه حمرا
وملثم وشه
وهم عرفوا انه جاى ومنتظرينه ف الجامع و استنوا انه يدخل او يتكلم
وفين الحجاج اللى سمعته سبقاه اللى قتل عبد الله بن الزبير
وضرب مكه والكعبه بالمنجنيق
اللى قتل الالاف فى بيت الله الحرام
وطبعا زى ما قولنا هو قصير و خله القِله كده
فلازم يبين نفسه
واللى عمله انه قعد ساكت ع المنبر
والناس تتكلم او تتريق او تهجوا
والاصوات عاليه
ولكن بعد فتره الصمت ما طالت بدا الناس يسكتوا ويبدوا الاهتمام به
ساعتها قال خطبته الشهيره اللى بقت تتاخد منها اقوال مأثوره واستشهادات فضل ينذر و يتوعد المخالفين والخارجين والمتكاسلين عن الخروج لحرب الخوارج الأزارقة
و فيها:
( يا أهل الكوفة إني لأرى أرؤسا قد أينعت وحان قطافها وإني لصاحبها، وإن أمير المؤمنين –أطال الله بقاءه- نثر كِنانته (جعبة السهام) بين يديه، فعجم عيدانها (اختبرها)، فوجدني أمرّها عودا، وأصلبها مكْسِرًا فرماكم بي؛ لأنكم طالما أوضعتم في الفتنة، واضطجعتم في مراقد الضلالة، وإن أمير المؤمنين أمرني بإعطائكم أعطياتكم، وأن أوجهكم لمحاربة عدوكم مع المهلّب بن أبي صفرة، وإني أقسم بالله لا أجد رجلا تخلّف بعد أخذ عطائه ثلاثة أيام إلا ضربت عنقه”)
وأتبع القول بالفعل
وزى ما عمل قبل كده ف الشام وقتل واحد من اللى تقاعسوا
فلما شاف الناس ده جريوا ورا المهلب لمحاربة الخوارج الأزارقة
و اطمأن الحجاج لاستقرار الأوضاع في الكوفة
ونقل على البصرة وسمعته سبقاه وخطب تانى فيهم خطبة زلزلت قلوبهم و قال فيما قال :
“إني أنذر ثم لا أنظر
وأحذر ثم لا أعذر
وأتوعد ثم لا أعفو…”.
بس فجأه قامت حركة تمرد في صفوف الجيش و اعلن “ابن الجارود” الثروه بعد ما قال الحجاج نيته انه ينقص رواتب الجنود العراقيين ١٠٠ درهم ولكن دا الحجاج وفعلا قدر يقضى ع ثروة ابن الجارود
وملحقش يفوق
الا وقامت ثورة دامت ٣ سنين ودى بقى هزت استقرار الدولة
وزى ما الشاعر بيقول ومن مامنه ياتى الحذرُ
جت الضربمن الجيش الاحب اللى قلب الحجاج جيش الطواويس
وزي ما قال العلامه احمد شيبه اللى منى مزعلنى جت الضربه من “عبد الرحمن بن الأشعث” و دا واحد من رجالة الحجاج
كان باعته على راس حملة ضخمة يخضع الأجزاء الشرقية من الدولة، و خصوصا سجستان و ملكها “رنبيل”
بس ابن الأشعث اتغرّ وأعلن العصيان ع الخليفة
والراجل كان مغرور بنفسه وشايف نفسه حبتين
فبدل ما يكمل المهمة بتاعته ويقضى على الثوار بقى هو الثوار 😂
وقالهم كتير عليكوا انا
و لقى أهل العراق ميالين للثورة على الحجاج
فاتفقت الرغبتين وشجعه مجموعه من الكبار و عجبتهم فكرة الحرب على الحجاج و فعلاً انتصر ابن الأشعث في الجولات الأولى وسقطت البصرة في يد الثوار
وخلعوا الحجاج
ويقال ان دار ف ١٠٠ يوم ٨٤ معركه
٨٣ منهم اتهزم الحجاج وفاز ف الباقى
**احسب الناتج :
٨٤ -٨٣= ١ معركه
والله بطل مغوار يابو حجيج
بس بردوا هنا يبان ذكاء الحجاج واستغلاله لاى ظرف ضده ويطوعه لصالحه
لما الحجاج قرب ع الهزيمه
بعت له ابن الاشعث يقوله سلم واستسلم ولك الامان
فصرف الرسول وقاله هافكر
وبدأ يقرأ الرساله على جنوده
وقالهم : يطلبون منى الامان (ههههه) دى بيقولها الحجاج
دلوقتى خايفين وبيطلبوا الامان (هاهاها)بردو الحجاج لسه بيتكلم ... بعد ايه بعد ما عرفوا اننا خلاص هنخلص عليهم
وفعلا جيشه اتشجع و قاتل لحد ما جاله المدد من دمشق و كمل قتال ضد ابن الأشعث
لحد ما سحقه فى معركة دير الجماجم
وهرب ابن الاشعث لمملكه معاديه وطلب الامان
guess who???
صح رنبيل عدو الامس
والملك فعلا امنه
بس لما وصل الخبر للحجاج قاله هاغزوك وافرمك زيهم
فقاله على ايه يا عم نعمل اتفاقيه تسيبنى ف حالى ١٠ سنين
وانا اسلم راس ابن الاشعث
قاله الحجاج ... ديل
ابن الاشعث لما حس انه هيتسلم تسليم اهالى قام نط من فوق قصر رنبيل واتقطمت رقبته
الملك قال لجنوده جزوهالى كتر خير الراجل ريحنا وبعتها للحجاج
اخدت لها الحكايه دى اد ايه ٣ سنين
وبعد كده استقر الحجاج ٢٠ سنه ف حكم بغداد طيوب بيعمل اعمال خير كتيره وهنحكى عنها الليالى الجايه
وكفايه دم وقتل
ونبطل حركات مستر هايد
وهنعيش الفتره الجايه مع د.جيكل الطيب
حافظ القرآن وصاحب الفتوحات
وفاعل الخير
بس ممكن نحكى شوية حاجات كده نفش غلنا بهم
زى حكايته مع هند بنت اسماء (اسماء دا اسم ابوها مش امها )
وزى سعيد بن جبير
وزى عبد الملك بن مروان
ووليد بن عبد الملك
ولا اخوه وولى عهده سليمان بن عبد الملك
و قتيبه بن مسلم ولا الهند والسند وبلاد تركب الافيال
ونكمل الليله الجايه حكاوى الحجاج اللى شكلها هتكمل معايا الالف ليله وليله
انا طبيعتى بمل من الحواديت الطويله
ودى اول مره اطول كده مع حد بعد سيدنا موسى وسيدنا سليمان
نتقابل الليله الجايه باذن الله
#ابتسام
تعليقات
إرسال تعليق