#الحجاج_ج١٤#الليله٥١١
#الحجاج_ج١٤
#الليله٥١١
بالنسبه بقى لما قيل عن تجزئه المصحف
انا سألت سؤال ف اخر الليله اللى فاتت العلماء عملوا دا امتى ؟
وازاى ؟
تعالوا اما اقول لكم
كان لما يحبس العلماء (علماء الدين طبعا ) كان بيطلب منهم يحسبوا ربع القرآن ونصف القرآن وسبع القرآن وخمس القرآن
حتى ان العلماء اللى كان حابسهم قدروا يحسبوا ان الحروف اللى قبل حرف (ف) فى كلمة (فليتلطف) فى سورة الكهف قد الحروف اللى بعدها
وان فاء فليتلطف هى منتصف القرآن
كانوا بيعدوه بالحرف يا ضنايا اه احنا كمسلمين طبعا مستفيدين
بس احساسك انهم كانوا بيعملوا كده ف الحبس
حتى لو اخدوا عليه اجر من المولى بس بردو مازال ده عبوديه وسخره
وحكايه الحبس لعلماء القرآن دى حكاها د.عمر عبد الكافى
واتقال كتير عن انه كان بيقرأ ف المصحف كل ليله قدر كبير
كتير قالوا ربع القرآن
وان كان فى بعض
احمد موسى العصر ده قالوا انه كان بيختم القرآن ليلاتى على الله امال زوجاته وجواريه
والشعراء اللى ف مجلسه والناس اللى بيقتلهم بيلاقى لهم وقت منين ؟
وفى من بلغ بهم الفشر والكذب والنفاق انهم يقولوا كان بيختم المصحف بين المغرب والعشا
وانا ان كنت اشك انى اقدر اقرأ البقره وال عمران ف المده دى واخلصهم 🤔ممكن ابقى اجرب واقول لكم
او تجربوا وتقولولى
المهم
دا لو بيقلب المصحف صفحه ورا صفحه بلا قراءه اشك انه يقدر ينهيه ف المده دى ... الا لو بيفره😂
فاكرين الست اللى اشتكت ان بيتها مفيهوش فيران دى واحده ست اروبه زيها
ودى حكايتها مع الحجاج
واضح ان الست دى كانت مبقوقه منه فطولت لسانها و تطاولت عليه
فسأل الحاشيه اعمل معاها ايه ؟
قالوا له : اقتلها
قالت له : والله اخوان اخيك فرعون كانوا افضل من اخوانك
لان لما دخل عليهم موسى واخاه قالت حاشية فرعون ارجاهم وارسل ف المدائن حاشرين
مقالوش له اقتلهم زى ما حاشيتك قالتلك ... اقتلها علطول كده بلا تفكير
قالها : طب انا عفوت عنك
بس قبل ما تمشى ادعيلى
قالت له : بيض الله وجهك ورفع كعبك
ومشيت
ف حاشيته قالوا اللهم امين
قال لهم جتكوا خيبه دى بتدعى عليا
سألوه ازاى 🤔
قالهم بيض الله وجهى يعنى جالى برّص البهاق يعنى
ورفع كعبى اى شنقت فارتفعت كعبى عن الارض
جريوا وراها
انت قصدك كذا كذا
قالت 😳 قاتله الله ما اثقفه
المهم
الحجاج له حكايه لذيذه عاوزه احكيها لكم وان كانت من الحكايات اللى بردو تستغرب المصدر جابها منين زى حكايه الجزء الاول د
فى مره الحجاج كان واقف على المنبر هيخطب ليوم الجمعه
الا وعمل بومبه
اووووبا😳
وبعدين ؟🙄
ينزل من مكانه ويقول لهم اروح اتوضى ؟
وحشه ف حقه
طب يكمل كده ؟
طب ودا ينفع ؟انا اقتل اه ...انما اصلى بدون وضوء ؟ طبعا حرام ميجوزش
طب يمشى ويروح ويخلى حد غيره ينوب عنه ف الصلاه ؟
بردو مينفعش ومفقوسه وهيشبع تريقه
ودا الحجاج
تفتكروا هيعمل ايه ؟
نكملها الليله الجايه ونحكى حكايات غيرها
#ابتسام
تعليقات
إرسال تعليق