#الحجاج_ج١١#الليله٥٠٨

#الحجاج_ج١١

#الليله٥٠٨

الليله اللى فاتت اتكلمنا عبيد الله بن زياد بن ابيه اللى بقى ابن ابى سفيان 

وكان متجوز هند بنت أسماء بن خارجة الفزارية

جميلة واجمل بنات عصرهازانجلينا جولى زمانها ولا جودى فوستر عصرها (اصلى بحبها ) المهم الست كانت جمال واصل عربى وثقافه وشعر وعقل راجح وذكاء يعنى ملكت كل المزايا  

و كانت زى ما قولنا هى وعبيد الله بن زياد بن أبيه والي  العراق كانوا ويال العجب متجوزين و بيحبوا بعض الاتنين متفهمش ازاى ؟🤔 لاء و كمان خلفوا ولد وبنت وكانت هى و هو   مبيسيبوش بعض في السفر و حتى لو كانت حرب 

 و ف يوم معركة الخازر ٦٧هجريه  اتقتل عبيد الله  قرب  الموصل على يد جيش  المختار بن أبي عبيد الثقفي 

وهي معه طب تعمل ايه ؟

قالت ف نفسها : مش همكنهم مني

ولبست هدوم الفروسيه بتاعته  وعمامته وركبت فرسه 

ومشيت الطريق الطويل من الموصل  لحد الكوفه

عارفين اد ايه؟

٦٠٢٫٨ كم  جبت المسافه من جوجل مابس والخريطه تحت👇

تخيل كل ده من غير مرافق ولا دليل لحد ما دخلت  الكوفة و  كانت بتقول : انى لاشتاق القيامه لارى وجهه (وجه زياد جوزها حبيبها ) 

يا حبيبتى .. مسكينه .. دى هتترمل عليه العمر كله علشان تربى العيال

 

بس لما تولى  بشر  بن مروان حكم  الكوفة وصفوها له  فخطبها

ووافقت😳!!!

آه ... واتجوزها وولدت له ولد سمته  عبد الملك على اسم عمه الملك 

ومات بشر سنة ٧٥ 

يا حبيبتى .. مسكينه .. دى هتترمل عليه العمر كله علشان تربى العيال

و لما إتولى الحجاج ولاية العراق طلب منها الطفل عبد الملك علشان يربيه تربية الأمرا  فوافقت 

وشويه والحجاج وصله اخبار جمالها وهو اصلا بيحب يتجوز من بنات البيوت الكبيره ف بعت لها أيوب بن القِرية - وكان من فصحاء العرب - (كان بيحبه الحجاج اوى ومقربه منه بس قتله بعد كده ) 

المهم انه قال له: اخطب ليّ هند بنت أسماء، ولا تزد على ثلاث كلمات، فأتاهم فقال: أتيتكم من عند من تعلمون

والأمير معطيكم ما تسألون

أفتنكحون أم تردّون؟ قالوا: بل أنكحنا وأنعمنا. 

فرجع ابن القرّية إلى الحجّاج 

فقال: أقرّ اللّه عينك، وجمعٍ شملك، وأنبت ريعك؛ على الثبات والنبات، والغنى حتى الممات؛ جعلها اللّه ودوداً ولوداً، وجمع بينكما على البركة والخير

واتجوزها 

وبنى الحجاج قصر في البصرة 

وف يوم قال لها : هل شوفتى أحسن من القصر ده ؟ 

فقالت : ما أحسنه ! قال : اصدقيني 

فقالت : إذا كنت مصمم فوالله ما ماشفتش أحسن من القصر الأحمر وقصدها على قصر عبيد الله بن زياد ودا زعله 

فأمر ابن القِرِّية انه يروح  لهندَ بنت أسماء فيطلقها بكلمتين ويُمَتَعها بعشرة آلاف درهم

ودى الروايه الاولى عن طلاقهم  

اما الروايه التانيه فبيقولوا انه في يوم دخل عليها وهي بتبص فى المراية وبتقول:  

وما هند إلّا مهرة عربية 

سليلة أفراس 

تحللها بغل 

فإن ولدت فحلا فلله درها 

وإن ولدت بغلا 

فجاء به البغل

فزعل وخرج وبعت جاب ابن القِريه وش السعد بتاع البنين والبنات اللى نق له ف الجوازه وقاله بلغها انى طلقتها وباقى المهر (المؤخر يعنى ) اختلفوا فيه بردو فى قالوا ١٠ الالاف 

وفى قالوا ٢٠٠ الف 

والله تستاهل 

ما علينا متقروش ع الوليه دى تالت جوازه متعمرش فيها اهيه 

المهم ان ابن القريه راح وقال لها : إن الحجّاج بيقول لك: كنتِ فبِنْتِ، وهذه عشرة آلاف مُتْعة لك فقالت: 

قل له: كنا فما حَمدنا، وبِنّا فما ندمْنَا؛ وهذه العشرة الآلاف لك ببشارتك إياي بطلاقي

وبصراحه مش فاهمه ايه جو فوازير رمضان واخطبها ف ٣ كلمات وطلقها ف كلمتين 

طب ما لو قال :  انت طالق ماهى كلمتين بردو مش محتاجه فصاحه ولا بلاغة وتوريه 

المهم ان الست هند بعد ما اتطلقت من الحجاج جالها خطاب كتير 

بس هى كانت بترفض 

لاء متفهموهاش غلط مش علشان

يا حبيبتى .. مسكينه .. دى هتترمل عليه العمر كله علشان تربى العيال

و لا علشان خلاص شافت حظها ٣ مرات 

وتتكفى ع ال٣ عيال تربيهم و الكلام البائس بتاعنا ده .... ابسليوتلى 

دى بس مكانش حد مالى عينها منهم 

خصوصا ان ال٣ اللى  اتجوزتهم كانوا ولاه 

وفى بيقول ان محدش كان بيفكر يتقدم لها خايفين من الحجاج ونابه الازرق 

 

طب تعمل ايه ؟الارمله الطروب

والمطلقه اللعوب 

والمزه محطمة القلوب 

دا اللى هنحكيه الليله الجايه 

اصل الست هند دى كانت قويه ومفتريه وجمال انجلينا جولى ده كان مخبى جوه 

افترا نعيمه الصغير 

و كهن نعيمه وصفى 

وكيد نعيمه عاكف

واللى اللقاء ف الليله الجايه مع انتقام هذه الوليه هند 

للحجاج ومرمطه وتشفى غليلنا فيه شويه 

و اهه مش حرماكوا من حاجه ودخلنا جو السسبنس و مسلسل كيد النسا باجزائه

 

#ابتسام