#الحجاج_ج١٧#الليله٥١٤
#الحجاج_ج١٧
#الليله٥١٤
انس بن مالك خادم رسول الله
كان خادم لرسول الله صلى الله عليه وسلم من وهو صبى عنده ١٠ سنين اخدته امه الى الرسول صلى الله عليه وسلم وقالت له خد (أُنيس تصغير للتدليل خلى بالك من ده ) ابنى فهو غلام لبيب كاتب جيبتهولك يخدمك فادع الله له»
فقبله النبي صلى الله عليه وسلم ودعا له قائلاً: «اللهم أكثر ماله وولده وأطل عمره واغفر ذنبه»
وبيقولوا انه مات عنده ميه و حاجه سنه
وانه انجب كتير لدرجة
أنه ابتلي بفقد عدد كبير منهم، فمات من ولده وولد ولده ١٢٩ فرد قبل ما ييجى الحجاج للبصرة
ماشاء الله قدمه سال اخضر منهم ٨٠ وقيل ٧٠ في الطاعون اللي أصاب البصرة سنة ٦٩ هجريه
اكتر من ١٢٩ ولد وحفيد ماتوا ... امال فضل له كام🤔
تعالوا نتكلم عنه مع الرسول صلى الله عليه وسلم
ف مره بعته رسول الله صلى عليه وسلم يقضى طلب من طلباته
بس هو لقى الصبيه اللى من دوره بيلعبوا
ساعتها نسى نفسه ونسى امر الرسول صلى الله عليه وسلم له
ونسى كل حاجه الا اللعب
ولما غاب واستعوقه الرسول صلى الله عليه وسلم راح يدور عليه لقاه بيلعب قاله ما معناه شبعت لعب يا انس
يلا بقى روح اعمل اللى بعتك علشان تعمله
لا زعق ولا هان ولا عاتب حتى
خدم أنس بن مالك النبي مدة مقامه بالمدينة عشر سنين و عامله فيها النبي صلى الله عليه وسلم معاملة الولد وكنّاه أبو حمزة وكان بيخصّه ببعض أحاديثه وأحيانًا كان يناديه يقوله «يا بني» وما عاتبوش ابداّ ولا ضربه خالص على غلط
واستمر ف الجهاد من اول حروب الرِده حتى الفتوحات لحد ما استقر فى البصره
و لما قام بن الاشعث بالثوره على الحجاج ايده انس بن مالك لانه كان شايف ان الحجاج اد ايه ظالم ولازم حد يقف قصاده
بس دا معجبش الحجاج وف يوم نده لانس وقاله :
إيهٍ إيهٍ يا انيس
يوم لك مع على ؟
ويوم لك مع ابن الزبير؟
ويوم لك مع ان الاشعث؟
والله لاستأصلنك كما تستأصل الشاه
فقال انس أياى يعنى الامير اصلحه الله ؟
فقال الحجاج : اياك اعنى صك الله سمعك
وفى روايه اخرى ان اللى دار بينهم كان كألاتى
«يا خبيث،
جوّال في الفتن،
مرة مع علي،
ومرة مع ابن الزبير،
ومرة مع ابن الأشعث،
أما والذي نفسي بيده، لأستأصلنك كما تستأصل الصمغة،
ولأجردنك كما يجرد الضب»،
فقال أنس: «من يعني الأمير؟»،
قال: «إياك أعني، أصم الله سمعك»،
فقال أنس: «إنا لله وإنا إليه راجعون»،
فأمر به الحجاج فخُتم في يده وقيل في عنقه «عتيق الحجاج»،
الحجاج كان عاوز يذله باللى عمله ده
فخرج من عنده انس و قال : انا لله وانا اليه راجعون والله لولا الصبية الصغار ما إهتميت اى قتلة قتلت ولا اى ميتة مت
وخرج من عنده وبعت لعبد الملك بن مروان
وبعد السلام قاله ان الحجاج قال لى هجرا واسمعنى نكرا
فخذ لى على يديه
فانى أَمُت برسول الله بخدمتى له وصحبتى اياه ..
ف عبد الملك بعت ابن المهاجر وكان صديق للحجاج
يا ترى الرسايل دى فيها ايه ؟
وليه اختار واحد يكون صديق للحجاج بالذات ؟
تعالوا نعرف الليله الجايه
وعلى الصعيد الشخصى بقى الحمد لله عمر الشقى بقى
و ربنا بفضله وكرمه وبفضل دعواتكم ليا زاد من عمرى ليله كمان
مع انى كنت بفيص امبارح لدرجة انى قولت للاولاد
وانا هاجى ايه يعنى ف اللى موتهم الحجاج؟؟
وانا بقول انى بموت وكده لانى كنت شاكه انه اصلاً حالة تسمم
وكنت هاشك فى الحجاج انه بينتقم منى لانى بقالى اكتر من اسبوعين بنتش ف فروته ... لولا انى عارفه انه بيفضل السيف
الراجل دا
الراجل دا
الراجل دا ... نحسنى
#ابتسام
تعليقات
إرسال تعليق