#اول_اعلان_فى_التاريخ_قصيده_عربيه#الليله١٩٤

#اول_اعلان_فى_التاريخ_قصيده_عربيه

#الليله١٩٤

اغنيه جميله ومنتشره الفتره الاخيره 

وكلماتها بتقول 

قل للمليحة في الخمار الأسود

ماذا فعلت بناسك متعبد؟

قد كان شمر للصلاة ردائة

حتى وقفتي له بباب المسجد

فسلبت منه دينه ويقينه

وتركته في حيرة لا يهتدي

ردي عليه صلاته وصيامه

لا تقتليه بحق دين محمد

بلغوها إذا أتيتم حماها

أنني مت في الغرام فداها

واذكروني لها بكل جميل

عساها أن تحن عليا ... عساها

واصحبوها لتربتي فإنّ عظامي

تشتاق أن تدوسها قدماها

سمعت ابنى اللى فالجامعه بيسمع الاغنيه ومنسجم منها اوى 

طب يا حبيبى انت عارف السبب ف الاغنيه دى ايه ؟؟

قالى اه اغنيه عامله ترند عالى  وشبابيه جديده 

طب يا حبيبى كلمات الاغنيه دى عمرها حوالى ١٣٥٠ سنه 

الواد عمل 😳

طب تعالى نتكلم عن تصنيف كلمات الاغنيه 

قالى : عاطفيه زى ماهو واضح يعنى 

قلتله  لاء دى اول اغنية اعلانات   ف التاريخ  

وتانى كانت ال 😳😳

ولحقت الولد قبل ما يقولى هو طارق نور كان عايش من ١٣٥٠ سنه

ووضحت له 

 

الفكره ان كلمات الاغنيه دى كانت قصيده لشاعر اتولد ف عهد الخلافه الراشده ( يعنى ف عهد ابو بكر او عمر او عثمان او على )

ودا معنى الخلافه الراشده يعنى مولود ف عهد احد الخلفاء الراشدين 

وعاش ف الاعصر الاموى 

وكان اسمه ربيعه بن عامر الدارمى 

ودا مش علشان بيحب الدراما ولا بيلعب درامز زى احمد عز بتاع الحديد  ولكن نسبة لجده دارم 

وكان ملقب بالمسكين 

وكان مقرب من معاويه ثم ولده يزيد ودا كان مديله سلطه ومكانه 

وفلوس ومجمد قلبه 

وهو كمان بيقول شعر ولسانه حلو 

وزود كمان انه كان شاعر غزل  وفلاتى وبتاع ستات و من اللى بيدوبوا قلوب العذارى بكلامهم الحلو

وده كان مخليه غنى وواصل

وشعره ف الغزل  كان مخليه ولا  نزار قبانى زمانه 

المهم بقى انه كبر ف السن وتاب وربنا هداه وساب ده كله وتحول من الغزل والخمر و النساء و الكلام ده 

للعباده والصلاه والصلاح وجاور مسجد رسول الله صلى الله عليه وسلم ف المدينه المنوره

وفاتت سنين و هو  مجاور النبى عليه الصلاة والسلام 

وعاش ف المدينه المنوره

واتشهر عنه انه اصبح  من النساك الزهاد

وف مره قابل واحد تاجر  صاحبه من ايام ما كان عايش ف الكوفه ف العراق

وبعد السلامات والتحيات والسؤال عن الصحه والحال

اشتكاله صاحبه التاجر انه كان جاى يبيع اخمره عراقيه وكانت  كميه كبيره  جايبها من اللون  الاسود بس يا خساره مافيش ولا واحده رضيت تشترى الخُمر السوده 

وانه كده هيضيع وهيفلس 

واحلها ازاى يا صاحبى 

وساعتها سرعة بديهة المسكين نجدت صاحبه

وفساعتها انشده الشعر ده 

قاله قوله ف السوق ومش بس كده لاء دا بعت كمان طلب ٢ من المغنيين المشهورين بالصوت الجميل اسمهم سريح و سنان 

وقالهم غنوا الشعر ده 

وفعلا اشتهر الشعر 

ففى اللى قال مسكين الدارمى ساب الزهد والتنسك بعد ما وقع ف غرام واحد بتلبس خمار اسود 

وبدات الستات والبنات يتسابقوا فى شراء الخمر السوداء

وبقت موضه 

وخلصت البضاعه من عند التاجر 

واتغنى ورجع المسكين تانى لعبادته بعد ما  اطمن على صاحبه 

المهم ان الشعراء فى العصور التاليه لونوا القصيده على مزاجهم 

مثلاً ده : 

التنوخي وصاحبة الخمار المذهب 

قل للمليحة في الخمار المذهب  *  

أفسدت نسك أخي التقي المترهب

نور الخمار ونور خدك تحته  *  

عجبا لوجهك كيف لم يتلهب 

وجمعت بين المذهبين فلم يكن  *  

للحسن عن نهجيهما من مذهب

وده الحامدي وصاحبة الخمار المشمشي

قل للمليحة في الخمار المشمشي  *  

كم ذا الدلال عدمت كل محرّش

يا من غذا قلبي كنرجس طرفها  *  

في الحب لا صاح ولا هو منتشي

هذا الربيع بصحن خدك قد بدا  *  

لمقبّل ومعضّض ومخمّش 

سيبكم من الاخرانى دا متحرش وش دا غير انه معترف انه صعران 

المهم لونوا ف القصيده وخُمرها كما ارادوا 

ولكن يبقى الاسودِ ملك الالوان والقصائد 

وتوته توته خلصت الحدوته 

#اول_اعلان_فى_التاريخ

#طارق_نور_العصر_الاموى

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٩٤

#ابتسام