#الليله١٩٥#الطفل_المزعج

#الليله١٩٥

#الطفل_المزعج 

كان ياما كان ف دوله افريقيه زمان 

مدرس مصرى راح يعلمهم دينهم اللى كان اغلبه اسلامى انتشر ف قارة افريقيا من القرون الوسطى من خلال التجار المسلمين اللى كانوا بتعاملوا مع الافارقه بمبادئ الدين الاسلامى  ودا جعل الافارقه يحبوهم ويحبوا الدين الاسلامى 

وانتشر بينهم وتركوا عباداتهم الوثنيه وامنوا به من غير سيف ولا حروب

علشان اعداء الاسلام اللى بيقولوا الاسلام منتشرش الا بالسيف 

طب امتى قامت حروب ف افريقيا لنشر الاسلام

ولا كانت بتقوم ف الاستخوبس من غير ما نعرف لا إحنا ولا التاريخ عنها حاجه 

عموما مسلمين افريقيا اللى بالملايين بالمناسبه

كانوا محتاجين ناس اكثر درايه بدينهم يعلموهم دينهم وده اللى كان دور مصر فيه مهم ومستمر حتى وقت قريب

المهم نرجع لصاحبنا المدرس 

الاستاذ حسن راح البلد الافريقى الفقير  وهناك عرف انه هيروح مدينه فى اطراف البلاد وهيساعد انه يعرف المسلمين هناك قواعد دينهم وشرائعهم 

خلال رحلته كان هيعبر نهر عن طريق قارب متوسط الحجم هو وسيلة النقل الوحيده لعبور النهر والوصول لمكان عمله الجديد 

القارب كان قارب قديم متوسط الحجم يساع حوالى ١٥ ل ٢٠ فرد 

لاحظ صاحبنا المدرس ان صاحب القارب راجل كبير ف السن زى القارب بتاعه  وضعيف بيحرك القارب بصعوبه 

بيجدف بكل قوته بس كان ضعيف 

و ركب الناس ولكن من اول ما ركب 

حسن وهو كان من اوائل اللى ركبوا 

لاحظ ان فى طفل قاعد على الارض فى منتصف المركب متبت ف مكانه بطريقه غريبه 

ومصمم على التمسك بمكانه ده بطريقه اغرب 

الناس بتتكعبل فيه وبتخبط فيه وهو متمسك بالجلوس على الارض 

بعض الناس كانت بتبص له بغيظ او تكلمه بلغه استاذ حسن مش فاهمها بس باين انهم بيشتموا

فى بعضهم رفص رفصه صغيره او خبطه وهو بيعدى 

  كل ده والواد صامت صامد ولا بيرد ولا بيتحرك ولا بيأثر فيه كلام بثبات انفعالى يحسد عليه 

رزل بجد 

 

والراجل العجوز صاحب القارب بيشوف ده وساكت 

الاول قلت هيلوم عليه او يقومه او حتى يطرده من القارب 

بس مع تكرار تنقل نظراتى من المراكبى العجوز والطفل المزعج 

  

لاحظت الشبه الكبير اللى بينهم 

وخمنت انه ممكن يكون المراكبى جد الولد

وزاد استغرابى 

طب هو لو قريبه ساكت ليه وسايبه   كده يتخبط من الناس او يتشتم منهم 

ووصلت للضفه التانيه من القارب 

ولاحظت ان الناس بتنزل 

وتجنبا للتخبيط والتزاحم 

قررت استنى للاخر او يمكن لانى كنت عاوز استفهم من المراكبى الاسمر  العجوز 

 وكانت ملاحظتى للولد بتزود استغرابى وتعجبى الواد ما قامش من مكانه ولا بان عليه اى تأثر بوصول المركب اللصفه التانيه 

وقررت اروح للمراكبى اكلمه باللغه الفرنسيه اللى منتشره ف اغلب الدول الافريقيه السوداء او زى ما بنسميها ف مصر افريقيا جنوب الصحراء 

واتكلمت 

وزاد عجبى عاوزين تعرفوا ليه ؟؟

هاقول لكم بكره باذن الله 

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٩٥

#ابتسام