#الليله١٩٨#تاز_وماز_واللى_بتقفل_بالترباس_ج٢والاخير

#الليله١٩٨
#تاز_وماز_واللى_بتقفل_بالترباس_ج٢والاخير
طبعا الثعلب قال انا جيت علشان اكلكم 
وراح عند بيت الاخت الكبيره ماز 

اللى قالت له امشى انا قافله بيتى عليا كويس ومش هتقدر تاكلنى 

بس الثعلب خد شهيق (وامثل عملية الشهيق )

وعمل زفير 
( وامثل عملية الزفير )
مع ذكر لفظ شهيق وزفير علشان يتعلموا الكلمه ويسالوا يعنى ايه ؟
المهم ان التعلب  ... نفخ جامد 
ساعتها البيت القش اتهد و تاز كانت واقفه لوحدها بس قبل ما الثعلب ياخد نفسه من النفخه ويهاجم تاز كانت ماز فتحت باب بيتها ودخلتها جوه 

وراح الثعلب تانى وقالهم وماله هاكلكم انتوا الاتنين سوا 

وسحب شهيق ( وامثله ) ونفخ زفير ( وامثله)

وراح نافخ جامد وساعتها البيت اتهز جامد وموقعش 
بس لما خد شهيق اقوى ونفخ زفير جااااامد 

البيت وقع 

وكانت اللى بتقفل بالترباس واقفه ومتابعه وفتحت باب بيتها بسرعه 

ودخل اخواتها الاتنين 

وتانى راح الثعلب ووقف قدام بيت اللى بتقفل بالترباس 
ونده عليهم 

ومتستخبوش 
ومفيش عندكم مهرب تانى بعد ما اهد البيت ده

وطبعا فضل يسحب شهيق وينفخ زفير 
مره
مرتين 
٣ مرات 
وكل مره بيزود الهوا اللى بينفخه 
بس بردو مفيش فايده 

وف الاخر لما زهق فضل يخربش ف البيت من كل ناحيه 

وبردو البيت ولا اتأثر 

ساعتها بدا يتسلق البيت علشان يحاول يدخل من فوق السطوح 
كان فى فتحه صغيره عاملاها اللى بتقفل بالترباس علشان تجيب هو اتشعبط و حاول يدخل منها بس طبعا مدخلتش راسه حتى 
لكنه دخل بوقه منها وقال لهم .... مش هاسيبكم عاتهربوا منى فييين
واتشعبط للطلوع على السطوح 
بس السطوح مفيهوش الا فتحة المدخنه 

اللى بصلهم منها و قالهم مش قولتلكم مش هتفلتوا منى 

ونزل من المدخنه على جوه البيت 

بس اللى ميعرفوش الثعلب  ان اللى بتقفل بالترباس  اول ما جه 
كانت حطت طشت كبير مليان ميه على النار اللى تحت المدخنه 

فلما نط التعلب نزل على ميه سخنه بتغلى 

لسوعته 
وحروقته 
وسلخته

وخرج يجرى وينط منها
كانت تاز وماز ماسكين عصيان كبيره نزوا عليه بيها  طيخ .. طاخ .. طوخ

كانت اللى بتقفل بالترباس  

المرادى بتفتح الباب والترباس وخرج الثعلب يجرى 
يصوووووت 
ويعيط 

وحلف ما يروح عند بيتهم تانى

ساعتها قعدوا مع بعض وكل واحده تقول للى بتقفل بالتراس طول عمرك شاطره 

وقالت تاز فاكره يا ماز لما كنت بكتب الواجب بتاع الانجليزى بسرعه من غير ما احفظ وهى كانت تحفظ كل الكلمات وانا اجيب صفر وهى تجيب الدرجه النهائيه كل يوم 

وقالت ماز اه فاكره وفاكره لما كانت تنام بدرى واحنا نفضل سهرانين وهى تبقى الصبح فايقه ف المدرسه وترجع نشيطه وتساعد ماما واحنا تعبانين ف المدرسه ونرجع نأخر الواجب

ونحط بقى كل التصرفات اللى بتزعلنا من ولادنا ف تصرفات تاز وماز 
والصفات والتصرفات اللى نفسنا يعملوها كانت بتعملها اللى بتقفل بالترباس

#ذكريات_اولاد_اخويا_مع_باباهم_الله_يرحمه
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١٩٨
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد