#نونونونو_ج٣#الليله٥٤٦

#نونونونو_ج٣
#الليله٥٤٦
كبرت القطاقيط وبقت ولادنا بس فجأه كده
الست ميلسا الدلوعه بطلت تاكل واحنا بقى معلومتنا ف تربية القطط زيرو وطبعا و لا فى نت ولا اى مكان تاخد منه معلوماتك الا الكتب والجرايد والمجلات و دى اه عندنا منهم كتير اوى بس مفيش فيهم كلام عن تربية القطط وعدى يوم والتانى وهى عماله تخس وهى اصلاً ياروحى هى صغيره وانا مش عارفه اعمل ايه معاها ولا في بيطريين ولا اى حد له ف الموضوع يعنى خالص
لحد ف اليوم الرابع لما لقيناها ميته خلاص 
مأساه لانها كانت لطيفه وشقية وهريانا تنطيط وجرى على ضهرنا اول ما نروح لشباك ولا بلكونه وبعدين تقعد على كتفنا مستكنيصه ونبقى واقفين ف البلكونه وهى على كتفنا زى البغبغان بتاع كابتن هوك القرصان
ولكن كل دا راح ومفضلش معانا الا كونتاكنتى التقيل الشمالى الشرقى زى امه انجيلا 
وعدت فترة الحزن على ميلسا 
ولكن فجأه كونتاكنتى حصل له نفس  اللى حصل لاخته 
وابتدى يمتنع عن الاكل يوم وساعتها حسيت باقتراب الخطر 
ومازلت قليله الحيله ومفيش اى توجيه طبى ممكن احصل عليه 
وهنا شغلت دماغى واشتغلت الفطره 
هى ماتت علشان مكانتش بتاكل 
يبقى هو لازم ياكل ولو غصب عنه
وابتديت ادور على اكل مغذى وسهل الهضم من وجهة نظرى 
وبتديت اجيب لبابه الخبز واسقسقها ف سمنه واحطها له ياكل 
بس هو مش بياكل 
علشان كده استرجعت ذكرياتى القريبه وانا شايفه جارتنا بتزغط دكر البط
وعنها وكنت اقعد واحطه بين رجليا واحاول افرمل مخالب رجليه اللى عملت بنطلونى ولحمى من تحته شاورمه
وامسك ايديه بايد وازغطه بالايد التانيه باللبابه اللى كنت بخليها مبرومه و عامله زى عقب السيجاره كده وازغط وهو يخربش ف رجليا ويعضعض ف صوابعى 
وهو يفلفص ويقطع فيا
دا غير اصوات الوزمان و الرفض للقيود اللى بتتميز بيها اى قطه 
كام يوم والاكل عمل نتيجه ومضعفش زى اخته 
وبقى ياكل زى القرد لوحده 
خف  عاش وانقذت حياته بعد فضل ربنا
وكنت بحس انى امه 😂
بس لما كبر حبه مشى من عندنا وبقى قط شوارع زى امه واما بقى يقابلنى ف الشارع يتجاهلنى وميعرفنيش كنت بقوله يخونك العيش والسمنه 
اتجوزت وبعدت وكنت بعدها بسنين اشوفه لما اروح لماما 
بس كان متبهدل تقريبا بقى اعور زى كابتن هوك 😂😂😂 ومش بعيد انه ادمن وبقى شمام سمك وبيضرب حقن ماكس 😂😂😂
اتعلمت كتير من القطط دى وامها 
بس زعلى على موت ميلسا وغدر كونتاكنتى خلانى مفكرش اربى قطط تانى 
لحد رمضان قبل اللى فات لما دخل محمد ابنى ودخل معاه شرنوبى حياتى
هو مش شرنوبى حياتى قصدى شرنوبى دخل حياتى عموما شرنوبى بقى جزء مهم من حياتى 
لو حابين اكمل الليله الجايه و احكى عن شرنوبى صاحب المِلك اللى كتر خيره آوينا عنده فقولولى ف الكومنتات  
وانا احكى الليله الجاية اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٤٥
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد