#الطفل_المزعج_وافريقيا_السمراء٤#الليله٥٤٨

#الطفل_المزعج_وافريقيا_السمراء٤

#الليله٥٤٨

كمان كلمنى الحاج احمد الافريقى الطيب صاحب القارب اللى كا يعتبر المعديه الوحيده ف البلد عن الاستعباد اللى كان بيتعمل فيهم ف المزارع اللى بيعملها السيد الابيض ف مستعمراته  ودا للى كان بيقرر انه  يستقر ف افريقيا 

بس على قد الوجع ده الا ان كان فيه من الاوربيين البيض فى ناس طيبين والكارثه كلها كانت من الحنينين الطيبين اللى كانوا جايين يعالجوا ويعلموا بس كان عندهم شرط بسيط ... كانوا بيشرطوا عليهم علشان يعالجوا او يتعلموا انهم يتركوا دينهم 

ومن اكتر القصص اللى كانت بتوجع الحاج احمد وتوجعنى هو لما كان بيحكى عن عمته فاطمه اللى علشان ترضى البعثات التبشيريه تعالج ابنها مريض الكساح انها تعلن فى حفل جماعى تعيير اسمها لكاثرين وما يتتبع ده من تغيير ديانه

ف سام او صامويل اصلا كان مصطفى 

وفى اللى كانوا بيخفوا حقيقه دينهم الاسلامى ويعبدوا ربنا فى السر علشان يفضل امداد الطعام او العلاج او التعليم ف مدارسهم التبشيريه 

فماريه هى زينب وتريزا كانت عائشه

وللاسف فى كتير منهم مع الزمن ومع كتر اللى بيتعلموه كانوا بيتحولوا فعليا لغير الاسلام

وفى اللى بيحافظوا على دينهم ولكن مع قلة الوعى وعدم وجود مساجد ومعلمين ومشايخ اكفاء كان اسلامهم ضعيف متهرئ

الحاج احمد حكالى عن ان هو حاليا مش عارف نية المبشرين كانت سليمه 

فى النهايه هم بيعبدوا الله وبيحاولو ينشروا دينه اللى بيؤمنوا به ويمكن اختلاف اللغه خلتهم مفهموش اننا بردوا مؤمنين بدين سماوى 

ويمكن الفقر والعوزه  خلتنا احنا الافارقه نوافق على اى شئ مادم اللى بيقدمه بيقدم معاه الاكل والتعليم والمية النضيفه والعلاج

يمكن بُعد البلاد الاسلاميه اللى معذوره لانها كانت مش افضل منا حالا مع الاحتلال لانهم محتلين زينا 

بس حظكم ان عندكم الازهر والحرمين والمشايخ وعلماؤكم اللى مهما الاحتلال عمل مسابوكوش لتحويل دينكم زينا 

كنا اضعف 

كنا افقر 

كنا اكتر اعتزالا عنكم بحكم اللغه

وتأثير الاحتلال 

مين كان السبب ؟

كل ده كان السبب

وتذكرت ساعتها حديث الرسول صلى الله عليه وسلم 

 (( يأتي زمان على أمتي القابض على دينه كالقابض على جمرة من النار ))

وقلت له انتوا عيشتوا الزمن دا يا حاج احمد 

قالى والله يا بنى  واكتر بس بفضل الله 

ربنا نجا الاسلام فى صدورنا بفضله تعالى وفضل ناس افاضل 

ساهموا ف تعويض الافارقه 

زى مين اسمحولى نتكلم عنهم الليله الجايه 

حيث ادرك ابتسام المنام 

ففصلت كهربا وقطعت كلام 

فنكمل الليله الجايه 

وتصبحوا على خير وسلام  

وزى ما قلت المرات اللى فاتت 

اعتذر لو الحكايه لسه ما خلصتش وصدقونى لما هتوصلوا لنهايتها هتقولوا هاه وبعدين احكى حكايه جديده علشان كده للى بيحبوا قرأة المزيد ادخلوا الصفحه وتجولوا فيها  

او اكتبوا الهاشتاج #الليله 

وجنبه اى رقم اقل من٥٣٨ 

هتقراوا لما تزهقوا .. دا لو فاضيين اما لو مشغولين زيى فاكيد هتعذرونى

 

#فوتكم_بعافيه_وعفو_ومعافاه

#ابتسام