#وشها_مكشوف#الليله٥٣٩

#وشها_مكشوف

#الليله٥٣٩

لما بنحكى عن واحده جريئة وبتتعامل بطريقه تخلوا من الحياء

بنقول عليها اصلها وشها مكشوف

  

الكلمه دى شغلتنى 

وقولت ادور على اصلها وفصلها يمكن تكون وراها حكايه ولكن مفيش تفسير

وهنا اضطريت اقوم من على كنبتى واروح اجيب دلوى ( جردلى) علشان ادلى بدلوى ف الموضوع ده

زمان كان الستات بتخرج من بيوتها مغطيه وشها 

زى ما بنعمل كده دلوقتى بالكمامه

بس احنا بنغطى وشنا بسبب الخوف من الكورونا والخوف من العدوى 

بس زمان الستات كانت بتخرج مغطيه وشها بالبيشه واليشمك والبرقع بسبب الخوف من ربنا او الحياء من المجتمع وان الرجال الغير محارم لها يشوفوا وشها

بس كان فى نوعية من الستات

ممكن تقول جريئه ولا بجحه ومبيهمهاش و لا كانت بتخاف و لا بتتكسف ولا بتستحى 

لان هى عاجبها شكلها وعاوزه الناس كلها تشوفه وتعجب به علشان كده بتكشف وشها وهى بتتكلم 

ودا طبعاً غلط وعيب خصوصا لو اتبع كشف الوش لين ف الكلام وترقيق ف الصوت ودا ربنا نهانا عنه 

وقال ف سورة الاحزاب 

(فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا (32) وَقَرْنَ فِي بُيُوتِكُنَّ وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ )الاحزاب ٣٢،٣٣

وبالتالى اللى كشفت عن وشها وهى بتتكلم مع الرجال الاغراب عنها بتعمل عكس ما ربنا امرنا 

وبالتالى هى مستهجنه ولما تيجى سيرتها بيتكلموا عنها باحتقار

وعدت سنين وكل الستات ماعدا المنتقبات كشفوا وشهم 

بس مازالت الست المحترمه محترمه وهى مش لا بسه بيشه ولا برقع و لا يشمك ولا نقاب 

ومازالت اللى بتتكلم بجرأه مع الرجال بلا خفر ولا حياء وتخضع ف القول او تتكلم في مواضيع لا يجب ان يدور الكلام فيها مع الاغراب عنها من الرجال بيتقال عليها وشها مكشوف

افتكرت دلوقتى مصطلح تانى ساعات بيتقال  بيبين اللى اقصده اكتر ودا لما بنقول دلوقتى ((دى قلعت برقع الحيا )) مع ان مفيش حد بيلبس برقع دلوقتى بس دا بيكون تعبير مجازى عن الجرأه والبجاحه

فى الصور تحت 👇 برقع و بيشه ايشمك ونقاب 

كالعاده الحاجات اللى بقول فيها رأيى الشخصى الغير مدعم بادله غيرش بس المنطق اللى اتبعته فانا ارجو اى حد يلاقى خطأ يصوبنى 

ف النهايه دا اجتهاد اصيب واخطئ شئ وارد 

ولو حد عنده دلو الموضوع ده يدلى ف النهايه 

ادينا قاعدين نتكلم وهو الكلام هيخلص

ومتنسوش لو حابين تقرأوا حاجه تانى من عندى 

اكتبوا الهاشتاج #الليله 

وجنبه اى رقم اقل من٥٣٩ 

هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

 

#فوتكم_بعافيه_وعفو_ومعافاه

#حكايه_ورا_كل_مثل

#ابتسام