#نونونونو_ج٢#الليله٥٤٥

#نونونونو_ج٢
#الليله٥٤٥ 
حكيت الليله قبل اللى فاتت على القطط اللى سكنوا تحت سرير ماما واكتشفتهم باصعب طريقه لما ردوا عليها النونوة اللى كانت بتخوف بيها ابنى ولقت اللى بيرد عليها😂😂😂
و بيتنا بحكم انه ف الدور الارضى و بالتالى كان متاح لكل حيوان بيعيش ف الشارع وكان اكتر سكان بييجوا عندنا القطط اللى كل فتره والتانيه نلاقيهم ولدوا ف الشقه وماما تقوم بدور الضيافه لحد ما الام تسبع ونرش لها الملح سبع مرات والكتن يفتحوا اوم بعدها تسربنا انا واخويا لاننا متمسكين انهم هديه ربنا بعتها لنا واننا هنكون مسئولين عنهم وبلا بلا بلا واللى ماما عارفه انه كلام اونطه و هيرسى ع الفاضى وهى اللى هتلبس تربية قططين  تانيين غير قططها اللى هم انا واخويا 
فتقنعنا ان دول قطط شوارع وان حياتهم احسن لهم ف الشارع
وطبعا منقتنعش فنروح نجيب الفطار نرجع نلاقيهم اختفوا 
بس فى مره واحده كانت شخصيتنا قويه واتمسكنا بالقطط اللى اتولدوا ف بيتنا كنا كبرنا و كنت بقيت ف الجامعه 
فلما جت انجيلا وولدت عندنا ٢
بنت سميناها ميلسا وولد هو كونتاكنتى 
 
حكايتهم ايه ؟
وايه سبب الاسماء دى ؟
سبب الاسماء اننا كنا متبعين مسلسل امريكى مكسر الدنيا اسمه فالكون كريست 
او قمة النسر 
كانت شريرة المسلسل المسيطره على مقدرات الكل هى الام انجيلا اللى هي كانت جميلة هوليود ف التلاتينيات والاربعينيات جين وايمن  والقرشانه ف التمانينيات والشريره قوية الشخصيه ف المسلسل المهم القطه اللى ولدت عندنا كانت قويه ومفتريه فسميناها انجيلا على اسمها جين فى المسلسل 
وكانت فى بنت عسوله ف المسلسل يقال لها ميلسا فكان دا اسم القطه الدلوعه بنوتتها 
اما الولد ودا كان لونه رصاصى غامق فسميناه على اسم كونتا كنتى بطل مسلسل جذور واللى كان حاجه عظيمه جدا ف وقتها وكان كل بيت بيتابعه
وابتديت اهتم بالام و طفليها 
اللى بدأوا يكبروا قدام عنينا
واجمل ما كان ف الموضوع هو متابعتنا لتربية امهم لهم
اللى هى انا قطة شوارع ومخربشه ولازم ولادى يطلعوا زيى ويعرفوا يتعاملوا مع الحياه 

كنا كلنا فاكرين ان دور الام ف القطط انها تكبر وترمى 
بس انجيلا كانت قبل ما ترمى بتعلم وتربى 

مثلا اول ما بدأوا يكبروا شويه قد شهر او ٤٠ يوم كده بدات تاخدهم الحمام
ونشوفها وهى بتشمشم ف مكان معين وبعدين تخربش بايدها  وبعدين تقعد تعمل انها بتعمل حمام
الولد كان مطيع يروح ويقلد
الدلوعه ميلسا كانت تفضل تلعب وتتنطط وتحاول تلاعبهم وتمسكهم من ديلهم عاوزاهم يجروا وراها
وما يكون من انجيلا الا انها تضربها على راسها ضربات خفيفه وهى ضامه مخالبها اللى بيها تأدب ومتعورش😉
ومره تانيه تاخدهم تعلمهم الشرب واللى طبعا احنا سايبين لها مكان فيه ميه فتاخدهم وتعلمهم الشرب 
واحيانا بحكم اننا بنسهر نذاكر وبحكم سكنا ف الارضى فكان الوقت الافضل لتهوية الشقه هو وقت الشروق والشوارع فاضيه
ودا كان الوقت المثالى لانجيلا انها تاخدهم فى جولات سياحيه خارج الشقه تعرفهم ازاى يجيبوا اكلهم من الشارع
وكالعاده ميلسا سارحه تلعب وتتنطط وانجيلا تروح وراها تمسكها من رقبتها وتشيلها وترميها على ورقة السمك اللى ف الشارع
وتانى تدفس مناخير بنتها ف الزفاره علشان تعرف ان ده الاكل 
كان الدرس الواحد ميقلش عن ربع ساعه
وطبعا مش عاوزه اقولكم اننا سايبين مذاكرتنا وواقفين مستخبيين عمالين نتفرج
فضلت تعلمهم الاساسيات دى فتره كده حمام وشرب واكل ونضافه 
وبعد كده لما وصلوا لسن الشهرين كده سابتهم وتقريبا بطلت تيجى عندنا البيت خلاص حتى لما تيجى ويشوفوها ويجروا عليها تسيبهم وتتجاهلهم
لو كانت القطط في عندها بوصله شخصيه ف انجيلا دى شماليه شرقيه 😠
بس فجأه كده حصلت مأساه عندنا 
ياترى ايه اللى حصل ؟
لو حابب تكمل انا الليله الجايه هاحكى اللى حصل اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٤٤
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد