#نونونونو_ياترى_مين_اللى_بينونو🤔؟#حدوته_من_حواديت_الرعب #الليله٥٤٣

#نونونونو_ياترى_مين_اللى_بينونو🤔؟
#حدوته_من_حواديت_الرعب
#الليله٥٤٣
الحكايه دى حصلت من زمان من اكتر من عشششششرييييين سنه 
بصوت اشرف عبد الباقى كده 
كنت بروح شغلى واسيب ابنى سِنه سنتين تلاته مع والدتى الله يرحمها .. صحتها على قدها اه ... بس مرضيتش اوديه حضانه 

كانوا ببيقوا ف الشقه لوحدهم تماما يفطروا وتلاعبه شويه وبعد كده تاخده يناموا شويه لقرب ميعاد رجوعى 

ساعات طبعا يزمزء ويرفض ينام 

فكانت بتطفى النور تدخل الاوضه وتقوله يلا ننام يااحمد .. يلا القطه جايه .. يلا بسرعه ع السرير
وتقلد صوت القطه وبتنونو علشان يصدق 

بس المرادى هى تنونو وتلاقى النونوه اللى بترد عليها 🤨

الاول افتكرت انها بيتهيألها🤔 

بس لقت الولد بيقولها القطه 🤫
وهو مستغرب يعنى ابن اللئيمه عارف انها هى اللى بتعمل النونوه كل مره وبيعديها ويعمل مصدق وبدخل ينام 😂😂 

بس المره دى فى غيرها بينونو معاها علشان  كده  إتفاعل مع انه كان قبل كده بيبقى عادى 

سكتته ونونوت تانى وساعتها لقت اكتر من صوت نونوه بيتردد معاها ف الاوضه🤕 
بسم الله الرحمن الرحيم 
هو اللى بعمله ف الواد هيطلع عليا ولا ايه ؟😈😈😈👻👻👻
مامتى الله يرحمها كانت دايما بتتباها بشجاعتها وانها ما بتخافش  
وانا مازلت بتباها بكده وانى اتعلمت دا منها 
المهم ان ماما مش لوحدها دلوقتى وايا كان الموجود   ففى طفل مالهوش ذنب وممكن يتلبس 
دا لو كان فيها بسم الله الرحمن الرحيم👿 
علشان كده ماما اخدت ابنى وطلعته عند جارتها ورجعت ع الاوضه تكرر تانى صوت النونوه وتسمع الرد عليها 

ولما رجعت حكتلى اللى حصل 

قالتلى والضحكة ماليه وشها اسكتى مش فى قطه ولدت تحت السرير بتاعى ومعرفتش الا لما بقلد صوت القطه وبنيم احمد لقيت اللى بيرد عليا 

اتاريها بعد ما ودت الولد لجارتها رجعت ف الاوضه تتبعت الصوت اللى مبيظهرش الا لو هى نونوت لحد ما رفعت المراتب والمُلل ولقت القطط الصغيره اللى لما كانت بتسمع صوت امى بتفتكر انها امها جت علشان ترضعها 

واحنا اللى كل ما كنا بنشوف امها نطردها وهى مستقتله تدخل عندنا 

من ساعتها سيبناها تدخل و تخرج براحتها لحد ما النن كبرت وطردنا العيله كلها😹😹😹

وطبعا دا كان دأب ماما الله يرحمها اول ما القطط تكبر حبه وممكن تعتمد على نفسها  تسربنا الاول نجيب فطار انا وفؤاد اخويا وبعدين تسرب القطط 
بس المرادى انا كنت مأيده التسريب ده ... اصلها يا حبيبتى كانت لا حمل قطط ولا تعرف تشيل مسئوليتها 
كفايه عليها ابنى واللى كان عامله فيها 
من غير مناسبه نزلت شوية صور من النت لقطط اغلبهم كتن لسة نونو مالهمش علاقه بالموضوع بس عسل
عموما مش علطول ماما الله يرحمها كانت حارمانا من القطط كان فى مره واحده كانت شخصيتنا قويه واتمسكنا بالقطط اللى اتولدوا ف بيتنا
بس دا كان قبلها بكذا سنه كنت لسه ف الجامعه وجت انجيلا وولدت عندنا ٢ولد  كونتاكنتى وبنت ميلسا اللى علمونى حاجات كتيره اوى عن القطط  
حكايتهم ايه ؟
وايه سبب الاسماء دى ؟
دى حكايه يمكن احكيها الليله الجايه اذا احيانا ربنا وكنت من اهل الدنيا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٤٣ 
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد