#جلد_النمر_ج٢ #الليله٥٣٨
#جلد_النمر_ج٢
#الليله٥٣٨
راح النمر🐯 اما يشوف ايه الراجل ده؟🧔🏽
وايه قوته الجباره اللى بتخوف كل الحيوانات وتخليها تهرب منه؟
ويعرفه انه مش اقوى حيوان ولا حاجه
وان النمر هو اللى هيعرفه غلطه وهيعلم عليه
وفضل يسأل اللى يقابله من الحيوانات
ويسأل لحد ما قالوله هو اللى تحت الشجرة الكبيره اللى هناك
وقرب من الشجره
بس استغرب 🤔
ايه الفسل الصغير ده ؟
هو ده الراجل ؟
لاء ... مش معقول ؟
بقى انا مشيت المشوار دا كله و لما اجى يكون الراجل مشى؟
بس ساعتها كان فى ارنب جنبه ... قاله لاء هو ده الراجل
واستغرب النمر اكتر 😳
هو دا بقى الرااااجل؟
وراح عنده
كلمه وف الحدوته بتاعتنا الراجل بيفهم لغة النمر والنمر بيفهم لغته
وقاله بقى انت بقى الراجل اللى بتأسر الحيوانات وتستعبدهم يعملوا لك اللى انت عاوزه ؟
رد الراجل اللى ارتبك ف الاول بس استعاد رباطة جأشه (والنبى بحب الكلمه دى سيبيونى اقولها بتحايل عليكم بصوت هنيدى)
ورد الرجل على النمر وقاله : ايوه انا الراجل
لك شوق ف عاجه ؟؟
رد عليه النمر وقاله : اه
انا جيت علشان اثبتلك واثبت لكل الحيوانات انى اقوى منك
والاخر لازم اعلمك واعلم عليك
انا شايفك سُفيف كده وضعيف ممكن تقولى ازاى بقى تأسر الحصان والجمل والفيل وتشغلهم عندك
رد الراجل وقاله بشغلهم عندى بقوتى
قاله النمر هى فين قوتك دى ؟
انا مش شايف ايتوها قوه
قاله الراجل ما انا سايب قوتى ف البيت
لو تسمحلى اروح اجيب قوتى وارجع نتصارع؟
ونشوف مين فينا الاقوى؟
قاله النمر ماشى بس متتأخرش ولا تهرب
ضحك الراجل بثقه قاله : انا اهرب ... انا مش ممكن ابدا اهرب
دا انا عارف انك انت اللى هتهرب قبل ما اجى
رد النمر : وقاله انا؟
لاء طبعاً استحاله اهرب
رد الراجل قاله لاء هتهرب
قاله ياعم مش هاهرب
رد الراجل قاله عاوز تثبتلى؟
النمر قاله ايوه
قاله اربطك بالحبل ده ف الشجرة دى علشان اضمن انى الاقيك اما ارجع
رد النمر وقاله اربط براحتك
كله هيطلع على دماغك اما اصارعك وانتصر عليك
مسك الراجل الحبل والنمر سايبه يكتفه ف الشجره بإستسلام وثقة ف النفس
كتفه الراجل وفجأه مسك فروع شجره من اللى حواليه وحطها ف النار و ابتدى يلسوع بيها النمر اللى اتاخد على خوانه
وابتدت الفروع المشتعله تسيب علامات ف جلده مكان ما الفروع بتنزل بتحرق الشعر الابيض اللى تحتها وتحوله لبنى
ومن يومها والنمر جلده اصبح مليان خطوط بنى عباره اثار الحرق اللى حرقه الراجل على شعيرات جلد النمر
وعاش النمر بالعلامات اللى علمها عليه الانسان وبقى هو اللى متعلم عليه من الراجل
اللى فضل يشغله عنده زى الصوره كده لحد ما صعب عليه وسابه يرجع تانى يعيش ف الغابه بس وهو على جلده وجلد ذريته من بعده نفس العلامه
علشان مينساش نفسه بعد كده
ومتنسوش لو حابين تقرأوا حاجه تانى من عندى
اكتبوا الهاشتاج #الليله
وجنبه اى رقم اقل من٥٣٤
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
#فوتكم_بعافيه_وعفو_ومعافاه
#ابتسام
تعليقات
إرسال تعليق