#سلسلة_عضة_اسد_ولانظرة_حسد٣#شمشون_الجبار_ج٦#الليله٢٢٥
#سلسلة_عضة_اسد_ولانظرة_حسد٣
#شمشون_الجبار_ج٦
#الليله٢٢٥
قولنا الليله اللى فاتت ان شمشون خلاص اتذل بعد ما ضاع منه كل حاجه ودا خلاهم يستغلوه يشغلوه اشغال شاقه ماشى
يدور طاحونه ميضرش
وان كان ميمنعش بردو من شوية سخريه وتريقه وفكاهه
والليله دى الفلستيين بيحتفلوا بعيد الاله بتاعهم داجون عملوا احتفال كبير فيه كل كبار البلد و فى الساحه اللى فوق سطوح المعبد اتجمع اهل البلد كلهم علشان يحتفلوا
وزى ما قولنا شمشون بقى الحاجه اللى بيتعاجبوا بيها ويضحكوا عليها
و هاتوا بقى شمشون الضعيف الضرير نتمسخر عليه شويه ونلعب به حبه
واتجرجر شمشون وهو ضعيف و مقيد واعمى ... من الاخر عاجز من كله
بس استنى كده ...
شمشون تاب لما حس بخطيئته مع ربنا انه عصاه ...
شمشون تاب وربنا غفور رحيم
شعر شمشون كمان طول
وبالتالى ربنا رجع لشمشون قوته ورجع تانى شمشون الجبار
بس لسه شمشون اعمى
شمشون طلب من الغلام اللى ساحبه انه يخليه يسند ايديه على العمودين اللى بيرتكز عليهم المعبد
شمشون سند ع العمودين وبكل قوته ومال وهو بيقول :
لتمت نفسى مع الفلستيين
** او زى ما بنقول عليا وعلى اعدائى يا رب
** او هد المعبد على دماغه ودماغ اللى حواليه ... زى ما بنقول بردو
مات شمشون ويقال ان اللى خدهم معاه ف موته اكتر من اللى موتهم ف حياته كلها
وتوته توته خلصت الحدوته
💪💪💪💪💪💪💪💪💪
ودا بالنسبه للناس اللى بتحب تعد السطور
اما اللى بيدوروا ع المعلومه ففى كلام كتير تانى اختصرته ممكن اقول بعضه هنا
واكمل ف الكومنتات لو فى سؤال و كنت عرف اجاوبه
1 -- اول حاجه موضوع العوده للوطن ربنا ذكرها اكتر من مره ف القرآن منها بوضوح قصه طالوت وجالوت وسيدنا داوود فى سوره البقره
من الايه 246 الى الايه 251
او ف قصه الذى مر على قريه (العزير ) بدون توضيح
فنفس السورة البقره
2 -- كمان شمشون كان من سبط يهوذا احد ابناء سيدنا يعقوب الاثنا عشر اللى ف حلم سيدنا يوسف
اللى لما عدى حوالى ٣٠٠ سنه تقريبا كانوا كتروا وبقوا بنى اسرائيل اللى زادوا وكتروا بس لسه بيقسموا نفسهم 12 فرع (سبط )
علشان كده ربنا أمر سيدنا موسى فضرب الحجر فانفجرت من اثنا عشره عينا
3 -- مرات شمشون الاولى كانت مضطره انها تعرف منه سر الاحجيه لانهم هددوها بقتل ابوها
4 -- انما دليله ... ظلت رمز للخيانه والخديعه وكمان الجمال اللى بيستخدم ف الشر ((خضراء الدمن وهى المرأه الحسناء فى منبت السوء )) كما قال صلى الله عليه وسلم
واستخدم اسم دليله بعد كده كرمز للدهاء والخديعه بردو زى ف الف ليله دليله .. دليله النصابه وبنتها زينب الكدابه ... و فى قصه على الزيبق من التراث العربى
اخر حاجه اللى اتعلمته من القصه دى
امشى ورا ربك تكسب
امشى ورا رغباتك تضيع
امشى ورا ابوك وامك تكسب
امشى ورا حرمه ..
حرمت عليك عيشتك😂😂
وختاما انتوا فاهمين اتنين مالهمش امان ...
الفرامل .... والعيل الفلتان
واللى هيجيب سيرة النسون😂 بصوا ... هو اللى ندمان
وبكده نقدر نقول توته توته خلصت الحدوته
#سلسلة_عضة_اسد_ولانظرة_حسد٣
#ابتسام
تعليقات
إرسال تعليق