#ان_غداً_لناظرة_قريب_ج٣_#الليله٥٧١
#ان_غداً_لناظرة_قريب_ج٣_
#الليله٥٧١
بس اللى حصل ان النعمان حِزن حُزن جامد اوى اوى خالص على حنظله وبأن هيكون مصير الراجل اللي أكرمه ده هو الموت .... يا حرام😒
حونين اوى يا نعمان وقلبك رُهيف
طب ما تلغى الحكم يا جدع انت هو فى حد حط القرار المتخلف دا غيرك يا نعمان
بس لاء هو قال لحنظله :
يا حنظلة هلا أتيت في غير هذا اليوم؟
قال حنظلة :
أبيت اللعن لم يكن لي علم بما أنت فيه
يعنى النعمان بيقوله : ايه اللى جابك ف اليوم الاغبر ده يا منيل ابقوا اقروا عن معنى منيل من هنا👇هتعجبكم
حكاية اتنيل جتك نيله
https://www.facebook.com/102264164820545/posts/236534718060155/
فكان رد حنظله انا راجل جزمه وأستاهل ضرب الجزمه انى جيت لك وصدقتك
قال له النعمان بن المنذر :
فاطلب حاجتك من الدنيا وسل ما بدا لك فإنك مقتول
يعنى اطلب اللى تطلبه اكديه ميت واكديه ميت
فقال له الاعرابي :
أبيت اللعن وما أصنع بالدنيا بعد موتي؟
فأجلني حتى أعود إلى أهلي فأوصي إليهم وأقضي ما علي ثم أنصرف إليك
طب سيبنى ارجع لاهلى احل مشاكلى اللى كنت فيها قبل ما اجيلك واوصى اهلى وبعدين ارجعلك
قال له النعمان :
فأقم لك كفيلا
يعنى هات حد يضمنك مضمنكش ياض بصوت اللمبى كده
رد حنظله : يا أخا النعمان يكفيك اليوم عن شيخ كفالة ابن شيبان كريم أنعم الرحمن باله و ابن شيبان ده كان وزير النعمان وبينه وبين حنظله سابق معرفه فقال دا يضمنى
وهو واثق كده ف ابن شيبان
ولكن أبن شيبان دا رفض أنه يكفله وياروح ما بعدك روح
وخلاص كده يا حرام حنظله هيموت دلوقتى ويسيب مراته وعياله لان مفيش حد قال اضمنه
ولما اسودت الدنيا ف عنين حنظله
ظهرت النجاه على يد قراد بن أجدع الكلبي ودا كان واحد قاعد وشاف اللى بيحصل وصعب عليه حنظله فضمنه
واعطى النعمان فلوس كتيره لحنظله
علشان يسدد ديونه ويسيب منهم لولاده تسندهم على حوادث الايام اللى هتعدى عليهم وهم اطفال بلا اب
وداله كمان سنه مهله ويرجع فى اخرها
وعدت الأيام.. و فاتت السنه هوا
واهو جه اليوم الموعود
بس ف اليوم اللي يسبق معاد رجوع حنظلة اللى من طيٍّ النعمان بعت وطلب قراد وقال له
ما أراك إلا هالكا غدا
ومعنى الكلام
يعنى خلاص يا قراد هتنقرض بكره من على وش الدنيا ويكأنه شمتان النعمان الواطى
فرد قُراد وقال :
فإن يكُ صدرُ اليوم ولى
فإن غدا لناظره قريب
وهنا اتقال المثل اللى عمالين نحكى الحكايه الطويله العريضه دى علشانه
وبكده توته توته خلصت الحدوته ...
ادينا قولنا المثل والسبب اللى قيل فيه ومناسبته وكل حاجه
ايه مش عاجبكم ؟
ما احنا قولنا سبب المثل ومن قائله
وخلاص بقى
مالكم ايها القراء الا تأبون الا ان اكمل الحدوته ونرى حنظله وقراد وم حدث بينهما وبين النعمان ؟
اذاً فموعدنا الغد
وعلى رأى المثل ...
او على راى قراد بقى
إن غداً لناظره قريب
دمتم فى رعاية الله وامنه وسلامته
ونكمل الليله الجايه اذا احيانا ربنا
بس ع العموم متنسوش لو حابين تقرأوا حاجه تانى من عندى
اكتبوا الهاشتاج #الليله
وجنبه اى رقم اقل من٥٤٤
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست
ولو عجبك اعملوا لايك وكومنت وشجعونى اكمل
#فوتكم_بعافيه_وعفو_ومعافاه
#حكايه_ورا_كل_مثل
#ابتسام
تعليقات
إرسال تعليق