#حدوتة_ليه_الجمل_غالى؟؟#الليله٢٢٦

#حدوتة_ليه_الجمل_غالى؟؟

#الليله٢٢٦

الحكايه دى الصراحه مش فاكره اوى سمعتها الاول من بابا ولا من ماما اصل بابايا سمعت منه حكاوى ليها العجب مسيرى ابقى احكيها

بس اكيد سمعتها منها بردو كتييير هههه هتعرفوا ليه لما تقروها

#الجمل_غالى

كان فى ولد صغير بيلعب قدام بيتهم

وسمع واحد بياع عمال بينده و بيقول الجمل بجنيه ... يلا اشترى 

الولد مصدقش نفسه ، وجرى على ابوه  يحكيله وهو مش مصدق التمن الرخيص اللى بيتباع بيه الجمل 

لكن فوجىء بابوه بيقوله :

- لاء كده الجمل غالى 

قاله :

- يا بابا دا بجنيه بس ... دا لقطه 

قاله ابوه :

- لاء دا غالى ومش هنقدر نشتريه

 

عدى الزمن والظروف اتغيرت و الاب إتغنى وبقى تاجر كبير

والابن واقف قدام البيت لقى راجل بينادى الجمل ب 100 جنيه 

دخل وقال لابوه :

 

- تصدق الراجل بينادى بيقول الجمل ب100 جنيه 

باباه رد وقاله : 

- ياااه رخيص كده ... خلاص خد وروح جيب لك جمل

 

 الابن استغرب واعترض وقاله : 

- بقى لما كان الجمل بجنيه قولتلى دا غالى ولما بقى   ب100 جنيه تقولى رخيص

رد الاب وقاله :

- لما كان الجمل بجنيه مكانش معانا الجنيه علشان كده كان غالى علينا ... 

اما دلوقتى والجمل ب100جنيه احنا معانا التمن يبقى رخيص

القصد من الحكايه ان موضوع غالى ورخيص دا نسبى و يتوقف على قدرتى على دفع التمن ف الوقت الحالى او عدم قدرتى

🐪🐪🐪🐪🐪🐪

 

#من_حكايات_امى

#عرفتوا_ليه_الجمل_غالى!!

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٢٦

#ابتسام