#إن_غدا_لناظره_قريب#الليله٥٦٩

#إن_غدا_لناظره_قريب
#الليله٥٦٩
كان ياما كان فى شبه الجزيره العربيه زمان مملكه اسمها مملكه الحيره 
ودى علفكره اتكلمنا عليها قبل كده ف حواديت كتيره 
ياريت لو حد فاكر يقولى ف الكومنتات
ولا زى ما دابما بقول على رأى نجيب محفوظ  آفة حارتنا النسيان .. المهم نرجع لموضوعنا 
 إنهم بيقولوا ان  النعمان بن المنذر ملك الحيرة خرج ف يوم يصطاد
ف تاه  
طب ازاى بتقولى تاه هو عيل صغير؟ لاء
هى الحكاية ان ساعات الملك بتاخده الجلاله ويبعد عن الحاشيه و الاتباع وبيضل الطريق خصوصا ان زمان مكانوش بيركبوا  gbs 
ف الحصان او ف الجمل 
المهم بعد اما اتأكده انه تاه 
وممكن لو غوط شويه كمان ف الصحرا يموت من الجوع والعطش
بدا يدور على حد يساعده 
مطولش 
قولوا لاء طولى☺  
مش هتقولوا 🙄

عموماً انا قصدى انه هو اللى مطولش ف البحث .. الا ولقى  بيت راجل من قبيلة طيء ودى القبيله اللى اتسمى على اسمها حاتم الطائى لانه منها الراجل ده اسمة  حنظلة ودا مش اللى كان بيقوله محمود مرسى ف فجر الاسلام الا تستحم يا رجل لكنه حنظلة تانى 
المهم ان عم حنظله كعادة العرب وكرمهم  آواه وأكرمه وضايفه احسن ضيافه عنده شاه راح حلبها وبعدين دبحها وشواها و رواه وعشاه وظبط له نومه معتبره
وهو اصلاً مش عارف أن ضيفه يبقى الملك النعمان 

اصل صوره ماكانتش بتطلع ف التليفزيون و الجرايد 
اساسا مكانش عندهم جرايد الا جرايد النخل 
النعمان بات  ليلته وارتاح واطمن عنده

 وَقامَّ الصبح واستعد  للرحيل 

وبعدين قاله  : بص يا ابن الحلال انت جدع واكرمتنى وانت متعرفش انا مين ؟
واعرفك ان انا الملك النعمان
واطلب واتمنى 

طبعاً الراجل فرح واتخض وارتبك بس هو معندهوش حاجة محتاجها ولا له طلبات 
علشان كده كان رده : أفعل إن شاء الله ... يعنى وقت ما احتاجلك هجيلك 
وعدت الايام و حنظلة  عايش حياته زى ما هو ومبيسيبش داره والدنيا ماشيه والحال عال
بس دوام الحال ... من المحال
الا وفجأه جتله مصيبة من اللى بتطب مستعجله و أحواله باظت خالص 
و قالت له مراته: ليه ماتروحش  للملك النعمان فيحسن إليك كما أحسنت إليه؟

وراح  حنظلة للنعمان
وهو فاكر ان النعمان هيكرمه ويضايفه مضايفه ملوكى 
زى ما هو ضايفه وهو ميعرفهوش 
وراح عم حنظله من طئ للنعمان على سن ورمح 
الا ... و علشان الفقرى فقرى عم حنظله راح قصر النعمان في يوم بؤسه

بؤسه !!!! ... ايه بؤسه ده؟ 
دا اللى نتكلم عليه الليله الجايه اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٦٩٩
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#حكايه_ورا_كل_مثل  
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد