#الشتا_ولبس_الشتا#الليله٥٧٦

#الشتا_ولبس_الشتا
#الليله٥٧٦
تطور اللبس فى الشتا و تطور اسعار اللبس فالشتا  و اللى تخلي الواحد
يبيع كليه او فص كبد  علشان يشترى جاكيت مابالك بطقم تلبسه 
ودا خلانى ارجع بالذاكره لايام زمان واللبس زمان 
والليله هاحكى لاولادنا اللى محضروش الشتا زمان ولبس زمان  
وافكر جيلى واللى قبله بذكريات زمان والشتا 
زمان
كان الرجاله كلهم زى بعض عماد حمدى ولا كمال الشناوى ولا عمر الحريرى  بيلبسوا زى بابا وخالى البيجامه وزى كل ابهاتنا بس بابا عمره ما عملها بزراير من الجنب🙄
والستات بتلبس جلابيات بيت 
دا حتى لما حبوا يبتكروا كرافات كرييتف لرأفت الهجان فى المسلسل علشان تبقى سيم بقى وحاجه اخر جاسوسيه كانوا عاملينها من ايشاربات بيلبسها كل ستات مصر😂😂 
يعنى اسرائيل كانوا ينزلوا العتبه يعملوا احلى شغل على رأفت الهجان بالايشارب ابو ٣ جنيه ده 

وانا واخويا بنلبس زى افلام ومسلسلات زمانا واحنا وزمايلنا كنا زى بعض ونفس اللبس
طبعا كان لبس الخروج من حاجات مختلفه زى الديولين (مش عارفه كتبت اسمه صح ولا غلط كتبته زى ما كانوا بينطقوه الامهات والخياطه) او ماما تاخدنا لدوران شبرا تشتريلى الفستان من عند بوسى كات وباقى اللبس من عمر افندى او الشربينى 
او من وسط البلد ولبس العيد تجيبه ف شهر شعبان قبل الصيام والزحمه ف رمضان لان واحنا صغيرين كان رمضان بييجى ف عز الصيف 
وافتكر ف سنه من السنين كان جيرانا واصحابى الانتيم باباهم مش بيشتغل ساعتها جدتهم اللى هى مامته جابت للبنات الاتنين فستانين باتيستا علشان تفرحهم طبعا مافهمتش الكلام ده بس مامتهم قالت لماما 
ولسه فاكره انهم اد ايه كان شكلهم فساتين حلوه كت كده وكلوش وحاجه اخر الآجه 
بس اللى فهمته من حوار ماما والجاره انهم ب ٤ جنيه الاتنين يعنى الفستان بجوز جنيهات فرحت البنات ومحسوش انهم فقرا علشان ابوهم عاطل الفتره دى ومضطرين يلبسوا لبس قديم من عندهم
وف اللبس العادى ف البيت ف الشتا كان الكستور
و في الصيف الزفير للرجالي والباتيستا للحريمي 

وسر اختفائه الغريب المريب ودا هنكمله الليله الجايه 
الا لو حد عنده التفسير يقول ف الكومنتات 
الليله الجايه اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٧٦
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد