#اسطورة_ايزيس_واوزوريس٢#الليله٥٧٩

#اسطورة_ايزيس_واوزوريس٢
#الليله٥٧٩
الأسطورة بتقول إن إيزيس وأوزوريس كانوا الاهين  و لكن عاشوا بين البشر فتره طويله لحد ما  اتشربوا بأفكار البشر واتأثروا بالعواطف البشريه وكانوا بيحزنوا ف أحزان البشر و يفرحوا ف أفراحهم وبيشاركوهم  آمالهم ومخاوفهم لحد ما أصبحوا نصف بشر بيتأثروا وينفعلوا زى الناس العاديه
لان زى ما الأسطورة بتقول إن أوزوريس إله الخير لما جه لأرض مصر كيميت(آه هفضل وراكوا لما تحفظوا اسم بلدكم يا متعلمين يا بتوع المدارس)
نرجع لابا الحاج اوزوريس ونقول انه لما نزل على ارض كيميت كان في صورة راجل طيب بيعلم الناس كل اللى  محتاجينه فى دنيتهم  و حاجات كتير نفعتهم زى تعليمهم ازاى يبنوا البيوت والمعابد  و علمهم التحنيط والزراعه في الحقول والخياطة  وعلوم كثيرة من بينها كمان الطب والفلك والهندسة وغيرهم
يعنى هو اللى كان صاحب الفضل على المصريين ف كل المهارات اللى عاشوا بيها حياتهم  اما   إيزيس فكانت معاه بين الناس في البيوت وبين الستات تعلمهم بردو
و لما مات ملك البلاد اختار الناس أوزوريس يكون حاكم للبلاد و بالتالى لما حكم أوزوريس وايزيس ارض كيميت عم البلاد الخير والرخاء 
و لانه كان بيحكم  بالعدل و مكانش عنده مشروعات لاهى بيها الشعب وسايبهم يموتوا من الجوع ولان كان التموين حق طبيعى لاهل بلد كانوا فقرا اوى ولا كان بيشترى طيارات عمال على بطال و لا يبنى ف مدن بمليارت مالهاش حساب وبيغلى عليهم السكر ويرفع الدعم  بالتالى كان الخير بيعم البلاد ويكفى العباد 
و مع ان الدنيا كانت كده حلوه خالص و زبادى خلاط و على رأى عبد الباسط حموده الجو هادى خالص والدنيا بص بص 
الا ان واضح ان ده معجبش ست اخوه واللى متجوز اختهم الرابعه نفتيس و أنه لما ظهر بدأت تظهر معاه المصايب واللى لما بتوصف الاسطوره شكله بيقولوا أنه كان ملامحه قبيحه و شفتة مشرومه لدرجة ان أنيابه كانت باينه منها
المهم ان ست حقد علي اوزوريس وغار منه ونفسن عليه
والله فى اوشاعات بيقولوا ان اوزوريس ركله او (رفصه) يعنى فثار حقد ست عليه طب هيرفصه ليه ؟
لازم زعله 🤔
دا لو كان مش كذب اصلاً
و فى ناس تانيه بتقول ان اوزوريس اتحمرش بنفتيس اختهم وزوجه ست وان ست ثار لكرامته وانا مصدقش على اوزوريس الكلام ده لانه الشهاده لله كان راجل محترم وعينه دايماً ف الارض والعيبه متطلعش منه ع الغريب يقوم يبص لاخت مراته ومرات اخوه اللى هى اصلا اخته 
توء توء توء كدب طبعا🙄
طب انتوا عارفين اجدادنا بيقولوا  السبب الحقيقى ايه ؟
دا اللى هنحكيه الليله الجايه باذن الله
الليله الجايه اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٧٩
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد