#إن_غداً_لناظره_قريب_ج٣#الليله٥٧٠
#إن_غداً_لناظره_قريب_ج٣
#الليله
علشان الفجرى فجرى على رأي اخواتنا الصعايده حنظله الطائى راح للنعمان يوم بؤسه
و قصة يوم بؤسه دى غريبه اوى
الحكايه انه في يوم من الأيام كان النعمان عمال يشرب الخمره لحد ما سِكر ومبقاش عارف يمينه من شماله كان عنده ٢اصحابه هم صحابه الانتيخ
الاولانى كان اسمه خالد بن المضلل والتانى عمرو بن مسعود بن كلدة
وكلده دى مش اسم امه دا اسم قبيلته
عم النعمان اثرت عليه الخمر
و زى قال قيس بن عاصم :
لَعَمْرُكَ إنَّ الخَمرَ ما دُمتُ شارِباً
لَسالِبَةٌ مالي وَمُذْهِبَةٌ عَقلي
وتارِكَتي من الضِّعافِ قُوَاهُمو
وَمُورِثَتي حَرْبَ الصَّديقِ بلا نَبلِ
بالمناسبه الاستاذ قيس دا شاعر جاهلى ومع ذلك كان محرم على نفسه الخمر ... سامع يا عمرو يا اديب فاهم يا محمد يا صلاح واللى مش فاهم قصدى يقرأ دى👇
نرجع لعم النعمان بقى قعد مع شلة الانس و الخمره لطشته ع الاخر و خربوها لدرجة انهم تقريبا كده قالوا حاجة ضايقته فامر بقتلهم
أمر بقتلهما ... مره واحده كده
اه ... مره واحده كده ... امال تفتكر يعنى ربنا محرمها على عبيده ليه ماهو من تأثيرها ده
طب هو وسكران طب واللى موجودين من حاشيه واتباع ...
مالهم
موقفهم ايه ...وافقوا ينفذوا كدا عادى
اه طبعا دا الملك واوامره مطاعه على الكل
لانه لو وزير ولا سياف اعترض هتكون رقبته طايره مع رقابهم
ولما فاق النعمان من سُكرته وعرف عملته السوده حزن جدا لأنه كان بيحبهم اوى وهم رفقائه وندمائه
ومين اللى لما اسكر معاه دلوقتى هيضحك على ايفيهاتى الرخمه ويسقف على نكتى البايخه
فحزن اوى اوى اوى
قوم يعمل ايه بقى من حزنه؟ أمر بدفنهم
طب ما ده لوچيكل يعنى
اه بس جوّد بقى و أمر بأن يتبنى عليهم بناء طويلٌ عريضٌ سماه العزيان يعنى المكانين اللى بتعزى فيهم باغلى الصحاب اللى موتهم بايدى
و مش بس كده لاء دا خلى ذكرى اليوم ده من كل سنه يوم بؤس
ويوم تانى اللى هو بوم نعيم يقعد فيهم بين العزيين فلو روحت له ف يوم نعيمه أكرمك و كرمه اخر كرم
واللى يروح له يوم بؤسه قتله من غير مناقشه أو رحمة
و يشاء ربنا أن حنظلة اللى جاى من اخر الدنيا واللى فاكر وعد النعمان من زمن ومحوشه لوقت عوزه يروح لقصر النعمان في يوم بؤسه
ودا ليش ؟
علشان هو فقرى
المهم ان النعمان عرفه اوم بقى يكافأه على جدعنته القديمه
ودا اللى انا وانت نعمله واى حد عنده عرفان بالجميل
دا انا او حضرتك لكن بقى انعمان ياترى هيعمل كده؟
ولا هيكون له رأى تانى
عموما بقى هنعرفه الليله الجايه ودى مش حركة نداله منى
قصدى اقول مش هكون اندل من اللى قتل اصحابه ف لحظة سُكر
اصل انا كمان اسكرنتى الرغبه ف المنام
و انا بصحى بدرى وقربت اخرف ف الكلام
اقولكوش
اصبروا ...
وان غدا لناظرة قريب
اكمل الليله الجايه اذا احيانا ربنا
بس ع العموم متنسوش لو حابين تقرأوا حاجه تانى من عندى
اكتبوا الهاشتاج #الليله
وجنبه اى رقم اقل من٥٧٠
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست
ولو عجبك اعملوا لايك وكومنت وشجعونى اكمل
#فوتكم_بعافيه_وعفو_ومعافاه
#ابتسام
#حكايه_ورا_كل_مثل
#ابتسام
تعليقات
إرسال تعليق