#قارئه_الفنجان_ج٣#الليله٢٢٩
#قارئه_الفنجان_ج٣
#الليله٢٢٩
الاول نطمن على مصطفى
مبدأيا هو ساب الشغل
الشغل اللى كان خانقه
غير كاريره و اشتغل الشغلانه اللى بيحبها
رقيه مفيش ف ايدها حاجه
وامهم كمان ... مش ف ايدهم غير يدعوله بالهدايه والتوفيق
هو صحيح بيتعب ف شغله الجديد اكتر من القديم
وصحيح الدخل منه اقل من اللى كان بياخده ف الشغل الاولانى
بس هو مبسوط ... دى اهم حاجه
محدش بيموت من الجوع والحياه ماشيه
ومننساش ان العصر ده كانت الدنيا سهله عند دلوقتى
وتكاليف الحياه كمان كانت ابسط و مش مرهقه كده
نرجع لرقيه عدت فتره واتقدم العريس المناسب لرقيه
وفى الزمان ده كان اغلب الجواز صالونات
ان مكانش كله الا فيما ندر
بس ع العموم عريس الصالونات بقى زوج وحبيب
وربنا رزقهم بالذريه وبقى معاهم الولد و البنت
والحياه الهاديه المستقره
اللى بيتسحب عليها الروتين حبه حبه
بس رقيه وجوزها استكانوا ف حضن الروتين الدافئ والحياه الهاديه
بلا عواصف ترابيه من النكد
ولا امواج صاخبه مشتعله من مشاعر الحب الجياشه
ولكن زى ما قلنا روتين مخملى دافئ واخدهم ف حضنه وبيعدى سنه ورا سنه
بس الشيطان مش هيسيب الناس ف حالها ، امال مين اللى يونسه ف النار
ودخل الشيطان حياة رقيه من ناحيه جوزها
ازاى ...؟
احنا بقينا ف الستينات دلوقتى الشركات والمصانع كترت
والمرأه نزلت سوق العمل دلوقتى
مش بس مضطره زى زمان
لاء البنت دخلت المدارس و الجامعات و اتوظفت و بقت زميلة الرجل ف المكتب بشكل عادى
ومن هنا ابتدت #الحكايه_الجديده_مع_قارئه_الفنجان
زملا ف الشغل
بدأت واحده زميله بتتكلم مع زميلها عادى حسين جوز رقيه
كل الموظفين ف الشركه اخوات وزمايل رجاله وستات والعادى يتكلموا سوا وعايده زميله زى اى زميله ف المكتب لكن دا كان رأى حسين بس
انما عايده لها رأى تانى
عايده بتبدى اهتمام مميز ب حسين
زى انها تجيب له سندويتش معاها محضراه ف البيت
ومع ان زمان مكانش فى رضوى الشربينى تطلع ف التليفزيون وتقول فطررررريه بدل ما مدام سهام زميلته ف الشغل تفطره وتبرقلك كده بعنيها 👁👁
بس رقيه كان عندها الوعى ده ومكانتش بتسيب حسين يخرج من البيت من غير ما تفطره
بس بردو الاهتمام بيبان
واه حسين لاحظ اهتمام عايده
وبقى باين اوى ان عايده بتكراش على زميلها ( كلمه الفيناتيه نطت ف قصة من الستينات )
طب هى كان اسمها ايه زمان ؟؟؟
اه بتعلقه 🙋♀️
يووه لاء دى تمانيناتيه🙇♀️
يمكن بتوقعه ف احبالها🤔
اه متخليه محمود مرسى وهو بيقولها ف فيلم ستيناتى ابيض واسود
تمام
نرجع لحسين
اه
ولانه هو متجوز ومخلف فمش عاوز يدخل ف علاقه مالهاش لازمه
وعلشان هى متجوزه ومخلفه ف كده السكه دى مقفوله قدامه وكله الا الحرام او ما يغضب الله
دى وجهة نظر حسين
بس عايده لها رأى تانى
عايده واضح انها هى كمان كانت متكلفته ف لحاف الروتين اللى واضح انه عندها مش مخملى ولكن كان خشن وبيشكشكها انها تدخل ف مغامره تخرجها بره الروتين
حتى لو خرجت بره الدين وبره رحمة ربنا
ماهى معتمده على ستره
وعلى ذكائها
اه عايده ذكيه ... او شيطانها مصورلها ان لما تعمل حاجه تغضب ربنا بس نجحت انك تخفيها عن الناس انت كده ذكى مهما كانت حرام ...
مادمت عرفت تداريها يبقى انت كده ناجح ومش مشكله ان يكون ربنا عارف ... دا غفور رحيم ولا يهمك
وعايده كانت عاوزاه
اه كانت عاوزه حسين
ومع انها مش عاوزه تتجوزه هى راضيه عن جوزها
هى مش عاوزه تخرب بيتها مااحنا قلنا هى ذكيه هى عاوزه كله
الزوج والبيت المستقر
والعشيق اللى نتبسط مع بعض كل فتره نكسر الروتين ثم نرجع لحياتنا ويا دار ما دخلك شر
وهو دا الشر بعينه
بس عند سنسن كانت الحسبه مختلفه
من زاوية حسين
زملا ف الشغل ووقت البريك او الايام اللى الشغل فيها مريح حبتين
تعالوا نشرب قهوه وانا اقرا لكم الفنجان
وبحكم الزماله و كلام الزملا ف وقت العمل الطويل بدأت تلم معلومات عن مراته
وبحكم انه طيب وممكن تقول على نياته ( مش غباء بس بيحط ثقته ف اى حد )
بدات تستدرجه وهو يقول معلومه تبنى عليها اتهامات تمس زوجته
اه اصل هو مش ناوى على حرام وهو عنده الحلال يبقى الحل اكرهه ف الحلال ويلاقى عندى انا الحضن الحنين اللى بعد شويه هيبقى دافئ ووقع الزبون
مش مشكله يشك ف مراته
مش مشكله يخرب بيته
ولان الوقت ده زى ما قلنا رقيه و البيت كانوا متكلفتين ف غطاء الروتين المخملى
بدأ حسين يتأثر بكلام الفنجان
خصوصا بعد ما بدات علاقته مع زوجته تتأثر و تبعد عن الطبيعى
و الثعبانه شغاله تبخ ف ودنه سمها
وهو بدأ بتأثر وبالتالى علاقته بمراته تسوء
اللى يمكن كان رد فعل لبرود او يمكن سوء تصرف من الزوجه فسره الزوج على انها بتميل لحد تانى
واتعملت كده دايره مغلقه ( اشك فيها ... ابقى جاف معاها .... تزعل وتعاملنى وحش ... فاشك اكتر بتعاملنى وحش ليه وهكذا ) بكره خيط مش هتخلص الا لما البيت يتخرب
واتحول الزوج المحب
لزوج بارد مهمل
ثم لزوج شكاك
بناء على ما قالته قارئة الفنجان
وبعد ما وصل شك الزوج ف مراته لمرحله اقرب للانفصال .... وبعد ما اصبح شرب القهوه وقرأه الفنجان عاده يوميه
وبعد ما اصبحت بقدرة قادر الزميله صديقه والصديقه بدأت تدخل ف مرتبة الحبيبه
واصبحت مشكلة حسين
هو انا ازى اطلق مراتى وازاى عايده هتطلق من جوزها
وبدأ يفكر جدياً ف انه يخرب بيته املاً فى بناء بيت جديد يجمع العصفوين
كل ده ورقيه ... بره الحسبه
مش نايمه على ودانها عن جهل ..لاء هى حاسه بتغيره
بس مش فاهماه
وكمان مش متخيله ان حب عمرها وابو ولادها ممكن يفكر ف غيرها !!
يا ترى ايه اللى هيحصل ؟؟
دا هنشوفه بكره
#بصرت_ونجمت_كثيراً
#كيف_تعمل_خطافة_الرجاله
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٢٩
#ابتسام
تعليقات
إرسال تعليق