#الصياد_ورزق_البن؟ات_ج١٩والاخيره#الليله٥٦٨

#الصياد_ورزق_البن؟ات_ج١٩والاخيره
#الليله٥٦٨
وقفنا عند سؤال هو ينفع الامير يتجوز بنت الصياد؟
ولو الامير حب وقلبه مال هل يوافق الملك ولا هيعتبره شغل عيال ؟
مش هطول عليكم واكرر
ف الاول الملك اتردد وفكر وقال كنت بتمنى يا ابنى تتجوز اميره بنت ملوك متربيه ع الحرير مش فقيره مكانش عندهم الا الحصير 
اتكلم معاه صفوان وفهمه انها بذكائها وحنكتها ساعدته انه  يرجع لابوه الملك ويرجع كل حاجه لمكانها 
ولولا افكارها كان زمان الملك سجين مرضه وسريره وهو محبوس او مقتول وشعور دان وابوها مستوليين ع البلد بيجمعوا ثروات ويبنوا قصور ... وفكره بحال البلاد زمان لما كانت عايشه امه الملكه جلنار واد ايه كانت رأيها سديد ومشورتها بتفيد 
فى النهايه اقنعه ويوافق الملك  
وتتزف خوخه وتصبح زوجه ولى العهد الامير صفوان امير البلاد 
وفى مرة بعد فتره تطلب خوخه من صفوان أن يسمع رأيها فى مرضوع مهم  صفوان : قولی اللى ف بالك یاخوخایه یاقرة عینی واغلی منایه 
خوخه : بصراحه أختى مشمشه  بتحب الأمير عسكران من زمان 
ف الفتره اللى كان محبوس عندهم ف السطوح ويا المعيز والخرفان  فايه المانع أنك تجوزها له و بكده نضمن ان متجيش واحده غريبه وتقلب المواجع الدفينه وتقلبه تانى علينا 
وطبعا مش هتلاقى  أحسن منها ف وقوفها جنب الحق والعدل لو مال عقل ولا قلب عسكران للشر تانى فايه قولك يامولاى 
صفوان : نعرض الأمر الأول على الأمير عسكران  هو جايلى دلوقتى قالى عاوزنى ف امر هام 
صفوان : ايه رأيك ياعسكران فى مشمشه اخت خوخه تكون زوجه لك

 عسكران : الرأى رأيك يا صفوان  انت الأكبر ولك التصرف فى كل اللى يخصنى 
و ان كنت أطمع قبل الزواج أنك تطلب من السلطان أنه يعفو عن أمى وجدى هم خلاص تابوا وندموا على اللى عملوه و بیطمعون فی عفو  السلطان کرمه
صفوان : ما تحملش هم يا عسكران بس المهم قولى هل لك رغبه فى انك تتجوز مشمشه بنت الصياد دى حاجات مفيهاش لا جبر ولا تقييد مش بنغصب ع البنات هنغصب ع الراجل الرشيد
عسكران : انت سبقتنى يا أخويا بعرضك ده
انا اصلا كنت جاى لك اطلبها منك 
صفوان : على خيرة الله 
وتتزف مشمشه علی عسكران 
ولوزه علی قمر الزمان بعد ما اتدخل صفوان وخلى مرزوق يحقق رغبتها انها تتجوز اللى بتحبه  
ويعفوا السلطان عن شعوردان ويطلقها ويخرج هامان والدها من الوزارة ويطلق سراحه وفى أخر أيامه يتنازل عن العرش لصفوان ويسجد مرزوق شكرا لله بعد أن أكرمه بستر البنات و كانت أبواب السماء مفتوحه لما دعی وقال : يارب آرزقنی برزق البنات  لان ربنا رزقه برزق البنات ورزق الشعب كله بحاكم عادل وواعى ....
  
اتمنى تكون الحدوته دى عجبتكم اما الصياغه والاسلوب فاغلبهم اسلوبى وصياغتى واحيانا كتير اضافتى  
الحدوته دى لقيتها من فتره ودورت كتير على اسم الكاتب وهل هى مؤلفة حديثا يعنى خلال ال٢٠ او ٣٠ سنه الجداد ولا هى من التراث ولا ايه حكايتها؟ 
معرفتش والله كان نفسى اعرف كاتبها واستأذنه اواذكر اسمه ع الاقل واشكره دا لو سمحلى بالتدخل ف النص واعادة الكتابه 
بس حاولت كتير وموصلتش لحاجه
حتى انى حاولت ارجع للنص الاصلى ملاقيتوش لولا النسخه القديمه اللى عندى 
عموما اتمنى انى مكونش ظلمته 
بس فعلا الروايه امتعتنى وحبيت انكم تشاركونى هذه المتعه اللى اتمنى تكون حلال ومش مسروقه 

تمت
و ع العموم متنسوش

الليله الجايه اذا احيانا ربنا هتكون فى حدوته جديده مستنياكم  لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٥٦٨
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد