#الجمعه_٢٨_يناير_٢٠١١حلقه(١)#الليله٢٥٧

#الجمعه_٢٨_يناير_٢٠١١حلقه(١)

#الليله٢٥٧

#٢٨يناير_التاريخ_الحقيقي_لقيام_الثوره

حكيت عنها ف يوم الجمعه لانها ارتبطت عندنا كلنا بجمعة الغضب 

بالنسبه ليا ثورة يناير كانت يوم ٢٨

مش ٢٥ 

يوم ما مصر قامت كلها

يوم ما اعلن حظر التجول

يوم ما اتقطعت شبكات الاتصالات 

واذا اتكلمنا عن ٢٥ يناير انها كانت بداية الثوره 

فانا احب اسميها ارهاصات او مخاض للثوره ابتدى من يوم ٦ ابريل ٢٠٠٨ 

واستمرت مع حركة كفايه وحركه ٦ ابريل اللى خدت التاريخ اسم لها 

#٢٨_يناير 

اليوم ده كان جمعه 

وكنت متعوده وزوجى نتسوق من عروض المحلات الكبرى لنستفيد بفروق اسعار لما كانت عروضهم فيها فرق اسعار 

رحنا سبينس اللى ف ستى استارز مدينه نصر 

واحنا خارجين كانت الساعه ٢ ظهرا و كانت بعض الكافيهات مشغله قناة الجزيره وساعتها اتفرجنا حبه واحنا ماشيين على الناس اللى بيجروا والزحمه 

والميدان  

ولكن ابن حلال تطوع انه يقول انا جاى من وسط البلد دلوقتى ومفيش حاجه من دى 

وان دى فيديوهات  قديمه متسجله  مش بث مباشر  النهارده زى ما الجزيره كاتبين 

وبالتالى صدقنا وعليه كملنا شوبنج ورحنا  لكارفور المعادى 

كميات كبيره من اللحمه البلدى المعتبره معانا من جزارة سبنس  ام  ٤٣ جنيه من حلاوتها خدنا لنا ولحبايبنا كمان واخدين بالكم من السعر للحمه البلدى 

وكملنا من كارفور رز وبرتقال وبطاطس سبونده وغيرهم 

الجلاله خدتنى كالعاده و مسيبتش ركن فيك يا كارفور الا وغطيته 

وعند الكاشير

كانت الساعه ½ 4 بعد العصر لما لقينا ناس بتقول 

الحقوا روحوا بسرعه فى حظر تجول هيبدا الساعه ٥

سمعنا الكلام ومصدقناش

بس كان فعلا ... الشوارع كلها ناس بتجرى  

معانا خزين الشهر و ثروه غذائيه تبلغ ضعف تمنها نتيجه لشطارتى ف اختيار العروض 

بس كل ده كان هيضيع وهنضيع معاه لما وصلت العربيه عند الحته بتاعة منشية ناصر  واحنا عندها جايين من المعادى لشبرا 

لكن ... 

طلعوا شباب بيساعدوا ان المرور يسلك والناس تروح بيوتها

و كنا مرعوبين على اولادنا اللى كانوا ف ابتدائى ساعتها واللى كنا سايبينهم لوحدهم ف البيت ومش عارفين ايه اللى بيحصل لهم او ف الدنيا عامة 

ولما طلبت اخويا اسأله انت فين 

كان رده انا ف التحرير 

ايه ؟ وبتعمل ايه ؟

حكالى انه هناك من بعد ما الشباب عدوا الكوبرى 

ووصلوا للتحرير 

طبعا صوتوا رايح 

وكانت بداية لفتره من حياتنا ... كلنا اتغيرنا بعدها 

عاوزه كلنا نكتب لنفسنا وللى معانا 

وللى هييجوا بعدنا احداث الايام دى نكون شاهد على العصر ... اللى شاف حاجه يحكيها 

التاريخ اتكتب ف الايام دى 

بس لما اتسجل قرات فيه حاجات غير اللى عرفنها واللى عشناها 

انا مكنتش ف التحرير يومها 

بس هحكى اللى عيشته و اللى اتحكالى من اخويا ساعتها 

اتمنى كل حد مننا يقول ويسجل شهادته على الايام دى للزمن ولولادنا 

بكره باذن الله هاحكى اخويا قالى ايه 

وازاى شفت التحرير من خلال  عنيه زى ما عودنى  طول عمرنا انه بيحكيلى كل حاجه كانى  شفتها  

#شاهد_على_الايام

#ابتسام

طبعا الحكايه دى زى ما بقول فى النهايه الثابته اللى بقولها كل مره 

بس هزود فيها حاجه ...

انى هنقل الكومنتات اللى اتقالت السنه اللى فاتت من ناس شاهدين على اللى حصل وهنزل رابط الحلقه الاصليه علشان تشوفوا الكومنتات بنفسكم

صديقتى داليا قالت : 

اسلوب السرد ممتع كالعاده دا أولا..

اليوم دا انا صليت في مسجد قريب من بيتي وكان مليان اكتر من العادي لان كان التجمع بعد الصلاة والالتقاء فالتحرير  وكل شارع رئيسي يطلع منه مجموعه كبيره تنضم لينا والهتافات كانت مشتعله جدا

لكن للاسف مانزلتش يومها التحرير وروحت لقيت التلفزيون وكأنه عالم تاني  عن اللي انا شفته اللي هو كان جزء بسيط من مشهد التحرير

كنت مصدقه الجزيره لاني كنت فالميدان يوم ٢٥ وشفت تجمعات كبيره موقفه الطرق وشفت الأمن وهو بيضرب الشباب بطريقه مميته بالعصيان السودا

وهنا انتهت شهادة داليا ف الحلقة دى 

 

ودا رابط القصه ف صفحه الف حكايه وحكايه

https://www.facebook.com/102264164820545/posts/238145041232456/

ودا كمالة كل بوست عدى عليه سنه 👇

 

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٥٧

#ابتسام