#جمعة_الغضب_٢٨يناير٢٠١١(٣)#الليله٢٥٩#٢٨يناير_التاريخ_الحقيقي_لقيام_الثوره

#جمعة_الغضب_٢٨يناير٢٠١١(٣)

#الليله٢٥٩

#٢٨يناير_التاريخ_الحقيقي_لقيام_الثوره

طبعا ابتدت الاشاعات 

البلطجيه عمالين يهاجموا كل مكان فى مصر 

وناس اعرفهم مثلا  بتعيط وتحكيلى دول بيهاجموا بنك اسكندريه الفرع اللى جمبنا 

طبعا معروف ان الفروع مفيش فيها فلوس فعادى يا جماعه اللى ياحاول يحاول وبعدين يعنى هو بنك ابونا واحنا مالنا للبنك نظام امنٌ يحميه   

بس وفجأه الدنيا حوليك بتتحول لحالتين 

الاولى : رعب ف كل مكان من البلطجيه اللى بيهاجموا 

و التانيه : الشباب خلاص احتل التحرير 

والجزيره عماله تجيبهم وهم بيتدفوا على النار ويغنوا اغانى منير واحمد فؤاد نجم والشيخ امام 

وبقى فى الميدان بيغنوا ف كل شارع ف بلادى صوت الحريه بتنادى 

والحقيقه ف كل شارع ف بلادى الخوف من البلطجيه بيهاتى 

و بالتالى شباب كل حى  خرجوا ف السقعه يقفوا يحرسوا الحى بتاعهم من العدو المجهول اللى بيهاجموا البيوت

طب ياحبايبى ليه هيدخلوا الاحياء الشعبيه اللى الناس فيها بتكح تراب 

والحرامى لو دخل بيوتنا  يصعب عليه حالنا 

اكيد يعنى مش هيشيل التليفزيون اللى بيجيب الالوان بالشبه والاصوات بالعافيه ولا امبوبة البوتجاز 

وهو فى مثلا احياء راقيه وكمبوندات فيها اللى يتسرق

او محلات دهب مثلا او خلافه 

وانا هنا مكنتش بنصح الحراميه يروحوا فين 

لانهم كده كده محدش شافهم لحد دلوقتى وكانوا الشبح المجهول ف كل بيت وكل حدوته 

 ولما تراجع نفسك كده تعرف انه كان الفنكوش اللى كله سمع عنه بس محدش شافه 

و زى ما احنا عارفين كل الرجاله خلاص اجازات من الاشغال وبالتالى كل مجموعة ف شارع او حاره او عماره بيتجمعوا تحت البيت يعملوا اللجان الشعبيه و الحمايه المدنيه وكل الكلام الكبير ده اللى كان الناس فرحانين به 

ولكن حقيقته لا تعدوا ....

شباب صغير عاوز يعيش انه راجل وحامى الحما

او كهول بيفكرهم الكلام ده ب حروب ٦٧ و٧٣ والجو بتاع السسبنس اللى عاشوها وهم اطفال او شباب 

او ناس قله خايفين بجد ودول قله لان زى ماقلت لا يوجد ما يدعوا للخوف 

من حاجه اصلاً

وان كان كله متأثر اللى مصدق واللى شاكك

والخوف اتحول لوباء خوف جماعى 

وان كان فى شوية طرائف حصلت ف الوقت ده احب افتكرهم معاكم

مثلاً اتخضينا ان فى حريقه وريحة دخان رهيبه وتجرى ع البلكونه ودماغك وانت بتجرى ....

هو لو فى حريقه دلوقتى هنلاقى مطافى تطفيها ... ولا معاكوا ربنا بقى فى ظل غياب اى شرطه ..... 

وهل المطافى هربت مع اللى هربوا ولا موجودين 

تجرى ع البلاكونه  تلاقى الشباب الروش 

جايبين جزع نخله تحت البيت وبيولعوا فيه علشان يتدفوا ويختنق من ييختنق ويتهبب غسيل من يتهبب ويتخض اللى يتخض 

يكش تولعوا المهم انا اتدفى 

مش كفايه انى قاعد ف الشارع بحميكوا من العدو المجهول يا ناكرى الجميل ... ال .. دخان ومياصه ال ..

صوره تانيه لاحداث الايام دى 

اخويا خرج علشان يشوف اللجان الشعبيه بره بيته  ويقف معاهم 

ولقى اتنين بيتحاوروا

وواضح من اسلوب الكلام ان واحد منهم جامد ف الشقاوه والاجرام والتانى لسه بيجرب نفسه 

من صوته الواطى والخنوع اللى فيه كلامه 

وتعالوا نسمع الحوار زى ما حكاه فؤاد الله يرحمه 

جار ١ : الا صحيح هو انت كنت من الناس اللى دخلوا قسم اول 

جار ٢ : اه دخلنا انا وفلان وفلان لما سمعنا انهم بيهاجموا الاقسام 

جار ١ : وخدت ايه من هناك 

جار ٢ : كان فى ناس دخلوا قبلى بس انا لحقت حتة سلاح وكلابشات 

جار ١ : ورينى السلاح كده 

جار٢ ميقدرش يقول لاء : 

طلع السلاح ووراهوله هو والكلابشات 

جار ١ : طب انا حتة السلاح دى تلزمنى يا زميل

جار ٢ : طاطى واستسلم واداله حتة السلاح 

وطبعا التانى شكره وطبطب عليه بابوه كده 

مع انهم من سن بعض 

بس التانى له سبق ف سكة الشقاوه عنه 

واحتفظ هو بالكلابشات 

اللى هى هتعمل بيها ايه يا ضنايا !!!!

هتنفعك بايه كلابشات ميرى ؟؟

مازلت بعد ١٠ سنين فاكره الحكايه 

والحوار زى ما فؤاد شافه وحكاه ... 

واللى نفسى اعرفه ... 

ياترى الكلابشات لسه معاه ؟؟

طب عمل بيها حاجه ؟؟

هل احتفظ بيها كتذكار ليوم ما هاجم قسم الشرطه ؟؟؟

ولا كان له معاها ذكريات اليمه قبل كده وهو بيلبسها غصب ؟؟

فؤاد اطمن ان فى شباب معاهم سلاح بيحموا البيوت والبلاد والعباد 

وان ف كل حته ولد عتره وفتوه جنان مع الاعتذار لمنير 

سامحونى بحكى اللى فاكراه بس و١٠ سنين فتره طويله ان واحده بتنسى هى فاتحه التلاجه ليه علشان افتكر اللى  كان بيحصل فى الايام دى  

بس دى ايام متتنسيش 

كل الحكايه انى  عاوزه شوية تنفيض لتراب الزمن اللى اتكوم  على تلافيف المخ ف المده دى 

بس بيرجع تانى تنور النقط المضيئه دى لما تتعاد التواريخ تانى وبنفتكر احداثها اللى مهما يعدى الزمن بتفضل حاجه حلوه ف حياتنا 

فى اخر كلامى النهارده اقول اللى ابنى قالهولى الصبح ان زميلته اللى من سنه بتقوله مامتك بتقول احكى اللى فاكره ولقيت انى مفتكرتش حاجه 

علشان كده يا رضوى 

علشانك وعلشان محمد واحمد

وعلشان مؤمن اللى اتولد بعد الثوره بسنه ونص 

 وجيلكم واللى جم بعدكم بقول كلنا نحكى 

وياريت اللى مش له طولة بال على الكتابه 

يحكى لولاده اتكلموا وسجلوا ف ذاكرتهم اللى شفتوه 

احكوا ياجماعه 

انا بدأت اكتب اول ما بدأت بسبب انى خفت اموت وتموت معايا حواديت امى اللى حكتهالى زى الشاطر حسن ... وجميله وسميره .. ولقاط ابن لقاط ..

ومتتنسيش زى ما نسيت النص فرخه وحواديت تانيه لما ماتت امى ماتت معاها 

واتكرررت معايا الفكره لتحدى نفسى  بالف ليله كل ليله حكايه جديده 

ودى اسمها حواديت خياليه 

ما بالك باننا كلنا بنجمع ان ايام يناير٢٠١١ وما بعدها اجمل ايام عمرنا 

ارجوكم احكوا اللى حصل ف الفتره دى من ثورة ٢٨يناير 

ونكمل بكره 

#شاهد_على_الايام(٣)

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٥٩

#ابتسام