#جمعة_الغضب_٢٨يناير٢٠١١(٢)#الليله٢٥٨#٢٨يناير_التاريخ_الحقيقي_لقيام_الثوره

#جمعة_الغضب_٢٨يناير٢٠١١(٢)

#الليله٢٥٨

#٢٨يناير_التاريخ_الحقيقي_لقيام_الثوره

روحنا بالسلامه واتطمنا على اخويا اللى روح متأخر  

واتطمنا على ولادى اللى بيلعبوا ع الكومبيوتر ومش دريانين بالدنيا

وابتدى اخويا يحكيلى اللى حصل 

كان يومها ف شغله وعارفين ان مظاهرات النهارده اعلى من مظاهرات ال ٣ ايام اللى فاتوا (٢٥ و٢٦ و٢٧ يناير) 

اخويا كان من الناس اللى بيحلموا بالتغيير بس مليانيين باليأس من انه يحصل 

علشان كده فاكر انها مش هتزيد عن وقفات النقابات ويوم ما تعلى اوى هيحصل زى ما حصل ف المحلة ف ٦ ابريل ٢٠٠٨ 

لما طلع شوية متظاهرين وكسروا لوحه كبيره عليها صورة مبارك ودى كانت جرأه غير مسبوقه وجنان رسمى منهم

بس صاحبه كلمه وقاله اللى بيحصل فيه حاجه غريبه ومختلفه عن كل اللى فات 

وبدأ يحكيله من ساعة ما صلوا الجمعه ف جامع مصطفى محمود والمسيره اللى بعد كده من مصطفى محمود ف المهندسين واللى كان هدفها توصل لحد التحرير 

وقوات الامن اللى قابلتهم على الكوبرى 

وحصلت الصور والفيديوها اللى كلنا شفناها 

بس الفرق ان صاحبه وهو بيكلمه كان بعد ما نزلوا من فوق الكوبرى والقنابل لسة مأثره على نفسهم كلهم

 المهم انهم ف الشغل بتاعه روحوهم بدرى نظرا للاحداث 

لما صاحبه رجع بعد كم الغاز اللى شمه وحكاله 

فؤاد نزل التحرير كان بعد العصر 

وكان ساعتها بيتجمع مع شباب كتير لما حسوا بخطر على المتحف المصرى 

وعملوا هناك الحزام البشرى اللى حمى المتحف ومخلوش حد يقدر يقرب من المتحف 

وفضلوا على كده شباب ميعرفوش بعض ولا عمرهم شافوا بعض شابكين دراعتهم ف دراعات بعض و فضلوا على كده لحد ما الجيش نزل واستلم منهم المتحف 

و المفارقه ان محاولات السرقه من المتحف منجحتش ابدا طول ما الشباب دول  واقفين

وفيما بعد على ١١ او ١٢ بالليل كان فى محاولات تسلق من خلف المتحف بس الجيش مسكهم 

خلاص مهمة المتحف خلصت زى ما قلنا ع المغرب كده 

بس الشباب مش هيروح 

حكالى كمان انه وهو ماشى شاف ناس  بيكسروا وخلاص اى حاجه قدامهم  

منهم واحد بيكسر ف كشك بتاع حاجه ساقعه من بتوع وسط البلد كلمه وقاله يا عم دا كشك واحد غلبان زى حالاتنا 

وشوية كلام كده بيقولى بعدها سمع الولد كلامه بس ميعرفش خلاص واقتنع ولا استنى لما اخويا مشى ورجع للكشك تانى او لكشك غيره

وسمع ان فى قلبان عند الجامعه الامريكيه 

و لما راح هناك كان فى مجموعات  كبيره من شباب الثوره محاصرين مجموعه من قوات الشرطه 

متعرفش ازاى دول مهربوش

وبكل الغضب اللى ف نفوس الشباب دول كان تجمعهم وحصارهم 

والشباب كل شويه يزيدوا 

واللى جوه الحصار  كل شويه يضربوا طلق رش الضرب كان كتير بس هم متحاصرين فطبيعى ان الطلق اللى معاهم يخلص ويسكتوا 

كان فى عربيات جيش او اى قوات بانواعها مكانش الشباب بيعدوهم الا بس عربيات الاسعاف اللى بتدخل وتخرج علشان تاخد من قوة الشرطه المحاصره دى المصابين 

بس الغريب ان بعد دخول عربيات الاسعاف وخروجهم 

 يزيد ضرب الطلق 

وزى ما تقول ان الشباب لاحظوا كده علشان كده منعوا عربيات الاسعاف اللى جايه انها تدخل الا اما يفتشوها 

وفعلا لقوا جواها سلاح 

ومنعوها تدخل تانى لحد ما جه الجيش 

وخرجوا قوات الشرطه دى اللى كانت متحاصره من الميدان 

وبكده الميدان اصبح للشباب بس 

اخويا رجع جنب عينه جرح بسيط 

العين عليها حارس وهو مرضيش يقولى انا ومراته علشان منقلقش  عليه  واهى النضاره مغطيه عينه 

الحمد لله اخويا روح ليلتها بالسلامه 

ودى الشهاده باللى حكاله عن يوم جمعة الغضب 

انا زى ما قلتلكم اطمنت ع العيال لاقيتهم عايشين ف البلالا مع الكومبيوتر 

فقلت لجوزى احنا مش عارفين ايه اللى ممكن يحصل الفتره الجايه وبالتالى لازم اكمل الامن الغذائى من كل الاوجه 

و خدنا بعضنا وطلعنا على فرن من اللى بيبقوا فاتحين لوقت متأخر هى كانت الساعه ٧ مساءًا يعنى مش متأخر اوى 

بس وجبنا ب ١٠ جنيه عيش يعنى ١٠٠ رغيف من ابو بريزه 

اه امال نموت من الجوع 

ماانتى جايبه رز وبطاطس يكفى قريه 

توء توء 

لازم عيش بلدى 

وبكده 

جهزت استعداداتى كامله للجلوس على الكنبه 

وبدون ما اشعر انضميت لحزب الكنبه اللى بدأ المصطلح بتاعة ده يظهر ايامها 

ربنا يعلم انى على اد ما عدى وقت انا بحكى اللى حصل ساعتها واللى فاكراه بس ... ومحفور ف ذاكرتى 

رحم الله من مات 

واتمنى من كل حد يكتب احداث الايام دى من زاويته 

وتكون زى بازل يتجمع من خلاله الصوره كامله 

لاجمل ايام حلم عمرنا 

او الحلم اللى عشناه حقيقه 

بس كان حلم 🤷‍♀️

#شاهد_على_الايام(٢)

#ابتسام

هنزل الرابط زى ما وعدتكم انى هاعمل كل ليله بس مفيش شهادات هتنزل من التعليقات لانها كلها كانت ترحم على اخويا واللى وفاته كانت من ٦ سنين يعنى ملهاش دعوه بالثوره

الرابط اهه👇

https://www.facebook.com/102264164820545/posts/238536741193286/

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٥٨

#ابتسام