#ليه_طيب_اكسر_وراه_قله؟#كوم_الشقافه٤الاخير#الليله٦١٠

#ليه_طيب_اكسر_وراه_قله؟
#كوم_الشقافه٤الاخير
#الليله٦١٠
طب احنا كدا متفقين ان من يوم ما الغراب علم قابيل ازاى يدفن هابيل 
والبشر بتعاملوا مع موتاهم بنفس الطريقه مع اختلاف اسلوب وضع الانسان فى التراب منالهرم الاكبر عجيبة الدنيا حتى اللحد بندفن فيه الموتى المسلمين
بس كانت ف فتره من الفترات العمليه معقده  
و ابتدى التعقيد لما المهندس العبقرى امحوتب بنى الهرم المدرج  للملك زوسر 
وعنها فضلوا يعلوا فى البناء فى المقابر ... ويعلوا ... ويعلوا
لحد ما زهقهم لصوص  المقابر فعكسوا الموضوع و بقوا يخبوا مقابرهم منهم زى ما شوفنا ف اكتشاف مقبرة توت عنخ امون او  كلامنا عن الملوك والخبيئات اللى حكيناهم ف سلسلة ملوك الجدعنه هنزل الروابط بتاعة السلسله تحت👇 للى يحب يستزيد
نرجع لمقابر كوم الشقافه 
المختلف ف المقبره دى انها بناء كبير وطويل وعريض وكل شويه يوسعوا فيه بس لتحت يعنى عاوزاكم تتخيلوا معايا عماره من ٤ ادوار فيها غرف وسلالم وبناء عادى جدا ما عدا انه بيتجه لتحت 
وكأنك عملت زى آليس ف بلاد العجايب ودخلت من المرايه وكله بقى بالعكس البناء يعلى لتحت والاوض تتوسع ف الحيطان زى ما بيعملوا بتوع المناجم والتنقيب عن الدهب والفحم 
فتروح تزور المتوفى فتنزل دور 
دورين 
تلات ادوار 
اربع ادوار تحت الارض
الاثريين والباحثين بيقولوا إن اللى بنى المقبرة تقريبا كانت عيلة غنية من اهل اسكندريه وبعد كده استخدموها مجموعة من اللحادين (التورابيه يعنى) ساعتها اضافوا بعض الحجرات  لدفن عائلات تانيه و بعد كده حفروا فتحات جديده للدفن في الجدران في صف واحد أو صفين فوق بعض 
وعاوزين نتخيل سوا شكل المقبرة 
هى بتتكون من ٤ أدوار

اول دور كان فوق الأرض ودا  اندثر عبر الزمن اتساوى بالارض يعنى 

كمان الدور الرابع متغطى لحد دلوقتى  بالمياه الجوفيه اللى  رشحت من مسام الصخور يبقى اتفضل عندنا دورين التانى والتالت  اللى هاخدكم ف جوله فيهم
 
بقولكوا ايه من الاول كده مش عاوزاكوا تتوهوا منى وصحصحوا معايا كده اه فى نور نازل من مسقط السلم 
واه فى فجوات ف الحيطان عليها مصابيح اضائه 
بس احنا مازلنا تحت الارض وف تربه وحوالينا ميتين و جثث محنطه ف كل حته ف مش عاوزه نتوه من بعض 
وكفايه جو اللبش اللى احنا فيه ده ... خلوا بالكوا مينفعش تقولى موبايل اصلا مفيش شبكه والبطاريات هتفضى بسرعه عموماً امسكوا ف ايدين بعض كده 

وبقولكوا ايه من الاول 
اللى بيخااف يطلع بره 
كده تمام نقول بسم الله وننزل السلالم هى ف الاول قريبه ومريحه وبعد كده بترتفع الدرجات وتوسع المسافه بينهم حبه حبه ودا مش علشان يدبسوك ان الموضوع سهل 
لاء هم بيقولوا ان اللى طالع من تحت بعد نهاية الزياره بيكون تعب قرب وش الارض فبيبقى الدرجات اشبه بمنحدر سهل المشى عليه 
نبتدى على خيرة الله 
يبقى الدور الاولانى اللى اختفى دلوقتى فاضل منه مدخل فوق سطح الأرض بعده سلم حلزوني ينزل للدور الأرضي التانى اللى بقى الاولانى بعد ما اختفى اللى على وش الارض زى ما قولنا
والدور التانى ده عباره عن ممر او طرقه توصلك لصالة على شكل دايرة فى وسطها بير وفى جنبها من ناحيه صالة تانيه مستطيلة  ودى بتكون اوسع فيها ٣  كنبات  هي صالة اللى فيها بيقعد اهل المتوفى يرتاحوا وياكلوا لان كان فى ترابيزات خشب زى ما بيعملوا ف بيوتهم وممكن يناموا كمان لانهم حاطين لهم مخدات ومساند وحاجه اخر راحه
لان الاسر كانت متعوده انها تزور موتاهم وتقعد هناك فيلاقوا اماكن يريحوا فيها قبل ما يطلعوا على وش الارض يمارسوا حياتهم العاديه تانى لحد الزياره الجايه للحبايب اللى تحت الارض علشان ياكلوا وبعدين يرموا شِقف الفخار اللى اكلوا فيها جنب المقبره امال هو بقى كوم الشقافة من شويه 

المهم ان في الناحية التانيه من الصالة المدورة اللى قبل الصاله المربعه دى سلم 
اقول تانى 
احنا نزلنا لقينا صاله مدوره ناحيه بتطلعك على الصاله المربعه اللى شبه الليفنج بتاعهم كده والناحيه التانيه  تلاقى  سلم يوصل للدور الأرضي الثالث
و دا الدور  اللي فيه الجزء الرئيسي للدفن من المقبرة عباره عن اوضة فيها ٣ فتحات في الحيطه و طرقتين بيلفوا حواليها و فيهم طول ما انت ماشى هتلاقى   فتحات وحجرات صغيرة للدفن لحد ما توصل للدور الأرضي الرابع 
و دا للاسف  الميه الجوفيه مغطياه وبالتالى محدش يقدر يدخله لانه زى ما قولنا غرقان 
وان كانوا لقوا جثامين طافيه على سطح الميه دى وده دليل على ان الدور الاخير تحت ده هو كمان كان بيستخدم للدفن و كان فيه ممرات بيقولوا انها ممكن  توصلك  (لمعبد السيرابيوم)
طيب لقوا ايه ف المقبره دى  
٥٠٢ قطعة آثرية نادرة منها
٣٩ تابوت و
١٧ تمثال لأبو الهول و
١٥٦ قواعد وتيجان لاعمدة  وغيره غيره 
طلعنا تانى على وش الارض وحمدًا الله ع السلامه 
وعلشان تحس انك استمتعت بالزياره ومتقولش ابتسام اخدت فلوس الرحله ومورتنيش حاجه ولا سابتنى اصور بالموبايل 
وتقول الصور هتطلع ضلمه واصلا ممنوع التصوير 
نزلت لكم  تحت 👇 صور كتيره من الجبانه توريك العظمه وممكن تحتفظوا بالصور كمان بدون مصاريف اضافيه غير بس اللايك والشير والكومنت اللى تكتبولى فيه رأيكم ف الرحله 

وفى النهايه احب اوجه الشكر .. كل الشكر للحمار اللى اكتشف الاثر العظيم ده 
ودا بيفكرنا نشكر المعيز بتاعة خبيئة الاقصر 

والاطفال اللى خطفتهم الغوله ف خبيئة الكرنك عاوزين تعرفوهم حاضر
هنزل روابطهم ف الكومنتات 
بس سيبونى دلوقتى انام واكمل الليله الجايه اذا احيانا ربنا لانى راجعه هلكانه من الرحله
و متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٦١٠
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#حكايه_ورا_كل_مثل
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد