#اسطورة_ايزيس_واوزوريس_ج٢٥#الليله٦٠٢

#اسطورة_ايزيس_واوزوريس_ج٢٥
#الليله٦٠٢
وابتدى الصراع اللى هيثبت مين من الاتنين احق بملك كيميت وساعتها حوّل سِت وحورس نفسهم لفرسي نهر و نطوا هم الاتنيين في الميه وبقوا يضربوا ويقطعوا فبعض
المهم ان السيده الفاضلة إيزيس حبت  تدخل لصالح ابنها طبعاً
فراحت حادفه خطاف في الميه علشان تكتف به  سِت وتقل من حركته فتخلى ان ابنها هو اللى ينتصر 
بس  اللى حصل انه نزل على حورس ابنها واصابه ساعتها صرخ من الالم و استغاث بيها أنها تنزعه من عليه فنزعته و حدفته تانى  فجه ف سِت وراحت شداه ناحيتها

ساعتها سِت بقى يتوسل لإيزيس أنها تسيبه وفضل يفكرها بصلة الدم والاخوه والعيش والملح وعشرتنا وميهونش علينا محبتنا ولانقدر على نار فرقتنا وهانرجع ومسيرنا لبيتنا وقلب فيها ليلى مراد

فرقت له وحنت عليه وفكت  الخطاف عنه فهرب
مين اللى شايف اللى بيحصل ده ومتغاظ منها ؟ حورس 

وهوب هبت ف دماغه   وراح ضارب راس أمه بسكينه طير رأسها و شال الراس وطلع للجبل😳

اخس لك يا حورس كده تقتل امك ؟
هى اه زى الدبه اللى قتلت صاحبها وبتضر اكتر ما بتفيد بس الام ام ودى مهما كان الالاهه ايزيس تاج الراس ومعبودة اهل كيميت
بس متخافوش 
حورس مش قليل الادب ... لاء 
هو مقتلش امه هو طير رقبتها بس 
كان قصده يعطلها من انها تدخل تانى لانه حس انها بتضره اكتر ما بتفيده
مره تصيبه بالخطاف 
ومره تسامح ست بعد ما خلاص كانت هتقضى عليه ... قال يعطلها او يعقلها شويه 
لكن الحمد لله تحوت صالحها و استبدل رأسها براس بقرة
ودا السبب ان ايزيس بتظهر وعليها  غطاء الرأس بقرون بقرة و دايماً بتظهر وهى لابساه

ومتفهمش يعنى بردو عم تحوت ملقاش الا راس البقره اللى يصلح بيها هيئتها يعنى🙄
ما هى كانت بتعك وهى على كتافها راس عاديه .. ولا قصدك ان البقره ممكن تفكر وتتصرف احسن من اللى كانت بتعمله🤔؟؟؟

قوم لما عرف رع باللى حصل من حورس و هزاره التقيل مع ايزيس وانه قطع راس امه وكده قال يستغل الفُرصة وأمر بالقبض عليه وعقابه

ما احنا خلاص عرفنا من زمان وحتى الان امتى بيكون القضاء ناجز 
وخلينى ساكته😷 اصل بصراحه رع ومحاكماته ريحتها فاحت اوى🤢
نرجع لكيميت
مين بقى التانى اللى بيصطاد ف الميه العكره عمو ست 
اللى حلف يمين بعظيم ما حد هيجيب الواد ده من قفاه من فوق الجبل غيرى 

ويجرى ست ع الجبل يدور على  العاق حورس
و فعلاً لقاه و هوب رماه ع الارض وقلع عنين حورس الاتنين ودفنهم 
وبعدين رجع  للآلهة قال ماعرفوش ... ماشوفتوش .. ملاقيتوش
 ماقبلتوش ال يعنى مش 
لاء يا حليم مش وقتك انت احنا بنحكى مأساه دلوقتى 
يعنى حورس يا ضنى امه بقى مرمى فوق الجبل اعمى و عنيه مدفونه ف الارض و امه براس بقره وحاجه اخر بؤس ومأسويات 
بس يا جدع لجل ما ربنا يفضحست الكداب بتاع معرفوش ده ينبت مكان عنين حورس اللى مدفونين زهرتا لوتس نورت بهم الأرض كلها  فراحت الإلهة حتحور ربة الأمومة للمكان اللى فيه حورس وقطرت مكان الفجوتين الفاضيين مكان عنيه من لبن غزالة حلبتها فنبتت له عينين جداد ولا تقولى بقى زرع عين ولا زرع قرنيه ولا ترقيع قرنيه  وراحت حتحور وحكت للآلهة باللى حصل واللى جرى و ادينى طمنتكم على عنين حورس وراس امه و نكمل الليله الجايه اذا احيانا ربنا 
بس ع العموم متنسوش لو حابين تقرأوا حاجه تانى من عندى 
اكتبوا الهاشتاج #الليله 
وجنبه اى رقم اقل من٦٠٢
هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى
ولو مش بتشوف حواديتى اليوميه بانتظام يبقى ممكن تعمل متابعه وسى فيرست 
ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه
#ابتسام

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد