#ليه_طيب_اكسر_وراه_قله؟#الليله٦٠٧

#ليه_طيب_اكسر_وراه_قله؟

#الليله٦٠٧

اذا غار اكسر وراه قله ... ليه؟

كنت من صغرى  دايما فاكره انها مقوله بتتقال ف الافلام بس لانى عمرى ما شوفتها على ارض الواقع او حتى سمعتها من امى ف حدوته من حواديتها او كده بس لما كبرت عرفت انها حقيقه والناس فعلا بيعملوها 

و صراحه عمرها ما مرت على بالى وان كنت بفتكر انها من الاعتقادات المصريه اللى من ايام المماليك ولا الفاطميين 

بس مره صديقه ع الصفحه سألتنى عليها 

وفكرت انى ممكن ملاقيش لها تفسير بس اتصدمت كذا صدمه

اول حاجه انى لقيت للعاده دى تفسير اه كانت عاده ومنتشره كمان

ثانى حاجه انها من ايام الفراعنه لا هى مملوكيه ولا فاطميه

تالت حاجه ان التقليد ده له حكايتين هاحكيهم الاتنين لانهم منطقيين ومتقدرش ترجح واحده منهم عن التانيه 

المتفق عليه انه بيرمز لرحيل شخص وان الشخص ده غير مرغوب فيه وبركة انه  غار غير مأسوف عليه و اكسر وراه قلة 

والروايه الاولى بتقول :  

ان أصل المثل يرجع للنص الثاني من عصر الأسرة الثالثة عشرة الفرعونية وهو العصر اللي اتسمي تاريخياً بعصر « الاضمحلال الثانى » ودى الفتره اللى كان الملوك المصريين ضعاف فاحتلنا و حكمنا الهكسوس وكانت فتره صعبه ف حياة المصريين اتكلمنا عن جانب منها لما اتكلمنا عن الملوخيه فاكرين 👇

https://www.facebook.com/100022862494719/posts/1112507066188033/

فساعتها لجأ المصريين  – من خلال كهنتهم – لاستخدام التعاويذ يكش يحل عنهم الهكسوس اللى بيحكموهم .. هم واللى بيساعدوهم ومعاهم اتباعهم يعنى

و علشان كده كان الكهنة بيجيبوا آواني من الفخار ويعملوها تماثيل على هيئة اللي عاوزينه يمشى من الحكم او يموت  المهم يغور باى طريقه فيكتبوا تعاويذ بالحبر الأحمر عليها وبعدين يكسروها  علي اعتبار إن  التكسير الرمزي ده  هيكسر عزيمة الاعداء دول ويقصف عمرهم

ودى الحكاية الاولى 

اما الحكايه التانيه فهاحكيها الليله الجايه اذا احيانا ربنا 

بس ع العموم متنسوش لو حابين تقرأوا حاجه تانى من عندى 

اكتبوا الهاشتاج #الليله 

وجنبه اى رقم اقل من٦٠٧

هتقراوا لما تزهقوا .. دا لو فاضيين اما لو مشغولين زيى فاكيد هتعذرونى و ادعولى

ولو مش بتشوف حواديتى اليوميه بانتظام يبقى ممكن تعمل متابعه وسى فيرست 

ولو عجبك اعملوا لايك وكومنت وشجعونى اكمل 

#فوتكم_بعافيه_وعفو_ومعافاه

#حكايه_ورا_كل_مثل

#ابتسام