#هو_انت_ازاى_اتعلمت_اللغه؟؟#الليله٢٨٠
#هو_انت_ازاى_اتعلمت_اللغه؟؟
#الليله٢٨٠
حكينا ازاى اكتشفت اللغه الهيروغليفيه وولادها الديموطيقيه و الهيراطيقيه
واحده واحده على يد بوشار و شامبليون ويونج وغيرهم
ومع ان المصريين كانوا بيعرفوا يقرأوا الهيراطيقيه لحد فتره مش زمان اوى
بدليل حجر رشيد اللى اتكتب سنه ١٩٦ ق. م. بالهيراطيقيه والهيروغليفيه
بس زى ما قلنا الليله السابقه ان دوام الحال من المحال
علشان كده ابتدت الكتابه بالهيروغليفيه واخواتها تنقرض واحده واحده
وزى ما احنا عارفين ان العلماء بيقولوا اللغه كائن حى واذا توقف الناس عن استخدامها اصبحت لغة ميته
بردو ايه اللى خلى الهيروغليفيه تنقرض
تعالوا واحده واحده
= عامة الشعب بيستخدم القبطيه كلام بس ... صح
-- صح
= والكهنه بيستخدموا الهيروغليفيه والهيراطيقيه كتابه ... صح
-- صح
= وعلشان الدين المسيحى ابتدى من تحت لفوق
-- يعنى ايه ؟؟
= يعنى انتشر بين عامة الشعب وبعدين اعتنقه الساده والحكام من الاباطره الرومان
علشان كده اتحفظ واتكتب
طبعا كهنة المعابد رافضين الدين ده ومش معترفين به اصلاً
وبالتالى لا هيتعلموه ولا هيكتبوا كلام الكتاب المقدس بلغتهم
-- طب يعنى بالعقل كده معنى كلامك ان الكهنه رفضوا الدين المسيحى و بالتالى رفضوا يسجلوا كلامه بلغتهم
= اه
-- بس عاوزه تفهمينى ان مفيش ولا واحد من الكهنه دول امن بالمسيحيه
بلاش الكهنه
واحد من الكتبه
واحد من الشعب عادى بيعرف يكتب هيروغليفيه او احدى اخواتها امن بالدين الجديد وقرر انه يسجلة بالكتابه دى
= اقولك اه ممكن
بس زمان مكانش فى طباعه ولا نشر ولا شير
من اللى مش بتعملوها لبوستاتى دى
مع انى هدعيلكم
ما علينا ... بلاش عتاب على رأى حُلم
فاللى كتب مش هيلاقى اللى ينسخ
ولو نسخ مش هيلاقى اللى يقرأ بعده
ولو عمل كذا نسخه مين اللى يقرأ لغه كل مادا عمال يقل مستخدمينها
ولو كان فى اللى يقرأ هيكونوا كام نسخه ولا كام واحد ولا مين اللى يحتفظ بيها اكتر من ٢٠٠٠ سنه علشان نلاقيها احنا
متنساش ان الشعب قاطع المعابد بعد ايمانه بالمسيحيه
فمحدش بقى يبعت ولاده يتعلموا اساسا عندهم
وهم يا حرام فقلوا ابواب معابدهم عليهم وقعدوا يموتوا واحد ورا التانى لحد ما خلصوا
اعتقد ان دا كله حصل من قبل حتى ما الاباطره الرومان يأمنوا بالمسيحيه وتبقى الدين الرسمى للبلاد
-- طب وبعدين ؟؟؟
= اللى حصل ان المؤمنين بالمسيحيه فضلوا يتناقلوها شفاهة كده بردو بلغتهم اللى بقت منتشره دلوقتى اللى هى القبطيه
-- تلقين لبعض
= اه
-- اشمعنى اليونانيه ؟؟
= احنا عارفين ان لما جم اليونانيين واحتلوا البلاد فرضوا اللغه اليونانيه هى تكون اللغه الرسميه للبلاد -- كتابةً --
مش عارفين ؟؟
تمام اديكوا عرفتوا
وبالتالى بقت منتشره زى ما قلنا بعد ما اليونانيين فرضوها لغه رسميه للبلاد
و بالتالى المصريين حفظوا دينهم باللغه القبطيه ... شفاهه والمتعلمين يونانى قرأوه باليونانيه
وبكده اصبحت القبطيه هى الوريث اللى فاضل على لسان الناس
خصوصاً وانها هى اخر ما بقى من لغات الفراعنه
-- بس دى مش مكتوبه
= اه صح
-- طب نعمل ايه ؟؟
= نكتبها بالقبطيه
-- طب ازاى والقبطيه اصلاً مش مكتوبه كحروف اساساً
= احكيلك
جه ف كده ف بداية القرن الثالث الميلادى واحد اسمه بنتينوس
ودا ياسيدى كان مدير مدرسه اللاهوتيه ف الاسكندريه
وقام عامل ايه ؟؟؟
خد الكتاب المقدس اللى باليونانيه واللى كان مثلا اثناء الدرس او العظه
يُقرأ باليونانيه ثم يترجم شفاهة للقبطيه
و دا كان النظام لحد ما هو بقى اخد حروف يونانيه واستخدمها لكتابة الحروف القبطيه المنطوقه
طب معلش اوضح اكتر لو حد مش فاهم ومتقولوش عليا رغايه
الفكره ان نفترض مثلا ان مفيش حروف للغه العربيه ... تمام
وانا عاوزه اكتب كلمة بتنجان
هاجيب الحروف الانجليزى واكتب بيها الكلمه كده betngan
-- يا سلام
جيبتى التايهه يعنى ما احنا بنعمل كده بالفرانكو اللى مش عاجبكم يا جيل يا قديم
= صح انتوا بتقلدوا السيد بنتينوس
بس السيد بنتينوس مصرى فعمل زى ما كل المصريين بيعملوا
-- عمل ايه ؟؟؟
= حط التاتش بتاعه
مش هو مصرى ؟؟؟
فين التاتش المصرى المعتاد ....
المصريين اللى عملوا البيتزا الايطاليه بالفطير المشلتت وسموها بيتزا شرقى
اللى عملوا الكريب سوزيت الفرنساوى بالبطاطس المحمره وباعوها ب١٢ جنيه
المصريين اللى عملوا الكشرى ال .....
ثانيه واحده ايه اللى دخلنا ف الاكل دلوقتى ... شكلى جعانه
بس مش موضوعنا انتوا ذنبكوا ايه ف عصافير بطنى
كنا بنقول ايه ؟؟ ....
اه ... المصريبن حطوا التاتش بتاعهم
وجابوا ٧ حروف من الديموطيقيه
كمان منهم حرف مبيستخدموهوش ف الكلام واعتبروه رقم بس
المهم انهم جمعوا ٣٢ حرف و أُنعت على كده
زى ما حضراتكم بتحطوا ارقام 8 و 7
بدل الحروف العربيه اللى مش بتتنطق بالانجليزى لما بتكتبوا كلمه فرانكوا هم عملوا كده وكملوا الكتابه القبطيه بال٧ حروف ديموطيقيه
ودا اللى حصل الكلام اللى بتكلموه متغيرش ممكن اه ممكن نزود مفردات بس الكلام مبيمشيش
-- امال ايه اللى مشى
= اللى مشى هو التعبير عنه كتابةً
كده عرفنا ايه اللى خلى الهيروغليفيه تنقرض ؟؟
ان اللى حافظينها و بيستخدموها ماتوا ف معابدهم اللى صارت قبورهم
هم وعلومهم و معارفهم واسرارهم الا ما تم تدوينه وعرفنا نترجمه على يد شامبليون والاخوه الافاضل
اما القبطيه فحفظتها المسيحيه
او هى حفظت المسيحيه
ف الاديره والكنائس
اه صحيح نسيت اقول الكلمات المصريه القديمه اللى لسه بنستخدمها
بكره بقى
والكلام لسه مخلصش عن بلدنا و
تاريخنا
اتمنى اكون وضحت حاجه واتمنى اللى قرأ يشير ويقول رأيه
او يحط نقطه بس دليل ان الكلام ده حد شافه
لحد ما مارك يعمل البرنامج بتاع من زار بروفايلك مؤخرا واقفشكم
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٨٠
#ابتسام
تعليقات
إرسال تعليق