#هو_انت_ازاى_اتعلمت_اللغه_ج٤الاخير؟؟#الليله٢٨١
#هو_انت_ازاى_اتعلمت_اللغه_ج٤الاخير؟؟
#الليله٢٨١
وقفنا المره اللى فاتت ان المصريين امنوا بالمسيحيه
وانهم ف البدايه كانوا بيقرأوا الكتاب المقدس باليونانيه ويترجموه شفاهه اللى القبطيه المنطوقه الغير مكتوبه
وبعدين نجحوا انهم يترجموا اللغه الغير مكتوبه دى لكتابه بالاستعانه بمزيج من الحروف اليونانيه والمصريه القديمه
المهم ان المصريين امنوا بالمسيحيه قبل اعتراف الاباطره الرومان بها وانها تبقى الدين الرسمى للبلاد
و اللى حصل ان الكلام اللى بتكلموه متغيرش ممكن نزود مفردات بس الكلام مبيمشيش
امال ايه اللى مشى
و لو المحتلين كانوا بيحاولوا يقطعوا اى علاقه لنا بالفرعونيه بلهجاتها
زى ما قلنا ان اليونانيين فرضوا لغتهم اللغه الرسميه للبلاد
والرومان عملوا ايه ؟؟؟
معملوش زيهم
اه كانوا طيبين ورجعوا الهيروغليفيه ؟؟
لاء
طب حافظوا ع القبطيه ؟؟
لاء بردو
هم فرضوا اللغه الرومانيه جنب اليونانيه
طب واللغات المصريه يا جدعان
لاء دى مش مهم
طب ليه ملغوش اليونانيه وفرضوا الرومانيه بس
اصل فى فرق بين اليونانيين والرومان ف حكم مصر
ازاى ؟؟؟
البطالمه كانوا الملوك بيحكموا مصر بس وممكن بالبلاد التابعه لها جنوبا وغربا
والعاصمه اسكندريه والملك عايش فيها
ومالوش متوى تانيه وكانوا بيطلقوا على نفسهم ملوك مصريين وبيتعلموا اللغه المصريه مع لغاتهم كمان
اما الرومان فهم بقا قياصرة روما ومصر دى
يدوبك مقاطعه او اماره من ممتلكتهم
ما هم اللى قالوا ان البحر المتوسط ده بحيره رومانيه
اه .. مصر من اكبر الامارات
و اه .. هى مصدر القمح السعيد
و اه .. هى سلة غذاء روما
وكل حاجه
بس تفضل مش عاصمة البلاد
يعنى يلغوا جذورنا علشان نرتبط بالمحتل ولغته وثقافته وعباداته والهته
بس ملغوش اليونانيه لانهم سابوا الادارات ونظام الحكم على حاله من تفاصيل ف ايد اليونانيين
بقى فى طبقه حاكمه من الرومان
وطبقه تانيه مميزه من البطالمه وباقى الشعب من المصريين بيتكلموا القبطيه وزى ما قلنا بعد مرور اكتر من ٢٠٠ سنه ميلاديه بقوا يكتبوها كمان ... ولحد كده تمام
الا وف سنه ٦٤١
ودخول الفتح الاسلامى لمصر
وهسيب تحت رابط لموضوع ليه نقول الفتح الاسلامى لمصر
ومنقولش الغزو
وليه نقول الغزو العثمانى لمصر ومنقولش الفتح
وبدا العرب بدينهم ولغتهم العربيه يدخلوا مصر
وحصل حاجه غريبه العلاقه بين العرب والمصريين بقت علاقه امتزاج واختلاط
بنعلم الاطفال ف العلوم ان فى خليط يمكن فصل جزيئاته زى السلطه ممكن تفصل الخيار عن الطماطم والفلفل
٠٠وفى خليط لا يمكن فصل جزيئاته زى السكر ما بيذوب فى كوب الشاى
العلاقه بين العرب الوافدين والمصريين المقيمين بقت زى الحاله الثانيه
زى السكر ف الشاى
كفك 🤝 و من غير ما تقولى ازاى🤔
ونقلش وكده 😆
بايخه 😔
طيب هكمل
قلنا ذوبان العرب ف المصريين القدماء عامة والمسلمين منهم خاصه
بدليل ان محدش مننا يعرف اذا كانت جذوره الاوائل قبل ٦٤١ اصلها مصرى ولا عربى
وبدا المصريين يأمنوا او يتعلموا او يتعاملوا او بتجوزوا من العرب اللى بقوا يتدفقوا لمصر
العضو الجديد فى الكيان الاسلامى مصر اللى فضل يتنامى
لحد ما وصلنا ف فترات كتيره ان تكون مصر هى اللى بتقود المنطقه كلها بما فيها الحجاز والحرمين الشريفين والشام والمغرب العربى
وتعالى نروح للغه الخامسه
بعد
١ الهيروغليفيه
٢ الهيراطيقيه
٣ الديموطيقيه
٤ القبطيه
٥ العربيه
= ثانيه واحده
ثانيه واحده
انت ازاى بتقولى ان العربيه التطور الخامس للغه المصريه القديمه
-- انا مش بقول انها التطور الخامس للغه المصريه القديمه انا بقول ان اللغه العربيه بقت اللغه الخامسه اللى بيتكلمها المصريين من اكتر من ١٤٠٠ سنه وحتى الان
هى مش زى اللغات السابقه ابتدت على ارض مصر واتطورت لها
ولكن هى دخلت مصر وزى ما الجين العربى امتزج بالجين المصرى القديم
اللغه العربيه امتزجت بالمصريه القديمه وبقى خليط من النوع التانى اللى لا يمكن فصله عن بعضه
حته تاريخ قديم للغه العربيه اللى يقال ان اول من تكلم اللغه العربيه هو سيدنا هود
وقالوا سيد نوح وقيل بل سيدنا ادم
ويقال ان العرب اللى كانوا قبل إسماعيل عليه السلام: العرب العاربة وهم قبائل كثيرة اشهرهم عاد، وثمود، وجرهم، وطسم، وجديس، وأميم، ومدين، وعملاق، وعبيل، وجاسم، وقحطان، وبنو يقطن، وغيرهم.
وأما العرب المستعربة: فهم من ولد إسماعيل بن إبراهيم عليهم جميعا وعلى نبينا الصلاة والسلام
وكان إسماعيل بن إبراهيم عليهما السلام أول من تكلم بالعربية الفصيحة البليغة، وكان قد أخذ كلام العرب من جرهم
وجرهم دول القبيله اللى جت وسكنت جنب ستنا هاجر واللى حكيت حكايتها قبل كده ف قصة #هاجر_الاميره_المصريه_ام_العرب
نرجع للعربيه اللى زي ما قلنا ان سيدنا اسماعيل ابو العرب هو اللى نطقها بالعربيه الفصحى واللغة اللى كان بيتكلم بها الرسول صلى الله عليه وسلم
ونزكب آلة الزمن بتاعتنا
وعلى الركاب الاحتفاظ بايديهم وارجلهم داخل العربه
وحشتنى الملاهى وقطر الموت ... ما علينا
نروح لعصر الرسول عليه الصلاة والسلام
ونزول الوحى
ثم تسجيل القرآن وحفظه
واللى بصراحه لم تواجههم ما واجه الانجيل فى مصر من عدم وجود حروف مكتوبه للقبطيه فاضطروا انهم ياخدوه ويترجموه شفاهه لحد ما جه بنتينوس لتسجيله بحروف
زى ما حكينا ف #الليله٢٧٠
لاء الحمد لله كان الناس عارفين اللغه العربيه شفاهه وكتابه
تمام
طب ايه المشكله ؟؟
المشكله ان معندهمش ورق
لا فى ورق بردى زى المصريين
ولا ورق من لحاء الشجر زى الصينيين ولكن كانوا بيكتبوه على اى سطح يصلح للكتابه عندهم
جلد الغزال
سعف النخل
ضلوع الحيوانات
ولكن المخزن الاكبر للقرآن كان صدور المؤمنين وحفظهم له
ومشيت الدنيا
بس بعد وفاة الرسول صلى الله عليه وسلم وحروب الرِده اللى هى مسيلمه الكداب واخواته من الكافرين والمرتدين
استشهد كتير من حفظة القرآن وكان لازم يتسجل
وفعلا اتعمل اول مصحف جامع لكتاب الله كامل ف عهد ابو بكر الصديق
وكبرت الدوله الاسلاميه و انتشر الاسلام والمسلمين وبدأ من بعدابو بكر يعمل سيدنا عمر بن الخطاب نظام الدواوين والملفات وان كل حاجه تتسجل وتدون وطبعا باللغه العربيه
ودا كان ماشى زى الفل
وخف رجلك معايا كده على آلة الزمن بدل ما تطلع وتسيبنا دا هم خطوتين قصدى ٤٠ او ٥٠ سنه ف عهد عبد الملك بن مروان اللى لاحظ ان الدواوين كلها بالعربيه ماعدا ديوان الخراج الماليه يعنى والضرايب وكل انواع الدخل
لقاه ف العراق بالفارسيه
وف مصر والشام باليونانيه
خد بالك داخلين ف القرن ال٨ الميلادى واكتر من ٧ قرون تحت حكم الرومان
وزى ما قلتلك لسه بيستخدم المصريين اليونانيه ف المكاتبات والمعاملات والدواوين
بس عبد الملك قال
لاء
بس بقى ... كفايه كده
كل الدواوين عربيه
ودا ادى ان بعد فتره كان
الناس بيتعلموا العربيه علشان معاملاتهم
وولادهم تعلموها ويتعاملوا ويشتغلوا بيها
هتفيدنا ايه الفارسيه واليونانيه والقبطيه ف الدوله الاسلاميه حتى ولو كانوا على غير الدين الاسلامى
وبالتالى القبط المصريين اللى اسلموا هم لسه قبط بردوا لان القبطيه هى صفة لسكان مصر وليس لدين معين
يعنى اللى اسلم هو قبطى مسلم واللى ظل على المسيحيه هو قبطى مسيحى
لكن اللى حصل ان المصريين من غير المسلمين حافظوا على لغتهم القبطيه
واللى امسلموا خلاص بقى جيل ورا جيل بتوه منهم القبطيه
فضلت ف الانجيل وفضلت ف الكنائس والاديره
غير كده وحتى المسيحيين من المصريين ....
نسينا القبطيه
بس منسيناش
مم ... و امبوه
افسيخى ... فسيخ
أأمر العيش .. يعنى اسخن العيش
كانى سمن ... و مانى عسل
منيل ... وموكوس
ويا دهوتى .. ودهل .. ومدهول
وبح ... يعنى خلص
وعبيط ... وهسكعك ... شلق
وبخ ... يعنى شيطان
وتنح ... وهلس ... ومهيص
اوباش ... ناس حقيره
اوطه ...
وبطط و بطح
ست .. سيده
وتاته وخم وحبه وياما
والفول مدمس .. متمس
والبصاره .. بيصارو
و شبشب ومقهور ...نونو ... هوس .... مأأ ... دقق النظر ...
ادى ،فاس ، شادوف ، شونة ، جرن ، ماجور ، زير ، مشنة ، بقوتى ، سلة ، بشكير ، فوطة، تخت، ششم، بتاو، ختم ، طوبة ..
وغيرهم كتير
اساسا احنا كلامنا اغلبه فرعونى واحنا اللى خليناه عربى
وفى حكيات تانيه عن اللغه وغيرها ف مصر ام الدنيا وبطلت قصتها الاولى
قصة العلم والحضاره
قصه اللغه والكتابه
قصه الاستقرار وبدايه البشريه
وكم بكٍ يا كيميت من بدايات
#ابتسام
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٨١
#ابتسام
تعليقات
إرسال تعليق