#الملك_اغنى_ولا_الصياد #الليله٢٨٢

#الملك_اغنى_ولا_الصياد 

#الليله٢٨٢

عاوزه ف نهاية القصه نقول مين اللى غلطان 

اللى اشار 

ولا اللى سمع مشورته ونفذها بدون تفكير 

كان ياما كان ...  ف بلد من البلدان 

كان صياد بيصطاد

كان فقير وبيقضى يومه بالكاد 

خرج الصياد من الفجر ورمى شبكته ف البحر 

ولما شدها كانت تقيله 

وعرف يطلعها من الميه بالتيله 

طلعت فيها سمكة ضخمه و كبيره 

اكبر سمكة شافها ف حياته الطويله 

روح لبيته ووراها لمراته 

مراته  ذكيه ودا اسمها 

و كمان صفاتها وطبعها 

روح يا مسعود ودا اسم الصياد 

على قصر ملك البلاد

وقوله دى هديه 

هيديك بدل الدينار ١٠٠

سمع الصياد كلام ذكيه وراح قصر الملك وقدم السمكه هديه 

الملك كان ف قاعة  قصره الفخيمه

ومعاه مراته الملكه فهيمه 

دخل الصياد مسعود 

وقدم الهديه بكل كرم وجود

فرح الملك ورحب 

ومن حجم السمكه استعجب

وقال هدية مقبوله وكرم وفير 

وعطاله ٤٠٠٠ من الدنانير 

مسعود كان فرحان وخارج وهو مش مصدق نفسه كمان 

بس قبل ما يوصل الباب

بدات الملكه فهيمه ف الزن والندب  والعتاب 

وازاى تديله كل المبلغ ده 

ولو جيت بعد كده عطيته لامير ولا وزير هيقول الملك ساوى بينى  وبين حتة صياد فقير 

رد الملك طب والحل وكلام الملك لازم يمشى 

لان هبات  الملوك متتسحبشِ

خلاص بقى رزقه واللى قلته يمشى 

بس الملكه قالتله استنى

ونفذ اللى هقولك عليه واتأنى 

انا عندى الحل قوله واوعى تنسى 

اندهله بسرعه واسأله 

السمكه دى ذكر ولا انثى 

قالك انثى قوله كنت فاكرها ذكر 

قالك ذكر قوله كنت فاكرها انثى 

وتسحب من الدنانير ٢٠٠٠

ويبقى هو اللى غلط وبكده يكون الملك مكر 

بس من عطيته وكلامه  ما نكر 

وندهوا على مسعود قبل ما يروح 

ورجع مسعود وهو مخضود

وحاسس ان الحكايه فيها إن 

ولسان حاله بيقول 

ورجعت مش عارف مالى مش عارف مالى

معرفش ايه اللى جرالى ايه اللى جرالى 

فرحان عاوز اضحك 

مهموم عاوز ابكى 

لا دموعى طايلها 

ولا ... لاقى حد اشكى

ودا كان كلام حسين السيد ف اغنيه فاتت جنبنا  .. اللى كان عمال يدندنها الصياد ليلة امبارح بس حس انها لايقه على اللى بيحصل النهارده 

لانه كان فرحان بال ٤٠٠٠ دينار عطية الملك 

مش مصدق ان ممكن الملك يزودها 

بس بردو خاف الملك  يسحبها 

بس لا مفر ولا خيار ... 

ووقف بين ادين الملك وهو محتار 

ولما الملك سأله هى ذكر ولا انثى 

فهم ساعتها ال  إن وعرف ان الملك عنده نيه مش هى

وقاله يا مولاى دى خنثى 

لا هى ذكر ولا هى انثى 

وضحك الملك من ذكاؤه وامر له ب ٤٠٠٠ دينار تانيين 

وخرج الصياد وهو فرحان مش مصدق نفسه

ال٨٠٠٠ دينار تقيله

علشان كده شالهم على ضهره 

بس وهو خارج وقع من الكيس اللى على ضهرة دينار

وساعتها الصياد نزل الدنانير اللى على كتفه على الارض

ووطى خد الدينار من ع الارض

كل ده والملك والملكه شايفين ومستغربين 

ووطت الملكه على ودن الملك تانى ووشوشته 

ونده الملك

وقاله استنى يا مسعود 

ومسعود من الخوف والرعب  كان هيموت 

ليه ؟؟

وبينده تانى الملك ليه ؟؟؟

وخاف مسعود 

بس مفيش ف ايده غير انه قدام عرش الملك يعود 

عايزه الملك ليه ؟؟؟

كل شئ وله مردود 

بكره باذن الله هنعرف الملك ندهه ليه  و ايه كان المقصود 

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٨٢

#ابتسام