#جميله_و_سميره#الليله٢٨٥
#جميله_و_سميره
#الليله٢٨٥
كان ياما كان يا فؤاد يا ابتسام ولا يحلى الكلام الا بذكر النبى عليه الصلاة والسلام
ودى كانت المقدمه المعتمده لماما ف اى حدوته
كانت بتقول سعد واكرام دول مش ولادها ولكن ولادها هم فؤاد الله يرحمه وابتسام
ياريت تخلوا حواديتكم فى حاجه بتميز ولادكم لانها بتفرح اوى
كان فى بنت اسمها جميله وكانت فعلا جميله فى الشكل ... وجميله ف الروح
جميله مامتها ماتت وباباها اتجوز ست عندها بنت قدها ف السن اسمها سميره
وسميره كانت عكس جميله ف كل حاجه ماكانتش جميله ف الشكل وماكانتش جميله ف الروح كمان
كانت انانيه ...
وكسوله ...
وطماعه ....
وكانت دايما بتاخد كل حاجه عند جميله لنفسها
وف يوم من ايام الحر الشديده اوى ف الصيف صحيت مرات ابو جميله بعد الضهر
وبعد ما كانت جميله خلصت شغل البيت كله
و حضرت الاكل
و لسه هتقعد علشان ترتاح لانها بتصحى مع الشروق
لكن ترتاح ازاى ؟
وليه ؟
مرات ابوها طلبت منها انها تروح البير اللى ف الغابه تملا الجره لان هو دا المكان اللى الميه فيه بتبقى ساقعه ف الوقت ده
و لا يعنى احنا عاوزينها تشرب ميه مش ساقعه ( زمان مكانش فى ثلاجات )
ومفيش ميه ساقعه الا اللى ف البير اللى ف وسط الغابه
شالت جميله الجره على دماغها وراحت لحد البير
البعيد ف الحر الشديد وملت الجره وهى راجعه
سمعت صوت بينده عليها : يا جميله ... يا جميله
وبصت جميله ولقت الصوت جاى من حوض شجر الورد🌹
وان شجرة الورد هى اللى بتنده عليها
ردت جميله وقالت لها : نعم
ردت شجرة الورد وقالت : ممكن تسقينى بالميه اللى معاكى
النهارده الحر شديد اوى .. والجناينى مجاش
و لو استنيته لبكره هكون دبلت ومت
و جميله من غير كلام ولا تفكير فضت قدرة الميه
على شجرة الورد🌹
ساعتها شجرة الورد فضلت تدعيلها
وتقولها ربنا يجعل لونى الاحمر ف خدودك ❤
و ساعتها ....
اتحول لون خدود جميله للون الورد ❤🔴
ورجعت تانى جميله للبير علشان تملا منه الجره
و لما ملت الجره من البير
قابلتها شجره الياسمين🌼 ⚪
وطلبت منها ميه وسقتها جميله بكل الميه اللى ف جرتها
وشكرتها شجرة الياسمين و دعت لها ان بياضها يكون ف لون جبينها
وشافهم البرسيم☘ اللى ف حوض البرسيم
وطلب منها ميه
طبعا سقته ودعالها ان لونه يكون ف عنيها💚🟢
والقمح 🌾
اللى دعى ان لونه يكون ف شعرها👱♀💛🟡
والذره 🌽اتمنت لها ان طولها يبقى ف شعرها
والفراوله 🍓دعتلها ان لونها يكون ف شفايف جميله 🔴
اما الفل فقالها ان لون اسنانها يكون من لونه ⚪
رجعت جميله البيت قمر ١٤
اجمل من اما كانت الف مره
واستغربت مرات باباها واتغاظت وسألتها عن السبب وجميله مينفعش تقول على خير عملته وقالت لها مليت الجرة من البير وبس
طبعا مرات ابوها استغربت
بس يا ترى هتعمل ايه ؟؟
دا اللى هنعرفه لما نكمل بكره ...
#الجمال_جمال_الطبع
#امى_وحواديتها
#ابتسام
تعليقات
إرسال تعليق