#لقاط_ابن_لقاط_ج١#الليله٢٨٨

دعواتكم البرد هيموتنى 

#لقاط_ابن_لقاط_ج١

#الليله٢٨٨

قصة طويله من قصص امى الله يرحمها كانت بتدفى ف ليالى الشتا وتونس ف زهق الضلمه لما النور يقطع 

وتسحبنا ف دنيا السحر لما ملل الصيف يزهقنا 

كان ياما كان يا فؤاد يا ابتسام ولا يحلى الكلام الا بذكر النبى عليه الصلاة والسلام

كانت فى اميره جميله ووحيدة ابوها الملك وكانت متدلعه اوى وممكن تقول  مغروره خالص وشايفه انها احسن من كل الناس 

وليه متفكرش ف كده وهى بنت جميله ورشيقه ومتدلعه غير انها البنت الوحيده لملك البلاد

كان بيجيلها عرسان كتير وكانت دايما تطلع فيه عيب

اللى طويل اوى .. واللى قصير خالص

اللى تخين اوى .. واللى رفيع جدا 

اللى منخيره كبيره واللى شنبه بيضحك

اللى صوته رفيع زى المعزه واللى رقبته طويله زى الزرافه 

وهكذا لازم تلاقى ف العريس عيب 

ولو مفيش ف شكله عيب يبقى ف طبعه او تصرفاته

اللى ممل او رغاى او مبيتكلمش 

 

وبعدين جالها عريس خالى العيوب .... امير من بلاد بعيده مملكته اكبر من مملكة ابوها 

كمان كان وسيم وذكى بس كمان طيب ومش مغرور 

والملك فرح بيه اوى 

والاميره المغروره ما لقتش فيه عيب وبالتالى وافقت عليه وكتبوا الكتاب وعملوا الافراح وطبعا زى عُرف زمان مش قعدوا مع بعض قبل الزفاف الا بس الرؤيه الشرعيه 

ويوم الفرح وبعد المعازيم ما مشيوا قعد الامير وزوجته الاميره ف 

مخدعهم وبدأوا العشا ... فبياكلوا رمان وقعت حبايه رمان من طبق الامير على الارض وعلشان الامير متواضع وعارف طبعا ان البساط الابيض ناصع البياض واللى اتفرش اليوم ده بس وهم اول حد يقرب له و بالتالى نضيف 

ومن تواضعه مد ايده واخد حباية الرمان من على الارض 

وفجأه قامت الاميره وثارت وزعقت 

وقالت : ( لقاط ابن لقاط بياكل الرمان من ع البساط ... خد راسه يا سياف )

وقبل ما الامير يستوعب او ياخد موقف 

كان الحراس بتوع الاميره قابضين عليه ومسلمينه للسياف

طبعا الامير مشى مع السياف بس وهو ف الطريق فهمه ايه اللى حصل وانه معملش حاجه تستدعى ان راسه تطير 

وكمان ان ابوه الملك لما هيعرف مش هيسكت وهييجى بجيوش تدمر مملكتكم 

وطبعا بعد ما يموت الملك والاميره هيعرف مين اللى قتل ابنه وتخيل ساعتها هيكون ايه عقابك

طبعا السياف خاف واطلق سراحه 

والامير مشى من البلد دى بس كان لازم يسترد كرامته ويأدب الاميره زوجته اللى امرت بقتله علشان أكل حباية رمان من ع البساط 

مملكة زوجته الاميره 

كان ممكن يهرب ويرجع بلده وممكن ساعتها يرجع بجيش جرار ينتقم منها ويبيد بلدها 

بس الامير مش بيحب الحرب 

كمان هو حب الاميره 

حس انها فيها حاجه كويسه بس الغرور عاميها علشان كده 

مرجعش بلده

 

لقى ف البلد اللى جنبهم دى سيرك طبعا كان ف مملكته مهرجين القصر دمهم خفيف وحركاتهم مضحكه وهو كان من وهو صغير بيعرف يقلدهم وياما كانت مامته الملكه بتحب يعملها حركات المهرج 

المهم راح لصاحب السيرك وعرض عليه يشغله معاهم وعمل حركات 

عجبتهم اوى ووافق صاحب السيرك يشغله عنده

وخلاص  اشتغل معاهم وشجع اصحاب السيرك انهم يروحوا يعرضوا  ف المملكه المجاوره

طبعا من غير ما حد يتعرف على شخصيته الحقيقيه 

ودخلوا المملكه وهو طبعا مخبى ملامحه بالاصباغ والالوان بتاعة المهرج وبدأوا يعملوا العروض بتاعتهم ف وسط ميدان المملكه 

والخدم والجوارى يرجعوا يحكوا عن السيرك وعن المهرج ابو دم خفيف وعرضه الممتع 

امرت الاميره انهم يعملوا العرض بتاعهم قدام باب جنينه القصر وعجبوها اوى وخصوصا المهرج وامرت تانى انهم يقربوا ويبقوا جوه الجنينه علشان تشوف احسن 

وحبه حبه ويوم ورا يوم يقربوا 

وتهتم اكتر بالمهرج اللى كان بيضحكها وبيعجبها العرض بتاعه اوى 

بقى يفضل المهرج بعد عرض السيرك ما يخلص يعمل عرض مخصوص للاميره اللى بقت تسمحله يبات على باب القصر ... ثم جوه القصر ثم  الجنينه وشويه شويه  بقى على باب الغرفه بتاعتها 

وبعدين بقى جوه الغرفه بتاعتها بعد ما حبته واتعلقت بيه اوى مع انها متعرفش ملامحه اللى دايما مستخبيه تحت الالوان بتاعة شخصية المهرج ... لكن هى حبته اوى 

وبعد فتره اصبحت حامل ... يتبع

اكمل بكره ✋

#حكايات_امى_ادعولهابالرحمه

#لقاط_ابن_لقاط_ياكل_الرمان_من_البساط

#والله_معرفش_للحدوتةغيرالاسم_ده

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٨٨

#ابتسام