#لولاك_يا_كمى_ماكلت_ي_فمى #الليله٢٨٧

#لولاك_يا_كمى_ماكلت_ي_فمى

#الليله٢٨٧

مثل دمه خفيف بنقوله لما نكون بناكل والكم الطويل يغرز ف طبق الفول ولا يغمز معانا مسقعه 

ساعتها طبعا احنا بنكون مركزين ف عملية شحن الكرش ... فاحدى الصديقات او الاصدقاء ينبهك ويقولك حاسب يا عم كمك بياكل معانا 

فتضحك وتقوله اولاك يا كمى ما كلت يا فمى 

وتجرى ع الحمام - بعد ما الاكل يخلص طبعا - تغسل كمك

بس المثل له حكايه 

و جه دورها اننا  نعرفها 

الموضوع ان فى الريف زمان لما يكون فى فرح او مناسبه حلوه 

بيتعمل وليمه ويتدبح دبايح خصوصا لو صاحب المناسبه ثرى او زى ما بنقول عليهم ناس مبسوطين 

المهم ان الناس وخصوصا الفقراء بيستعدوا للعزومات دى ولازم يروحوها علشان ياكلوا لحمه

لان الريف فى مصر من زمان فى طبقات اغنيا ودول قلة  ومتوسطين ودول يعنى ممكن تقول مستورين

انما الاغلب الاعم فهم فقراء فقر مدقع مبيشموش الزَفر - اللحوم و الطيور بانواعهم - الا ف المناسبات اللى زى دى 

ولما صاحب المثل راح كان ف الاول قاعد محرج ومكسوف وبياكل يادوب الرز والصلصه ولما جرب يمد ايده على اللحمه كانت خلصت وخرج من العزومه واكل شوية رز بصلصه 

بس الجلباب الريفى له كم طويل وواسع ولو جيت تاكل به هيلغوص الدنيا علشان كده الراجل كان مشمر كمه لحد الكوع كده 

بس بردو لوسعه الثنيه دى كانت شبه الجيب فالشخص اللى كان قاعد جنبه وقعت منه حتة لحمه وطبعا معرفش راحت فين افتكرها وقعت ف الارض وكمل اكل 

خلصت العزومه وقاموا الناس اللى اكل ... اكل واللى  مأكلش   زى صاحبنا قام يمصمص صوابعه او حتى يعضها ندماً انه مأكلش 

بطل حدوتتنا قام وبيفرد كمه 

وساعتها .... انّ ... انّ ... آآآآآن 

لقى حتة لحمه كبيره وقعت ف ايده من جوه كمه 

كلها بفرحه وهو بيقول 

لولاك يا كمى ما كلت يا فمى 

المثل علفكره له حدوته تانيه فى بعض البلاد العربيه 

القصه بتقول ان واحد على قد حاله كان معزوم عند ناس اغنيا وهو داخل بلبسه العادى ... فاخدوه يدخل من ناحية الخدم و طبعا الشخص ده احس بالاهانه وخرج من البيت 

ورجع بيته اتشيك و جاب الحته اللى ع الحبل وبقى رايح الفرح وهو ولا اشيك واد ف روكسى 

وساعتها طبعا اهل العزومه استقبلوه استقبال يليق بلبسه الفاخر وقعدوه على افخر الموائد وقدموله احسن الطعام 

وبيتحكى بردو  على ان البطل ف القصه سيده 

وساعتها قال لولاك يا كمى اى - يا لبسى الفاخر - ما كلت يافمى 

وان كان القصد واحد وهو ان الفقير مش لاقى ياكل الا فى العزايم 

وان كنت مقتنعه بالقصه المصريه اكتر 

لانه فى القصه التانيه كان الكلام عن لبسه كله فالمفروض يقول :

لولاك يا لبسى ما كلت يا كرشى 

او لولا اللبس والهندم ماكانت شبعت المدام 

اقترحوا امثال يا جماعه انا طول عمرى شايفه اننا لازم نحط بصمتنا ع التاريخ ونألف امثال 

#حكايه_ورا_كل_مثل  

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٢٨٧

#ابتسام