#وَإِذْ_فَرَقْنَا_بِكُمُ_الْبَحْرَ_فَأَنْجَيْنَاكُمْ١_سيدنا_موسى_الج١٦#الليله٣١٣

#وَإِذْ_فَرَقْنَا_بِكُمُ_الْبَحْرَ_فَأَنْجَيْنَاكُمْ١_سيدنا_موسى_الج١٦

#الليله٣١٣

اخيرًا حنّ فرعون 

طبعا مش بمزاجه بس كتر خيره بعد ما اصبحت حياتهم دم ف دم بعد اللى حصل فى العقوبات اللى ربنا نزلها عليهم

واللى ذكرت ف سورة الاعراف 

(فَأَرْسَلْنَا عَلَيْهِمُ الطُّوفَانَ وَالْجَرَادَ وَالْقُمَّلَ وَالضَّفَادِعَ وَالدَّمَ آيَاتٍ مُفَصَّلَاتٍ فَاسْتَكْبَرُوا وَكَانُوا قَوْمًا مُجْرِمِينَ)

يعنى اتعذب هو وقومه عذاب شديد انتهى بانه سمح لسيدنا موسى وقومه بالخروج من ارض مصر بكامل اعدادهم واولادهم ونسائهم ومواشيهم 

ف فعلاً فرح بنى اسرائيل وخرجوا 

ومع انهم المفروض يخرجوا مطمنين لان فرعون هو اللى سمحلهم انهم يمشوا 

بس ربنا اوحى لسيدنا موسى وقاله تعالى فى سورة الدخان : 

(فَأَسْرِ بِعِبَادِي لَيْلًا إِنَّكُم مُّتَّبَعُونَ )(23)

يانهااااررررر😳

يخرب بيتك يا فرعون اكتر ما هو هيتخرب يا بعيد🙄

يعنى بعد دا كله وف الاخر خارج بردو وراهم 

بررررراحتك ... امشى ورا قدرك

واللى هيسأل هو ليه عمل كده ؟

بالاضافه للسيكوباتيه اللى كان بيتعامل بها مع بنى اسرائيل

من اول النار اللى خلى سيدنا موسى ياكلها وهو طفل صغير  

للسحره والتنكيل بهم و تقطيعهم 

للماشطه والتعذيب البشع لها ولاولادها 

فاحنا بنتكلم عن مريض سادى و جبار من جبابرة الارض

بس كمان فى سبب تانى سبب عسكرى استراتيجى 

هو بردو كان خايف ان سيدنا موسى يرجع ببنى اسرائيل ومعاهم جيش تانى من البلاد المجاوره ويحاربه بسلاح و جنود ... 

ف هو كان حويط بردو مش دقة عبط منه يعنى 

وخرج اليهود من مصر فى يوم اسموه عندهم عيد الفصح اليهودى 

ودا غير عيد الفصح عند المسيحيين اللى بيحتفلوا به قبل شم النسيم بيوم ده 

واللى طبعا عارفين سببه عندهم وهو مالوش دعوه خالص بسيدنا موسى ولكن باحتفالهم بسيدنا عيسى واحداث اسبوع الآلآم 

بس تقريبا هو نفس التوقيت 

وان كان  ... عيد الفصح اليهودى قبله بكام يوم 

هم بيقولوا انه بيوافق يوم ١٤ من شهر ابريل او شهر  ابيب فى التقويم  القبطى القديم 

عيد الفصح ده بيسموه بردوا (عيد الفطير)

والسبب ف التسميه دى انهم بيقولوا انهم كانوا ملحقوش يجهزوا العيش علشان ياكلوه 

فعملوه فطير من غير ما خميره

وبالتالى بيحتفلوا كل سنه ويعملوا فطير من غير خميره 

وفى حكاية غريبه اوى عن الفطير ده مسيرى ابقى احكيها  باذن الله 

والجميل كمان ان الرسول صلى الله عليه وسلم لما هاجر للمدينه المنوره  لقاهم بيحتفلوا بعيد فلما سأل قالوا له ان دا يوم خروج سيدنا موسى من مصر ونجاته من فرعون 

واليوم ده كان يوافق ال١٠ من محرم 

فساعتها صلى الله عليه وسلم قال

(نحن أولى بموسى منكم)

وصام عاشوراء وقال انه نصوم العام القادم تاسوعاء ليخالفهم فى طريقه الاحتفال اه عارفينه طبعا بتاع البليله اللى بالنشا واللى اتسمت عاشوره 

يعنى احتفال ثلاثى الابعاد مسلم مسيحى يهودى مشترك

المهم كان ساعتها عددهم كام 

هم عندهم قالوا ان  عددهم بالالاف  وانهم  كانوا حوالى ٦٠٠ الف رجل غير النساء والاطفال يعنى معديين ال نص مليون رجل بالغ 

وفى باحثين قالوا انهم كانوا اقل من كده بكتير 

خصوصا ان سيدنا يعقوب لما دخل مصر باهله  بعد دعوة سيدنا يوسف له كانوا حوالى ٧٥ فرد وبيقولوا فضلوا ف مصر حوالى ٤٠٠ سنه يبقى مش هيكون عددهم تضاعف كل ده 

وانهم كانوا بس ٦٠٠ فرد مش ٦٠٠ الف

وانا اتفق ان العدد مبالغ فيه 

وان كنت بردوا اعتقد انه اكتر  من ٦٠٠ فرد

وزى ما قلنا ان ربنا حذرهم انهم متبعون 

بس اشطه يعنى دول خرجوا من عبوديه فرعون وقومه 

وهيه ... وهيصه ... خارجين فرحانين بس فى مشكله ظهرت 

 ايه دا .... دول تاهوا ؟؟؟😳

هاراسوس 

تاهوا ازاى ؟؟؟🙄

و ازاى كل العدد ده كله يتوه اذا كان سيدنا موسى عرف يخرج من مصر لوحده ويروح ارض مدين وهو كان نفر  بطوله  وهم كانوا كتير بردو 

سواء كانوا ٦٠٠ او ٦٠٠،٠٠٠ ازاى يتوهوا ؟

هنا عرف سيدنا موسى ان فى حاجه غلط حصلت 

وان فى سبب مانعهم من انهم يمشوا من ارض مصر 

وجمع سيدنا موسى كبار القوم فى السن والعلم وسألهم عن تفسيرهم ان ممكن يكون ايه السبب 

يا ترى هيكون ايه السبب؟؟🤔

#حبيبي_القرآن

#يارب_اكون_فهمتها_صح

#اكثر_من_ذكرت_قصته_في_القرآن_سيدنا_موسي١٦

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٣١٣

#ابتسام