#الليله٦٥٩#ومن_تانى_يوم_الام

#الليله٦٥٩
#ومن_تانى_يوم_الام
الليله هناخد اجازه من خجاوه وحكايتها 
وتعالوا طبطبوا عليا ف مأسوياتى 😂😂 
اسمعوا وعو
بقيت ام بس اتحرمت من حنيه البنات بعد ما ربنا رزقنى بحنيشه الصبيان
 
الاولانى🧔 جابلى شولاتيه من المفتخره ام ١٥ جنيه

والتانى🙍🏻‍♂️ غامض قامط🙇 لم تظهر منه حتى الان اى بوادر مج او طقم كوبايات او حتى ورده بلاستيك وانا اراقب فى صمت وتوجس😞

اما الصغير🧑‍🦰 و اللى ليل نهار بغنيله ماليش امل ف الدنيا دى  غير انى اشوفك معدى سنه رابعه 
مع الاعتذار لليلى مراد  و انى اترحم من مهاتيتى معاه ودعايا للى فبالى وبالكم😏 و ان دعايا عليه يكون من حده ونصيبه
المهم ان كائن المؤء الصغير جه فجأة كده وقلب الحصاله ومصمم انه ينزل يجيب ليا هدية عيد ام و مع انى عماله اقوله بلاش وهديتى انك تعمل الواجب من غير ما تخلينى اعيط 
بس بردو فتح الحصاله واخد الفلوس وانا احايله انه يصرف نظر
واقوله حبيبى ميردش
واقوله ياسيدى ميردش
 طب اعمله ايه ؟؟🤷‍♀️ 
صمم و سيبته و نزل وانا اللى جاى ف بالى أغنية 

بكره تشوفى ابنك راح فين 
وياترى انت فين يا مأمون 
الا ولقيته بيدخل عليا والفرحه ماليه عنيه وف ايده كونو ايس كريم من ابو ٢ جنيه و علبة زبادى طلعت رز بلبن وبكل افتخار قالى جبت لك رزبلبن من ابو ٥ جنيه وكونو ب ٢ ودا بمناسبة عيد الام والبت سما (دى جارتنا وصاحبته) بتقولى دا جايبه لمامتك قولتلها اه😁 والضحكه هتفط من وشه 
طب يا حبيبى حط الكونو ف الديب وسيب الرز بلبن عندك 
وجيت انام قيلولتى علشان اقوم اكمل جهاد الا ولقيته بيقولى انا عاوز ادوق الرز بلبن
وقبل ما ارد كان مخلص نصها ودوقنى معلقه اللى هى النونو البلاستيك دى اللى بتبقى مع العلبه ثم كملها للاخر
وطفى عليا النور ونمت وانا بسمع صوت تقشير ورقة الكونو
كل سنه وانا وكل ام طيبه  و تعيش وتجيب وتاكل  يا سى الاستاذ مؤمن واللى لسان حاله بيقول :

انى وان كنت الاخير زمانىَ 
لاندل مما استندله الاوائلُ

شكراً يا معلم ومردودالك ف عيد ميلاد امك😢
لنا الله 
#ابتسام 

تعليقات

إرسال تعليق

المشاركات الشائعة من هذه المدونة

#ليه_طيب_اكسر_وراه_قله؟ج٢#الليله٦٠٨

صورة
#ليه_طيب_اكسر_وراه_قله؟ج٢ #الليله٦٠٨ اما بقى الحدوته التانيه فبتقولك ان زمان وبردو ايام الفراعنه كانت لما الانسان يموت بيكسروا وراه اناء من الفخار  يعنى هنا كانت عاده مرتبطه بالجنائز  وطبعا كلنا عارفين اهمية الموت و الحياه الابديه والكلام دا كله عند المصريين القدماء واظن انى لسه مخلصه سلسلة ايزيس وازوريس اللى بتحكى باستفاضه ف اهمية الدفن والليله دى  طب بردو ليه نكسر وراه حاجه فخار واللى رسيت ع القله لاننا بقينا نستخدم معادن وصينى واوانى تانيه حاليا  انما القله فهى اللى كانت مكمله حتى دخول التلاجه الايديال ال ٨ قدم لكل بيت نرجع لكسر القله الفكره انهم مش بس بيكسروا القله لاء وكمان بياخدوها ويدفنوها جنب قبر المرحوم طيب الله ثراه ... ودا ليه؟ علشان لما ترجع الكا يعنى (الروح) على بيته مره تانيه مره ماتأذيش اهل البيت اللى موجودين فيه دول كانوا بيعملوا الاكل ف البيت وياخدوه عند مكان المقبره وياهم وهناك ياكلوا وبعدين يكسروا الاوانى دى ويسيبوا الفخار الكسر هناك  واللى كانوا بيسموه الشِقف جمع شقفه لدرجة ان المتخصصين فى الآثار وهم بينقبوا لو لقوا ف مكان ما آنيه  فخاري...
قراءة المزيد

#هو_صحيح_الجوع_كافر_بس_مش_للدرجه_دى؟؟؟ج٢#الليله٦٥٠

صورة
#هو_صحيح_الجوع_كافر_بس_مش_للدرجه_دى؟؟؟ج٢ #الليله٦٥٠  زى ما قولنا كان الموسم الزراعي في شمال العراق اواخر عام ١٩١٧ سئ جداً ومطر قليل ومحصول ضعيف و بيقول محمد امين العمري  واللى كان ف الوقت ده ضابط اعاشة في الجيش السادس التركي ويعتبر شاهد عيان ع الفتره دى بيحكى ويقول : انه كتب تقرير للقائد خليل باشا وضح فيه الخطر اللي هيحصل في ولاية الموصل بسبب قلة الحبوب و انهم ضرورى يستعدوا ويجيبوا مؤن من اسطنبول و يلحقوا الدنيا قبل فوات الاوان   لكن خليل باشا كبر دماغه و مهتمش للتحذير ده وقال له  ان ولاية الموصل هي مستودع تموين العراق و هي مش  محتاجة تموين يجي لها من بره يا حبيبى احنا ناخد ومنديش بس زى ما توقع محمد امين العامرى بدأت المجاعه حصل ايه ف المجاعه ؟ هل تداركت الحكومه الغير واعيه سوء الحال ؟ ولا ايه اللى حصل؟ ازاى اتعامل اهل الموصل مع المجاعه؟ اقولكم اولا زى ما توقع ضابط الاعاشه بدأت المجاعة تستفحل وشملت الموصل والمنطقة الواسعة اللى ف الشمال منها لحد بحيرة ((وان)) وبدأت جموع من الجياع تهجر ديارها في الاناضول وتتوجه ناحية الموصل  ما الكل بقى فاكرها مليانه خير...
قراءة المزيد

#زئرده #الليله١٠١

صورة
#زئرده #الليله١٠١ الحدوته المرادى حقيقيه زى حكايه #الشنطه_المعجزه  اللى ده الرابط بتاعها https://www.facebook.com/102264164820545/posts/142331610813800/ بردو جيران ماما زمان ف الحى العريق والشارع الجميل (( ابن الرشيد )) اللى لا اتولدت فيه ولا عشت فيه بس حبيته من حب امى فيه ومن حكاياتها عنه  (( زئرده ))  دى واحده جارتهم وباين من اسمها -اللى طبعا مش اسمها الحقيقى - ولكن الناس كانوا مسمينها كده لانها كانت صغننه الحجم  تقريبا كان اسمها نوال بس اللى كانت الدنيا كلها بتناديها بيه كان زيئرده كانت متجوزه بس معهاش اولاد وجوزها كان بيشتغل ف بلد تانيه وبييجى يشوفها كل فتره  وعلشان كده كانت عايشه ف شقه ف بيت اهلها بس بتبات لوحدها ف شقتها كان الناس كلها عارفين انهم مرتاحين ماديا  وف ليله صيفيه حاره حين لم يكن يوجد لا تكييف ولا حتى مروحه فى هذا الزمان القديم  و حيث لا يوجد حل سوى ان تنهى ليلتك بدش بارد لتذهب للنوم متأخراً على ١١ونص ١٢ بالليل كده  بعد ساعه ولا ٢ اما المدينه كلها تغرق فى سبات عميق مفيش صاحى  كانت كالعاده بايته لوحدها وحست بحركه معاها ف اوضة ...
قراءة المزيد