#اذْهَبَا_إِلَىٰ_فِرْعَوْنَ_إِنَّهُ_طَغَىٰ٥سيدنا_موسى_ج١٠#الليله٣٠٧

#اذْهَبَا_إِلَىٰ_فِرْعَوْنَ_إِنَّهُ_طَغَىٰ٥سيدنا_موسى_ج١٠

#الليله٣٠٧

بيقول السدى ان هامان بنى البناء بتاعه وان فرعون بعد ما طلع عليه حدف حربه ورجعت ملطخه بالدم فقال فرعون قتلت اله موسى فربنا ارسل جبريل عليه السلام وضرب الصرح بجناحه فوقع ٣ اقسام 

قسم على جند فرعون وموت منهم الف الف مليون يعنى 

وقسم نزل ف الغرب وقسم نزل ف البحر طبعا مقصود النيل 

ولم يترك احد  شارك فى بناء الصرح الا قتله 

قلبى مش مرتاح للجبروت اللى بيتحكى انه ممكن يكون ربنا سبحانه وتعالى سمح لفرعون انه يظهره 

طبعا لو كانت الروايه دى صحيحه فممكن تكون حربته اصابت طائر

او ان المولى عز وجل ساب فرعون يتمادى ف غيه علشان يبان قوتة سبحانه وتعالى وتكون اللطمه مفاجأه لفرعون و من معه 

اياً كان كمان بيقال انه اول من بنى  بناء من الطوب الاحمر هو بناء هامان اللى هو الصرح ده و اللى بيقول كده ابن عباس ان هامان اول من صنع بناء من الآجر 

وانه استعان ب ٥٠ الف بنّاء غير المساعدين 

وبيقولوا انه موجود ف منطقه اسمها الكوم الاحمر ف مدينه الاقصر 

وفى ناس تانيه بيقولوا ان اللى قاله فرعون ده كان سخريه منه على سيدنا موسى وان هامان مبناش حاجه وانها كانت مجرد جملة تريقه وسخريه من سيدنا موسى قالها فرعون ولكن لم تنفذ بالفعل 

يعنى ازاى بتقولى الكلام وعكسه وازاى بتتكلمى بتفاصيل وترجعى تنفى الحكايه قلبا وقالبا 

الموضوع انى بقول كل ما كتبه علماء المسلمين وقرأته

متنساش ان الموضوع قديم والشاهد عليه من البشر او تسجيله مش هنلاقيه 

وان الكلام الوحيد الموثق واللى لا يدع مجال للشك هو القرآن فقط 

فسامحنى لو قرأت كلام مش مقتنع به واعتبر انك لم تقرأه 

وكمان لو هنحكى الحدوته لاطفال ممكن نختصر الكلام اللى هيعمل عندهم لبس او سوء فهم 

وانا بقيت اقول مصدر الحكايه ما امكن حتى لو كنت سمعتها من والدتى الله يرحمها 

وبالمناسبه الحكايه بتاعة الجمره والتمره حكاها الشيخ الشعراوى بس الفرق انه قال الحمره وهو يقصد البلحه الحمرا يعنى

نرجع نكمل الحدوته بقى : 

خلصنا من فرعون ولوعه ودلعه و تخريفه 

ابداً دا لا راضى يسيب سيدنا موسى ياخد بنى اسرائيل 

ولا راضى يخفف عنهم العذاب

و هنا كان امر ربنا بالعذاب على فرعون اصله الاول كان بيقول ايه :

 ( فَإِذا جاءَتْهُمُ الْحَسَنَةُ قالُوا لَنا هذِهِ وإِنْ تُصِبْهُمْ سَيِّئَةٌ يَطَّيَّرُوا بِمُوسى ومَنْ مَعَهُ أَلا إِنَّما طائِرُهُمْ عِنْدَ اللَّهِ ولكِنَّ أَكْثَرَهُمْ لا يَعْلَمُونَ )(131)

يعنى الخير دا مننا والشر دا من موسى وقومه 

دأب الكفار فى كل زمان ومكان 

علشان كده كان عقاب ربنا لازم يقع عليهم بعد صبر من المولى عز وجل اد ايه على فرعون وجبروته وقومه وانصياعهم له 

وبدأ العذاب 

وكان اوله 

(ولَقَدْ أَخَذْنا آلَ فِرْعَوْنَ بِالسِّنِينَ ونَقْصٍ مِنَ الثَّمَراتِ لَعَلَّهُمْ يَذَّكَّرُونَ) (131)

والمقصود بالسنين مش الاعوام لا 

ربنا يقصد الجدب والقحط والجفاف ولما يبقى فى جفاف يعنى مفيش زراعه يعنى مفيش ثمرات 

يمكن يفوقوا ويعرفوا ان الله حق 

وان الرزق من ربنا لا هو من شطارتكم ولا من رضا الهتكم عليكم 

ولما ربنا غضب عليهم منع الفيضان ومات الزرع وجدبت الارض وقلت الثمرات 

طب ايه اللى حصل بعد الجفاف ونقص الثمرات 

دا اللى هنعرفه بكره باذن الله 

#حبيبي_القرآن

#يارب_اكون_فهمتها_صح

#اكثر_من_ذكرت_قصته_في_القرآن_سيدنا_موسي١٠

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل 🥱او😤او😞 وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٣٠٧

#ابتسام