#سكتناله_دخل_بحماره #الليله٣١٦

#سكتناله_دخل_بحماره 

#الليله٣١٦

هو مثل ظريف وحكايته زغنطوطه خالص

انتوا عارفين ان الناس مقامات 

وخصوصا ف الارياف اللي كل واحد فيها عارف اصل التانى وفصله 

وعارفين ان فيها الاكابر والاعيان اصحاب الاملاك والاراضي 

وفيها الفقرا والعمال باليوميه والاجير اللى بيقولوا عليه تملى 

ودا غير تملى معاك بتاعة عمرو دياب 

قهقهقهقهقه

القافيه حبكت سامحونى 😊

المهم ان اللي حصل ان واحد من هؤلاء الفقراء التمليه فضل بدخر ويحوش لحد ما بقى معاه فلوس وراح السوق واشتري حمار 

ومن فرحته به مبقاش يمشي ف حته من غيره

ولان من الاصول ان حد لو عدي علي ناس من الاكابر دول وهم متجمعين على مصطبه دوار حد منهم ولا قاعدين ف قهوه 

المفروض انه  ينزل من على حماره كأدب وحترام 

بس صاحبنا و هو بيعدي مبينزلش من على حماره 

ويعدى يقول السلام عليكم وهو راكب حماره بكل جليطه 

والاكابر يسكتوله كنوع من التغاضي علشان شايفين  فرحته بالحمار 

واتكررت الحكايه مره واتنين واسبوع واتنين لما اصبح دا المعتاد منه 

وبعد ما هم كمان كان ف بالهم يسيبوه شويه وبعدين ينبهوه على قلة ذوقه دى وان اللى بيعمله دا ميصحش 

وان كل اهل البلد لما  حد  منهم بيعدى على  كُبرات البلد دول لازم ينزل من على ركوبته 

بس متفهمش ايه اللى حصل يمكن كبروا دماغهم منه واتعاملوا معاه كحالة استثنائيه لن يجود الزمان بعقليه نص كم زى عقليته فمش لازم يهتموا به او حتى يلفتوا انتباهه على الجليطه دى 

بس اللي حصل انه بعدها عدي عليهم وهم قاعدين 

فقرر يقعد معاهم ... ماهو بقى دلوقتى اصبح معاه حمار و بقي وغني و من الاعيان زيه زيهم 

مع ان اى حد من الاعيان دول كان عنده عدد كبير من الحمير والمواشى  

بس هو بقى شاف نفسه بقى خلاص من مستواهم علشان كده عادى يعنى انه يروح يقعد معاهم 

وان كانت دى مشكله بس مكانتش دى هى اكبر مشكله 

الناس كانوا متجمعين ف قعده على باب دار واحد منهم ف الارض الواسعه اللى قدام داره 

قاعدين على الحُصر ع الارض على هيئة حلقه واسعه 

قوم ايه الباشا ده من جبروته دخل عليهم القعده وهو راكب ع الحمار بتاعه 

وعامل فيها فارس الفرسان اللى جاى على ناس اقل منه 

هم قاعدين على الارض اما بسلامته 

فراكب حمارته وعامل فيها ابو الفوارس

علشان كده قالوا ... سكنتاله دخل بحماره

دليل ان الخطأ من الاول مش غلطته هو ولكن غلطتنا احنا لما سكتناله

علشان لما سكتناله دخل بحماره

من الاخر متسيبش حد يسوق فيها ويتجاوز حدوده معاك لانه هيتعبر ده حق مكتسب 

بل انه ممكن يدخل عليك بحماره

سواء حمار العشم اللى يصل للبجاحه ويبقى باستخدام سيف الحياء اللى نهانا رسول الله عنه وقال ما اخذ بسيف الحياء فهو باطل

او ان علاقات تكون فيها من العشم اللى يخلى اللى قدامك يتجاوز حدود العشم وتبقى علاقة مُجهِده مؤذيه تاخد من نفسك واعصابك ووقتك اللى يوصل انه يجهد اعصابك او حتى صحتك 

علشان كده متسكتش علشان هيدخل عليك بحماره 

 

#حكايه_ورا_كل_مثل 

#ابتسام

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳  وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂  وبما ان الحكايات مرت عليها سنه  بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٣١٦

#ابتسام