#طالوت #الليله١٣
#طالوت
#الليله١٣
انا طالوت او زي ما بيسميني بني قومي شاؤول
حكايتي غريبه وطويله... بس تستاهل انها تتحكي ... وتتسمع
انا راجل عادي جدا من قريه جبعه قريه متطرفة مش مركز مدينه ولا حاجه
الحمد لله اتجوزت وخلفت وحياتي الي حد ما مستقره
بس حصلت مشكله الحمير بتوعنا هربوا
خرجوا من البيت واختفوا
طب وبعدين لازم اروح اجيبهم
انا مش هاقدر استغني عنهم
انا دخلت دلوقتي القريه المباركه بيت المقدس
في دوشه و هيصه مش طبيعيه
هاسأل واحكيلكم
اه ... دول بيختاروا ملك
بيختاروه ليه ؟
ماشي هقولك .... من مده كبيره اوي وبني اسرائيل بيعصوا الله ويفسدوا ف الارض
ودا خلي ربنا غضب علينا
غضب ازاي ؟؟
اقولك
كان عندنا صندوق او زي ما تقول تابوت
الصندوق او التابوت ده كان مجمعين فيه اللي باقي من اثار نبي الله موسي ونبي الله هارون
اولادهم واحفادهم من بعدهم احتفظوا بالاثار دي
زي ايه؟؟؟
هاقولك
كان فيه عصا موسي
ودرعه
وكان فيه بعض اجزاء من التوراه اللي كتبها موسي لما راح لميقات ربه
وحاجات تانيه
كنا بنحافظ عليهم جيل ورا جيل
كانت بالنسبه لنا مهمه جدا
كان لما الجيش يحارب يحط التابوت ده ف مقدمة الجيش
كنا ننتصر علطول مهما كانت قوة عدونا
كان ربنا بيبث فينا السكينه.. ويبث في قلوب العدو الرعب فنهزمهم
بس دا كان زمان
زي ما بقولك زاد العصيان والتجبر واللي وصل بينا لقتل الانبياء
اه والله ... قتلنا انبياء كتير
لدرجة ان ربنا غضب علينا
اولا : اتحرمنا من التابوت بعد ما استولي عليه الاعداء
ثانيا : اتحرمنا من الانبياء
ثالثا : زاد علينا القهر من الاعداء العماليق او الفلستيين
وحاليا احنا محتلين منهم
بقالنا فوق ال ٤٠٠ سنه
اه والله مش بقولك الدنيا مقلوبه وحالنا يصعب ع الكافر
بس انا مالي انا جاي ادور علي الحمير بتاعتي وارجع بلدي
بس بردو اشوف اللمه
اللي هناك دي ايه !!!
انا شايف راجل شكله عظيم كده وله هيبه
تصدق سالت مين ده وقالوا لي انه نبي
طب الحمد لله اخيرا ربنا رضي عننا وبعث فينا نبي بيقولوا اسمه صموئيل
بس بص دا ماسك ف ايده عصايه والناس عمالين
يروحوا ويقفوا جنبها ويقيس طولهم عليها
غريبه مجتش طول ولا واحد فيهم
طب استني اما اروح اجرب انا كمان كده
ايه ده دي طلعت طولي
غريبه اوي
دا النبي بيقولي اني هاكون ملك عليهم
استنا يا بني الله لاء.. لاء
انا مش عاوز ابقي نبي عليهم انا عاوز الاقي حميري واروح لبلدي
مش كراهيه ف الملك محدش يكره الملك
لكن كراهيه اني احكم الناس دول
دا هم كمان مش عاوزيني اكون ملك عليهم
انا فاهم السبب
هاقولك رافضيني ليه؟
بس بكره بقي
#طالوت_ملكاً
#حبيبتي_سورة_البقره
#انا_وانت_وساعات_الحظر
#ابتسام
لاننا ف رمضان حبيت اخلى فى حاجه مختلف وبما انى بقالى قرب السنتين بكتب قصص كل ليله قصة جديده...
فقررت ان القصص تكون كلها قصص دينيه وهبتدى بقصة سيدنا سليمان واتمنى انها تعجبكم
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله١٣
#ابتسام
تعليقات
إرسال تعليق