#السامري#الليله_الاولى١
#السامري
#الليله_الاولى١
اسمحولي اتكلم عن نفسي بنفسي
اسمي موسي السامري
اه اسمي، موسي زي النبي
مش بس كده . .
انا كمان اتولدت ف نفس السنه اللي اتولد فيها موسي بن عمران نبي الله ونبي بني اسرائيل
هتقولوا الملك كان بيقتل البنين و ان لم ينجوا في هذا العام الا موسي النبي بمعجزه
دا اللي انتوا فاكرينه
الحقيقه ان انا كمان نجاني الله وبمعجزه اكثر غرابه من معجزه موسي بن عمران
بس انتوا مهتمتوش تعرفوا الا معجزه موسي وتخلدوها
انا امي لما حست بقرب موعد الوضع طلعت لوحدها ع الجبل ف الصحرا
كأن قلبها كان حاسس انها حامل ف ولد
اصل اكيد يعني مكانش عندنا سونار زي ايامكم
وفعلا ولدتني ولد بس ملحقتش تفرح بيا ماتت بحمي النفاس
في الوقت اللي اتحرمت من امي اللي خافت عليا وطلعت بيا الجبل
رجع موسي بن عمران لامه اللي رمته ف النيل - ال امر ربها ال -
ربكم حرمني من امي ورجع موسي ابن عمران لامه كي تقر عينا
بس الحقيقه يعني كان كريم معايا ف حاجه تانيه
ربكم مسابنيش لوحدي عارفين بعتلي مين يرعاني لحد اما اكبر واقوي
جبريل .... اه الملاك المشهور
مش فرعون وزوجته انا بقي رباني ملاك من الملائكة الكبار بس بردو متعرفوش الا اسيا وفرعون وموسي ومعجزاته
كبرنا وارتكب موسي جريمته واتسبب ف موت المصري وهرب عشر سنين ولما رجع
مش يستخبي
مش يداري من فرعون
لاء دا راحله ف قصره يتحداه ويقوله انت مش اله
وان في اله تاني في السماوات وانا جايلك منه برساله وبمعجزات
وكلام كتير
مش فاهم ليه مقتلهوش وريح نفسه وريحنا
فرعون اللي كان قارفنا وحاطط علينا من قبل موسي
حط علينا زياده
خصوصا بعد ما كسفه موسي قدام السحره بمعجزه العصا
والسحره الاغبيا هم كمان ازاي يأمنوا برب موسي
ازاي يتركوا عبادة الفرعون و الاصنام اللي ماليه اقاليم مصر ال ٤٢ و يأمنوا برب مش شايفينه
ازاي يستحملوا فرعون يقطع اديهم ورجليهم بالعكس
وبعدين يعلقهم عبره للناس
الغريبه ان الناس بعد ده كله لسه مؤمنين برب موسي ومعجزات موسي
والاعجب بني اسرائيل اللي زاد عليهم البطش من فرعون
دا ممكن فرعون يبيدنا ف لحظات
ايه ده؟؟
موسي بيقولنا استعدوا هنمشي من هنا
هنمشي نروح فين يا عم موسي
دا حتي موسي منعنا اننا نعرف حد من اصدقائنا من المصريين اننا هنمشي علشان ميبلغوش فرعون
طب تعرفوا دا حتي نسائنا من بني اسرائيل عندهم خصله كده
ف الاعياد والمناسبات بيستلفوا من جاراتهم المصريات الحلي والمجوهرات
اه صح اقرع ونزهي
سامعك وانت بتقرا
بس اهيه خصله فينا نحب الدهب زي عنينا حتي لو مش بتاعنا
شايف اللي بيحصل
موسي بيقولنا يلا نمشي دلوقتي
انكم متبعون يعني فرعون وجنوده ورانا
ايه يا عم موسي ماشي فين؟؟
هاراسوس
دا واخدنا ناحية البحر
استني هنا
انت هتودينا فين رايح تغرقنا يا موسي
بقي دا جزاتنا اللي مشينا وراك
سامع واحد اهه بيسأله رايح فين يا نبي الله
قاله ان معي ربي سيهدين
الحق الحق موسي ضرب البحر بعصاه
البحر اتشق نصين
كل نص عالي كأنه جبل
واحنا ماشيين بينهم
حلوه دي يا موسي
بس استنوا فرعون ورانا انا شايفهم قربوا يحصلوا الميه اهه
وفي لسه ناس من بني اسرائيل مخرجوش من البحر
الحمدلله خرجوا من البحر بس الجنود لسه ورانا
هارابيض
البحر رجع زي ماكان
شايف.. شايف
شايف ايه!!
استني انا هاحكيلك
البحر رجع زي ما كان بس بعد ما بقي فرعون و جنوده ف قلب البحر
سبحان الله كلهم غرقوا
متستغربش اني بقول
سبحان الله انا مش غبي
انا عارف ان في ربنا
بس هو مبيدينيش حقي
كل حاجه موسي بن عمران موسي بن عمران
طب وانا منا صاحب معجزات زيه
ما علينا
الامر دلوقتي بقي امان لا فرعون ولا خوف
احنا بس نعرف هنعيش فين والدنيا هتبقي فل
موقف في منتهي الغرابه حصل النهارده
بقولك ايه
استناني بكره اكمل.. معلش الموضوع طويل
والبت اللي بمليها وتكتب اللي اسمها ابتسام دي بطيئه اوي …… زهقتني خالص
هاكمل بكره بقي
#موسي_السامري
#انا_وانت_وساعات_الحظر
#الجزء_الأول
#يارب_اكون_فهمتها_صح
#ابتسام
قصه اخرى من القصص المعاده واللى مرتبطه بقصة سيدنا موسى والمفارقه انها كانت الليله الاولى عدلتها لما عملت لها اعاده السنه اللى فاتت بس مش لاقية التعديل🤔
وافتكروا ...
لاننا ف رمضان حبيت اخلى فى حاجه مختلف وبما انى بقالى قرب السنتين بكتب قصص كل ليله قصة جديده...
فقررت ان القصص تكون كلها قصص دينيه وهحكى قصة مرتبطة بقصة سيدنا موسى واتمنى انها تعجبكم
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ١
#ابتسام
تعليقات
إرسال تعليق