#السامري_ج٣الاخير#الليله٣
#السامري_ج٣الاخير
#الليله٣
حكيت لكم الليله اللى فاتت ان مش فاضل الا ١٢ الف بس اللى مع هارون وهم دول عاملين قلق ومعترضين علي اللي بنعمله
بس انا مش خايف... الجماعه اللي معايا واقفين لهم ومستعدين يقربوا بس من العجل الاله
وهم هيفرموهم
بس هارون مانع الناس اللي معاه
شكله عنده امل ان اخوه يرجع تاني
عدي يومين بس والموضوع بقي تمام اوي
يعني اخيرا خدت حقي ومكانتي .. قيمتي...
واحقيتي اللي حرمني منها وجود موسي
بس دلوقتي خلاص انا هاكون الكل ف الكل والناس كلها هتمشي وريا
دا عدي ٣٩ يوم من ساعة ما سابنا وراح الجبل
ابشروا يا رجالتى
النهارده اليوم الاربعين من ساعة ما موسي مشي
كده اتأخر ١٠ ايام اكيد مات الاغلبيه بيقووا انه مات
بس ايه ده ؟؟؟؟!!!!
انا سامع صوت موسي
مش مصدق
اه انا شايف موسي
دا بيتخانق مع اخوه هارون
دا زي ما يكون جاي وعارف.... يكون ربه قاله ؟؟؟!!!
دا بيشده من لحيته وبيخانقه جامد
وشايف اخوه هارون بيفكره انه قبل مايمشي وصاه انه يتصرف بالحسني
وانه خاف ان موسي لما يرجع يقوله فرقت بين بني اسرائيل
لا يا هارون مكانش هيفرقنا كنت انا والاغلبيه اللى معايا هنقضي عليك انت و ال ١٢ الف اللي معاك
بس هم فين ال٦٠٠ الف اللي معايا
اه يا اندال دا كلهم اول ما جه موسي راحوله
ال٦٠٠ الف اللي معايا كلهم سابوني لوحدي
انا واقف بطولي
انا لوحدي زي ما اتولدت لوحدي
ليه يا موسي انا بكرهك
وبكره ربك
وبكره بني اسرائيل اللي اتخلوا عني بعد يومين بس من المكانه اللي حطوني فيها كنت هكون الكاهن الاوحد للاله العجل زى الكهنه اللى كانوا عند المصريين ومكانتهم بس كنت هبقى الكاهن الاوحد والنبى والملك كمان
موسي بيسألني عملت كده ليه ؟؟؟
انت اللى رجعت ليه يا موسى ؟؟؟؟
بس هجاوبك
انا بصرت بما لم يبصروا به
عارف انهم هيمشوا ورا اي حد
علشان كده خدت شويه من الي انت قولته ونبذته
شيلت الحته بتاعة ان ربنا اله واحد احد فرد صمد وكذلك سولت لي نفسي دماغي اللي متكلفه دي هي اللي فكرت ف كده
بس استني ليه تحكم عليا بكده ؟؟
ازاي ابعد عن الناس ؟؟
يعني ايه اقول لا مساس ؟؟؟
#طب_بلاش_تلمسوني_بس_حبوني
انا عاوز اكون وسط الناس
انا بحب ان الناس تقربلي... وتتقربلي
انا بحب اشوف انعكاس صورتي ف عنيهم
انا حاسس اني لازم ابعد
انا مش طايق اكون وسط البشر بس انا هتجنن من كده
دا انا اللي بقولهم لا مساس ازاي انا اللي ببعدهم عني
ايه العذاب ده يا ربي
محدش حاسس بيا بيقولوا ان دا عقاب بسيط من رب العالمين
وان ليا عقاب ف الاخره كمان
العجل حرقوه وبعدين بردوه ورموه ف البحر
وبني اسرائيل امرهم سيدنا موسي فقتلوا بعض بعد ما مكسوا سيوفهم وخناجرهم وربنا انزل عليهم ظلمه مكانوش بيشوفوا مين بيموت مين
لحد ما ربنا عفا عن اللي باقيين
#انتهي
#طب_بلاش_تلمسوني_بس_حبوني
#انا_وانت_وساعات_الحظر
#ابتسام
لاننا ف رمضان حبيت اخلى فى حاجه مختلف وبما انى بقالى قرب السنتين بكتب قصص كل ليله قصة جديده...
فقررت ان القصص تكون كلها قصص دينيه ودلوقتى بقول قصص مرتبطه بسيدنا موسىزى قصة السامرى واتمنى انها تعجبكم
بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٣
#ابتسام
تعليقات
إرسال تعليق