#الحجر#الليله٣٨٢#كعب_ابن_مالك

#الحجر

#الليله٣٨٢

#كعب_ابن_مالك

السنه اللى فاتت كنا زعلانين كلنا 

زعلانين من الحجر والحبسه 

كنا زعلانين اننا بنتواصل بالتليفون بس  

ومش بنتقابل ولا بنتجمع و لا بنزور بعض ولا بنفطر سوا وان الجناين واماكن الفسح و السهر كلها مقفوله

طب تعالوا تنفرج علي نوع تاني من الحجر 

حجر بيتفرض عليك وانت وسط الناس 

محدش يكلمك

محدش يتعامل معاك.. حتي اقرب اصدقائك او اهل بيتك !!! 

لو متضايق من الحجر 

مخنوق وانت وسط اهلك ومعاك موبايلك وتليفزيونك والنت شغال 

يبقى تعالوا نتكلم عن نوع تاني من الحجر 

اتكلمنا قبل كده عن السامرى وازى انه كان له ان يقول ف الدنيا لا مساس

بس القرآن موضحش اكتر من كده و معرفناش الناس اتعاملت ازاى بعد امر ربنا 

انما الليله هتكون حكايه واحد اتعمل عليه حصار 

طب ازي ؟؟؟؟

وليه ؟؟؟

ومين اللي فرضه؟؟؟ 

ازاي مدينه كامله تنفذه؟؟؟

كعب ابن مالك ... افتكروا الاسم ده كويس 

الحكايه طويله ولكن ممتع اننا نبقي عارفينها

الحكايه ف سورة التوبة ومتسميه السوره علي اسم الحكايه دي الحكايه دى اول مره اعرفها بكيت بكا ... ومازال حتى الان اما بقرأها او اوصل عندها ف سورة التوبه لازماً يخنقنى العياط وانا بقرأ الايه ١١٨ من سورة التوبه 

(وَعَلَى الثَّلَاثَةِ الَّذِينَ خُلِّفُوا حَتَّىٰ إِذَا ضَاقَتْ عَلَيْهِمُ الْأَرْضُ بِمَا رَحُبَتْ وَضَاقَتْ عَلَيْهِمْ أَنفُسُهُمْ وَظَنُّوا أَن لَّا مَلْجَأَ مِنَ اللَّهِ إِلَّا إِلَيْهِ ثُمَّ تَابَ عَلَيْهِمْ لِيَتُوبُوا ۚ إِنَّ اللَّهَ هُوَ التَّوَّابُ الرَّحِيمُ )(118)

وصحيح لما تعرف ان فى حد زعلان منك هتروح لحد يراضيك او تجيبها صح وتلجأ لربنا تبثه همك وشكواك 

طب ولو كان اللى غاضب عليك ربنا واللى مبلغك انه غضبان عليك هو رسوله هتعمل ايه ؟

وتحس بايه؟

وايه اللى ف الدنيا تروحله تشكيله؟

وازاى هتضيق عليك الارض لو انت اغضبت عليك رب اليماوات والارض؟ 

وتعالوا نشوف الحكايه من الاول : 

كان ياما كان الرسول صلى الله عليه وسلم عامل استعدادات لغزوه 

طب عادي ما بيعمل غزوه كل فتره 

بس المرادي مختلفه 

الدنيا حر اوي ... ف عز الصيف

والعدو مش اي حد دا الروم بحالهم الدوله اللي منتشره ف ٣ قارات آسيا وأفريقيا واوروبا 

الدوله اللي معتبره البحر المتوسط بحيره رومانيه

- حته جغرافيا البحر المتوسط زمان كان اسمه بحر الروم -

طب فين العتاد 

لاء ... دا اصلاً اسمه جيش العسره يعني ضيق الحال 

كفايه كلام عن غزوة تبوك لان لها حكايات كتيرة حلوه هنحكيها بعد كده 

نرجع لحكايتنا 

ذهب الرسول صلى الله عليه وسلم هو والجيش بس في ناس ماراحوش

طب ليه ؟؟

هاقولك

اولهم : ناس ياعيني مرضي او ضعاف مش حمل حرب وخصوصا المسافه الطويله دى لحد الشام والحر الشديد ده

وتانيهم : ناس عندهم استعداد يحاربوا بس معندهمش راحله ولا معاهم عتاد ولا مؤن

ودول راحوا للرسول صلى الله عليه وسلم وقالهم ممعاييش اللي احملكم عليه

اه محتاجكم بس مش هاخدكم اموتكم ف الصحرا الطريق طويل والحر شديد 

ودول اللى رجعوا واعينهم تفيض من الدمع زى ما ربنا حكى عنهم

(وَلَا عَلَى الَّذِينَ إِذَا مَا أَتَوْكَ لِتَحْمِلَهُمْ قُلْتَ لَا أَجِدُ مَا أَحْمِلُكُمْ عَلَيْهِ تَوَلَّوا وَّأَعْيُنُهُمْ تَفِيضُ مِنَ الدَّمْعِ حَزَنًا أَلَّا يَجِدُوا مَا يُنفِقُونَ)التوبه٩٢

واللي فاتوا اسمهم المُعَذّروًن يعني اللي عندهم اعذار 

ثالتهم : ناس بتدلع

زي واحد راح للرسول قاله خايف لما اشوف بنات الاصفر هو قال كده (بنات الرومان يعنى ) ممسكش نفسي😏😏 ... اعذرني 😕

ماسكه نفسي اشتم. 🤬🤬🤬

طبعا الرسول صلى الله عليه وسلم زعل و رفض يعذّره 

- استحمل كتير يا حبيبي يا رسول الله -

وراحت الغزوه ... ورجع الرسول من الغزوه 

طب ايه اللي حصل

رابعا : بعد ما رجع كان في حاجه وثمانين واحد مطلعوش معاهم الغزوه ومش معذرين 

راحوا للرسول يستسمحوه ويقولوا حججهم اللي منعتهم والرسول يستغفر لهم 

بس في واحد بقي 

ودا خامس فئه من اللي ما شاركوش ف الغزوه

وتعالوا نتكلم عن الحجر بتاعه

لاء مش انا اللي هتكلم 

نسيبه هو يحكي

 وتعالوا نسمع الحكايه علي لسانه

انا اسمى كعب بن مالك

من اوائل من دخل ف الاسلام من اهل المدينه المنوره 

فانا كنت من ال٧٠ اللى شاركوا ف بيعة العقبه الثانيه 

كمان شاركت ف غزوة أُحد واوشكت على الشهاده بعد ما اصابنى حوالى ١٧ طعنه 

وبفضل الله بشهادة الصحابه قاتلت قتالاً شديداً

مش بس كده ... دا انا بفضل الله كنت اول من إطمأن ان الرسول صلى الله عليه وسلم لم يُقتل ... شفته وبشرت المسلمين بنجاته بعد ان كرّ علينا كفار مكه بعد نزول الرماه من فوق جبل أُحد زى ما انتم عارفين 

طب اسمحولى احدثكم عن حاجه تانيه 

تعرفوا انى من الشعراء ال٣ لرسول الله مع حسان بن ثابت وعبد الله بن رواحه 

يعنى انا مش راجل وحش 

سمعت عن الغزوه ووالله كنت ناوي اروح ، انا شاب قوي وعندي الراحله اللي هركبها وعندي العتاد والمؤنه كل ما يندهوا اقول دا هي ساعة زمن واكون جهزت واروح معاهم

وهوب الغزوه طلعت ولا ولحقت اجهز ولا لحقت احضر حاجه 

مبسوط انا بالظلال وطيب الثمار وقلت وقت ما يطلعوا اقوم جرى 

بس لما عرفت انهم خلاص خرجوا وقمت جرى اجهز اللى ناقصنى اتعقدت معايا وملحقتش اشترى اللى محتاجه 

قلت خلاص بكره 

وبكره جاب بكره واصبح انى احصلهم شئ صعب 

حاولت الحقهم بس مش هينفع 

فضلت ف المدينه 

بس كان شكلي وحش اوي وانا بلف في المدينه مش موجود الا المعذرين او الناس اللي معروفين بالنفاق 

بس اعمل ايه ؟؟

ورجع الرسول صلى الله عليه وسلم 

وراحوا الناس يقدموا اعذارهم ال حاجه وثمانين اللى تخلفوا عن الغزوه يقدموا اعذارهم 

انا بقى اعمل ايه ؟؟

دا هنحكيه الليله الجايه باذن الله 

متنسوش

ال 👍 و 💬 و 📌

#ابتسام

لاننا ف رمضان حبيت اخلى فى حاجه مختلف وبما انى بقالى قرب السنتين بكتب قصص كل ليله قصة جديده... 

فقررت ان القصص تكون كلها قصص دينيه وهبتدى بقصة سيدنا سليمان واتمنى انها تعجبكم

بقالى اكتر من سنه بكتب قصص كل ليله قصة جديده... تقرأها وتعمل كده🤔 وحاجات تعرفها فتعمل😳 وساعات ☺او😱او😞او😭 بس اؤكد لك انك عمرك ما هتعمل🥱او💤😞 او😤وغالبا هتكون كده😂😂😂 وبما ان الحكايات مرت عليها سنه بس احسب انها مرت مرور الكرام وهتكون جديده عليكم ..اتمنى تقرأوها واتمنى اسمع رأيكوا فى القصه ... ودى كانت قصة الليله ٣٨٢

#ابتسام